តារាសម្ដែងថៃនាង Pinky Savika កំពុងតែជាប់ពន្ធនាគារ ដោយសារតែគ្រួសាររបស់នាង មាន នាង ម្ដាយនិងបងប្រុស ស្ថិតក្នុងចំណោមមនុស្ស១៩នាក់ ដែលប៉ូលីសចាប់បញ្ជូនទៅពន្ធនាគារ កាលពីថ្ងៃព្រហស្បតិ៍កន្លងទៅពាក់ព័ន្ធនឹងករណីឆបោកលុយតាមអនឡាញ។ បើទោះជាអ្នកទាំងពីរបានដាក់ប្រាក់ស្នើធានាខ្លួនក្រៅឃុំជាបណ្ដោះអាសន្នប៉ុន្តែតុលាការថៃបានបដិសេធ ព្រោះបារម្ភខ្លាចពួកគេលួចរត់ពេលបានចេញនៅក្រៅឃុំ។ រឿងរ៉ាវចាប់ខ្លួនរបស់តារាស្រីរូបនេះបានធ្វើឱ្យមានការភ្ញាក់ផ្អើលក្នុងស្រទាប់មហាជននិងរងចាំមើលថាតើរឿងនេះទីបញ្ចប់នឹងទៅជាយ៉ាងណា?
នៅក្នុងរឿងក្ដីរបស់តារាសម្ដែងស្រី Pinky Savika មានចំនួនជនរងគ្រោះចំនួន 9,804 សរុបជាទឹកប្រាក់មានចំនួន 2,489,820,321.52 បាត។ បើយោងតាមការលើកឡើងរបស់ពិធីករ Kendo ដែលជាអ្នកតាមដានជាប់ករណីបោកប្រាស់តាមអនឡាញនេះបាននិយាយក្នុងកម្មវិធីទូរទស្សន៍ថា «រឿងក្ដីបោកប្រាស់ប្រជាជន បោកម្នាក់មានទោសជាប់គុក 5ឆ្នាំ ដូច្នេះសម្រាប់ករណីរបស់ Pinky បើមានអ្នករងគ្រោះប្រមាណ10,000នាក់ អាចនឹងជាប់ពន្ធនាគារយូររហូតដល់ទៅ 5ម៉ឺនឆ្នាំ (50000ឆ្នាំ)។
យ៉ាងណាមិញនោះគ្រាន់តែជាការលើកឡើងរបស់ពិធីករ ប៉ុន្តែបើតាមច្បាប់ប្រទេសថៃបានចែងថាករណីឆបោក អាចជាប់ពន្ធនាគារយូរបំផុតមិនលើសពី20ឆ្នាំ។ ចំពោះរឿងក្ដីឆបោកឬបណ្ដឹងឆបោក នឹងមិនមានការបន្ធូរបន្ថយទោស ឬលើកលែងទោសដូចគ្នាទៅនឹងរឿងក្ដីចាប់រំលោភដែរ។ ប៉ុន្តែបើក្នុងករណីដែល Pinky និយាយថាខ្លួនក៏ជាអ្នករងគ្រោះដូចគ្នានោះ ចាំបាច់ត្រូវតែមានភស្តុតាងបង្ហាញដល់តុលាការក្នុងពេលកាត់ក្ដី។
ថ្ងៃនេះសារព័ត៌មានត្រយងសូមលើកយកជីវិតពិតដ៏អភ័ព្វ និង កម្សត់លើសពីក្នុងភាពយន្តរបស់តារាស្រីរូបនេះ។ Pinky ធ្លាប់មានឈ្មោះល្បីល្បាញនិងឱកាសសម្ដែងជាតួឯកដោយសារតែកាលពីក្មេងនាងបានសម្ដែងរឿង «ផ្កាយព្រឹក» ជាតួអង្គ ផ្កាយព្រឹក កាលពីក្មេង។ រឿងផ្កាយព្រឹកនេះល្បីល្បាញណាស់នៅប្រទេសថៃ ដូច្នេះទើបធ្វើឱ្យនាងទទួលបានឱកាសការងារជាច្រើន និងមានឈ្មោះល្បីល្បាញ។ ប៉ុន្តែជីវិតរបស់តារាស្រីរូបនេះបែរជាជួបតែរឿងអភ័ព្វនិងខកបំណងទៅវិញ។ ត្រយងសូមជម្រាបជូនបងប្អូនទស្សនិកជនបានជ្រាបដូចតទៅ៖
រឿងដំបូងចាប់ផ្ដើមឡើងគឺ Pinky ធ្លាប់មានព័ត៌មានថាកំពុងតែមានទំនាក់ទំនងស្នេហាជាមួយនឹងកំលោះកូនមហាសេដ្ឋី Songkran ហើយសាមីខ្លួនបានចេញមកផ្ដល់បទសម្ភាសឱ្យអ្នកសារព័ត៌មានទំនងជាទទួលស្គាល់ថាកំពុងតែជជែកនិងសិក្សាពីគ្នាទៅវិញទៅមក ប៉ុន្តែភាគីខាងប្រុសបានចេញមកផ្ដល់សម្ភាសវិញបែបបញ្ឆិតបញ្ឆៀងថាត្រឹមតែស្គាល់ធម្មតាប៉ុណ្ណោះ ធ្វើឱ្យគ្រប់ក្រសែភ្នែកបាញ់សម្លឹងមក Pinky ហើយមិនយូរប៉ុន្មាន Songkran បានប្រកាសថាខ្លួនកំពុងតែសេពគប់ជាមួយនឹងតារាសម្ដែងប្រចាំប៉ុស្ដិ៍លេខ៣ Aff Thaksaorn រហូតធ្វើឱ្យទាំង មហាជនភ្ញាក់ផ្អើលខ្លាំង ចំណែក Pinky ក៏ឈប់និយាយដល់ទំនាក់ទំនងខ្លួននិង Songkran ជាបន្តទៀត។
បន្ទាប់ពីនោះស្រាប់តែមានលេចឈ្មោះ Pinky ទៅជាប់ពាប់ព័ន្ធនឹងបុរសមហាសេដ្ឋីថៃ Peg Sanchai ស្វាមីរបស់តារាសម្ដែងល្បី Thanya ដោយខណៈនោះមានដំណឹងលេចឮច្រើនថា Pinky គឺជាជនទីបីដែលព្យាយាមបំបែកគ្រួសាររបស់ Thanya ហើយក៏មានសង្គ្រាមទឹកមាត់ ឆ្លើយឆ្លងគ្នាតាមរយៈសារព័ត៌មានយ៉ាងគគ្រឹកគគ្រេងឱ្យអ្នកតាមដានបានតភាគស្ទើរាល់ថ្ងៃ ក្រោយមកទើបរឿងរ៉ាវអាស្រូវនេះបានស្ងប់ស្ងាត់ទៅវិញ។ កាលណោះមិនថា Pinky ទៅចូលរួមក្នុងកម្មវិធីមួយណានោះឡើយ តែងតែត្រូវអ្នកសារព័ត៌មានសួរពីទំនាក់ទំនងនិងភាពស្និតស្នាលរវាងនាងនិងបុរសឈ្មោះ Peg នោះរហូត។
ក្រោយរឿងអាស្រូវដណ្ដើមប្ដីគេស្ងប់ស្ងាត់ វត្តមាន Pinky នៅក្នុងពិភពសិល្បៈថៃក៏លែងឃើញនាងជាបន្តទៀត ដោយតារាស្រីរូបនេះបាននិរទេសខ្លួនទៅដល់ប្រទេសឥណ្ឌាហើយសម្ដែងរឿងនោះទីនោះ។ បន្ទាប់ពីនោះមួយរយៈមហាជនបានចាប់អារម្មណ៍ឈ្មោះរបស់ Pinky ម្ដងទៀត ដោយសារតែនាងប្រកាសដំណឹងរៀបការជាមួយនឹងអ្នកជំនួញល្បីឈ្មោះម្នាក់។ កាលណោះមនុស្សជាច្រើនចង់ដឹងថាតើ Pinky និងកំលោះ Hi-So រូបនេះស្គាល់គ្នាពីពេលណា ហើយចាប់ផ្ដើមស្រលាញ់គ្នាពីពេលណា? យ៉ាងណាមិញជីវិតរបស់ តារាស្រីដែលជួបតែរឿងបណ្ដាលឱ្យខូចកេរ្តិ៍ឈ្មោះនេះហាក់ដូចជាល្អប្រសើរឡើងវិញ ដោយនាងបានចាកចេញពីសិល្បៈទៅរស់នៅជាមួយស្វាមី។ ក្រោយមកស្រាប់តែលេចព័ត៌មានថានាងបានបែកផ្លូវគ្នាជាមួយស្វាមីដែលមានឈ្មោះថា ផេតនោះហើយ ព្រមទាំងត្រលប់មកប្រឡូកក្នុងរង្វង់សិល្បៈសារជាថ្មី ដែលធ្វើឱ្យមានការចាប់អារម្មណ៍ពីអ្នកគាំទ្រមិនតិចនោះទេ។
ជីវិតថ្មីក្នុងវិថីសិល្បៈរបស់ Pinky លើកនេះ ហាក់ដូចជាមានភាពវិជ្ជមានច្រើនជាងមុនព្រោះនាងបានផ្សះផ្សារជាមួយនឹងតារារៀមច្បង Thanya ដែលធ្លាប់មានដំណឹងដណ្ដើមប្ដីគ្នានោះហើយត្រលប់មករួមការងារជាមួយគ្នាធម្មតា ដែលធ្វើឱ្យសាធារណមតិយល់ឃើញថាជីវិតរបស់នាងតទៅថ្ងៃមុខនឹងមានភាពល្អប្រសើរឡើងវិញហើយ។
ប៉ុន្តែជាអកុសលស្រាប់តែលេចដំណឹងនាងត្រូវប៉ូលិសថៃចាប់ខ្លួននិងបញ្ជូនទៅឃុំខ្លួននៅពន្ធនាគារពាក់ព័ន្ធករណីបោកប្រាស់តាមអនឡាញទៅវិញ។
ប្រភព thairath,tnews