ពានរង្វាន់បាល់ទាត់ UEFA Euro 2020 បានប្រកួតបើកឆាកដំបូងនៅយប់ថ្ងៃសុក្រ ទី១១ ខែមិថុនា ឆ្នាំ២០២១ ថ្មីៗនេះខណៈក្រុមបាល់ទាត់ជម្រើសជាតិអ៊ីតាលី បានរកឃើញជ័យជម្នះបានមុនគេ ស្របពេលក្រុមបាល់ទាត់ជម្រើសជាតិស៊ុយអែត បានផ្លាស់ប្តូរសមាសភាពកីឡាកររហូតដល់ទៅ៦នាក់ ដោយសារកីឡាករចាស់ៗមានវិជ្ជមានជំងឺកូវីដ-១៩។
ក្រុមអ៊ីតាលី បានយកឈ្នះលើទួរគី ដោយលទ្ធផល ៣ទល់០ លើទីលានកីឡដ្ឋាន Stadio Olimpico ក្នុងទីក្រុងរ៉ូម ក្រោមក្រសែភ្នែកទស្សនិកជនប្រមាណ១២,៩១៦នាក់ ដែលកាត់សេចក្តីដោយអាជ្ញាកណ្ដាលជនជាតិហុល្លង់។
ដោយឡែកសារព័ត៌មាន Nordstjernan បានលើកឡើងថាបញ្ជាក់ថាក្រុមជម្រើសជាតិស៊ុយអែត បានកោះហៅកីឡាករបម្រុងបន្ថែមនៅថ្ងៃព្រសហ្បត្តិ៍សប្ដាហ៍នេះដើម្បីចូលក្រុមហ្វឹកហាត់ ខណៈសមាជិកក្រុមមួយចំនួនបានរកឃើញវិជ្ជមានជំងឺកូវីដ-១៩ មុនការប្រកួតចាប់ផ្ដើមតែប៉ុន្មានថ្ងៃប៉ុណ្ណោះ ពេលធ្វើដំណើរទៅជួបក្រុមគោជល់អេស្ប៉ាញ នៅថ្ងៃទី១៤ ខែមិថុនា ឆ្នាំ២០២១ ខាងមុខនេះលើទីលានកីឡដ្ឋាន La Cartuja ក្នុងទីក្រុង Seville។
អត្ថបទពាក់ព័ន្ធ៖អាល្លឺម៉ង់ តែងតាំងគ្រូ Bayern Munich ត្រៀមប៉ះបារាំង និងព័រទុយហ្គាល់ នៅ EURO 2020
កីឡាករ២នាក់បានរកឃើញវិជ្ជមានជំងឺកូវីដ-១៩ កាលពីថ្ងៃព្រហស្បតិ៍ មានកីឡាករ Dejan Kulusevski និង Mattias Svanberg ត្រូវដាក់នៅដាច់ដោយឡែក ខណៈកីឡាករ Isaac Kiese Thelin, Jesper Karlsson, Joakim Nilsson, Jacob Rinne, Mattias Johansson និង Niclas Hult ត្រូវបានកោះហៅបន្ថែមពីលើបញ្ជីកីឡាករ២៤នាក់ដែលមានស្រាប់ ក្រោមការដឹកនាំពីសំណាក់គ្រូបង្វឹកឈុត U-21 លោក Poya Asbaghi។
ចំណែកកម្មវិធីប្រកួត UEFA Euro 2020 នៅថ្ងៃសៅរ៍ នេះមាន៖
-វ៉ែល Vs ស្វីស ម៉ោង៨យប់
-ដាណឺម៉ាក Vs ហ្វាំងឡង់ ម៉ោង១១យប់
-បែលហ្សិក Vs រុស្ស៊ី ម៉ោង២រំលងអាធ្រាត្រ
សូមបញ្ជាក់ថាពានរង្វាន់ UEFA Euro 2020 រៀបចំឡើងនៅ១១ប្រទេស ចាប់ពីថ្ងៃទី១១ខែមិថុនា ដល់ថ្ងៃទី១១ ខែកក្កដា ឆ្នាំ២០២១ មាន២៤ក្រុមចូលរួមចែកជា៦ពូល ក្នុង១ពូលមាន៤ក្រុម។ ពានរង្វាន់នេះបង្កើតឡើងតាំងពីឆ្នាំ១៩៦០ ស្របពេលក្រុមអេស្ប៉ាញ និងអេស្ប៉ាញ ឈ្នះជើងឯកបានច្រើនជាងគេគឺរហូត៣ដងម្នាក់ ខណៈក្រុមព័រទុយហ្គាល់ ជាក្រុមជើងឯកឆ្នាំចាស់៕
