ពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២២ នឹងចាប់ដំណើរទៅថ្ងៃទី១៥ ខែតុលា ឆ្នាំ២០២២ តទៅ ដោយមានក្រុមបាល់ទះជាសមាជិកទាំង១១ក្រុម ដើម្បីដណ្តើមជើងឯកប្រចាំឆ្នាំ។
ក្រុមទាំង១១ បានចាប់ឆ្នោតបែងចែកជា៤ពូល ៖
ពូល A៖ រដ្ឋបាលរាជធានីភ្នំពេញ, សមាគមបាល់ទះវិសាខា, ស្នងការដ្ឋាននគរបាលខេត្តបាត់ដំបង
ពូល B៖ បញ្ជាការដ្ឋានកងអង្គរក្ស, ស្នងការដ្ឋាននគរបាលខេត្តត្បូងឃ្មុំ, ស្នងការនគរបាលខេត្តសៀមរាប
ពូល C៖ ក្លិបកងពលធំអន្តរាគមន៍លេខ៣, ក្លិបកូននាគឧត្តរ, ស្នងការដ្ឋាននគរបាលខេត្តព្រះសីហនុ
ពូល D៖ សមាគមបាល់ទះក្រសួងមហាផ្ទៃ, ស្នងការដ្ឋាននគរបាលខេត្តស្វាយរៀង
សម្រាប់កម្មវិធីប្រកួតសរុប សូមចុះមើលនៅទីនេះ…
លោក តែន ឡន អគ្គលេខាធិការរងសហព័ន្ធកីឡាបាល់ទះកម្ពុជា បញ្ជាក់ថាក្រុមដែលមានឈ្មោះចូលរួមនេះមាន ៥ក្រុម (បានពីការអញ្ជើញ) និង៦ក្រុមដែលឡើងមកពីពានរង្វាន់សម្តេចក្រឡាហោម កន្លងទៅ។ ជាដំបូងនេះក្រុមដែលចូលរួមទាំង១១នេះត្រូវបែងចែកជា៤ពូល ប្រកួតវិលជុំ១ជើងសន្សំពិន្ទុ ហើយក្រុមលេខ១និងលេខ២តាមពូលនីមួយៗ មានឈ្មោះឡើងទៅប្រកួតវគ្គ៨ក្រុមចុងក្រោយ ដែលការប្រកួតវិលជុំ ហើយក្រុមដែលឈ្នះ មានឈ្មោះបន្តកៅអីឡើងទៅវគ្គពាក់កណ្ដាលផ្ដាច់ព្រ័ត្រនិងផ្ដាច់ព្រ័ត្រ។
តាមគម្រោងការប្រកួតដណ្តើមពានរង្វាន់សម្តេចតេជោ ហ៊ុន សែន នេះនឹងរៀបចំប្រកួតពីថ្ងៃ ១៥ ដល់ថ្ងៃទី៣០ខែតុលា ឆ្នាំ២០២២ នៅកីឡដ្ឋានព្រីនស៍ (ម្តុំហ្រ្គេនភ្នំពេញ)។ សម្រាប់ក្រុមជ័យលាភីវិញនឹងទទួលបានដូចជា៖
–ក្រុមជើងឯក៖ ពានរង្វាន់ធំ១ មេដាយមាសម្នាក់១ អមដោយថវិកា១ម៉ឺនដុល្លារ
–ជើងឯករង៖ មេដាយប្រាក់ម្នាក់១ អមដោយថវិកា៥ពាន់ដុល្លារ
–លេខ៣៖ មេដាយសំរឹទ្ធិ ម្នាក់១ អមដោយថវិកា៣ពាន់ដុល្លារ
–លេខ៤៖ ថវិកា ២ពាន់ដុល្លារ
អ្វីដែលពិសេសថែមទៀតនោះក្នុងការប្រកួតពានរង្វាន់បាល់ទះសម្តេចតេជោ ហ៊ុន សែន ឆ្នាំ២០២២ នេះ ក៏មានការប្រកួតមិត្តភាពអន្តរជាតិចំនួន២គូដែរ ដោយក្នុងនោះ៖
-១៥ តុលា ២០២២ ក្រុមបាល់ទះជម្រើសជាតិកម្ពុជា ប៉ះ សិង្ហបុរី វេលាម៉ោង៧យប់
-២០ តុលា ២០២២ ក្រុមបាល់ទះជម្រើសជាតិកម្ពុជា ប៉ះ គុយបា វេលាម៉ោង៧យប់
សម្រាប់ប្រកួតបើកឆាកនៅថ្ងៃទី១៥ ខែតុលា ឆ្នាំ២០២២ នេះមាន៖
-ម៉ោង៥ល្ងាច បញ្ជាការដ្ឋានកងអង្គរក្ស ប៉ះ ស្នងការដ្ឋាននគរបាលខេត្តត្បូងឃ្មុំ
-ម៉ោង ៧យប់ ក្រុមបាល់ទះជម្រើសជាតិកម្ពុជា ប៉ះ ជម្រើសជាតិសិង្ហបុរី
