វីរកីឡាការិនី ខាន់ ចេសា (Khan Jessa) នឹងប្រកួតជាមួយកីឡាការិនីអាមេរិក Kaori Hernandez នៅថ្ងៃសុក្រ ទី១៨ ខែវិច្ឆិកានេះ នៅសហរដ្ឋអាមេរិកក្នុងព្រឹត្តិការណ៍ IBJJF Absolute Grand Prix 2022។
ពោលគឺ១៦ថ្ងៃគត់បន្ទាប់ពីយកឈ្នះកីឡាការិនីអេស្ប៉ាញ Matthew Martin Naiomi Anaiansi នៅវគ្គផ្តាច់ព្រ័ត្រ លើវិញ្ញាសាជឺជីតស៊ូ (Newaza) ទម្ងន់ក្រោម៥២គីឡូក្រាម ក្នុងព្រឹត្តិការណ៍ប្រកួតពានរង្វាន់កីឡាជឺជីតស៊ូជើងឯកពិភពលោក JU-JITSU WORLD CHAMPIONSHIP 2022 នៅទីក្រុងអាប៊ុយដាប៊ី ប្រទេសអេមីរ៉ាតអារ៉ាប់រួម។
ការប្រកួតនេះ រៀបចំជាពិសេសដោយសហព័ន្ធជឺជីតស៊ូពិភពលោក ពោលគឺជាគូពិសេសលំដាប់ទី៤នៃកម្មវិធី ដោយត្រូវបានគេដាក់ឈ្មោះថា «Super Fight»។
កីឡាការិនីអាមេរិក Kaori Hernandez មានបទពិសោធច្រើន និងប្រឡូកក្នុងអាជីពជឺជីតស៊ូច្រើនឆ្នាំជាង ប៉ុន្តែមួយរយៈពេលចុងក្រោយនេះ នាងមិនសូវបានចេញប្រកួតទេ ហើយក៏មានចំណាត់ថ្នាក់ពិភពលោកទាបជាងកីឡាការិនីកម្ពុជាផងដែរ។
គួរដឹងថា ខាន់ ចេសា មានឪពុកជាជនជាតិខ្មែរ និងម្ដាយឈ្មោះ April Marie Khan ជនជាតិម៉ិកស៊ិក-អាមេរិក នៅក្នុងរយៈពេលជាង ១០ឆ្នាំ នៃការចាប់អាជីពកីឡាជឺជិតស៊ូ នាងធ្លាប់ឈ្នះមេដាយ និងពានរង្វាន់ស្ទើររាប់ភ្លេច ទាំងការប្រកួតតំបន់ អាមេរិក អឺរ៉ុប និងពិភពលោក។
កីឡាការិនីខ្មែរ-អាមេរិក ខាន់ ចេសា (Jessa Khan) គឺជាម្ចាស់មេដាយមាសនៅ Asian Games 2018 នៅទីក្រុង Jakarta ប្រទេសឥណ្ឌូនេស៊ី និង SEA Games 2019 នៅទីក្រុង Manila ប្រទេសហ្វីលីពីន ត្រូវបានចាត់ទុកថា ជាកីឡាករដែលកម្ពុជារំពឹងខ្ពស់ក្នុងការឈ្នះមេដាយមាសស៊ីហ្គេម SEA Games លើកទី៣២ ដែលប្រទេសកម្ពុជាធ្វើជាម្ចាស់ផ្ទះ បន្ទាប់ខកចិត្តនៅប្រទេសវៀតណាម ដោយសារមិនអាចឆ្លងផុតដំណាក់កាលថ្លឹងទម្ងន់៕
