ទីភ្នាក់ងារឧតុនិយមរបស់ប្រទេសនេះបាននិយាយថា ព្យុះទីហ្វុងដ៏ខ្លាំងមួយបានបោកបក់ឆ្ពោះទៅភាគខាងជើងប្រទេសហ្វីលីពីន នាថ្ងៃអង្គារ សប្ដាហ៍នេះ ជាហេតុជំរុញឲ្យមានការបញ្ជាការជម្លៀសប្រជាជនដែលរស់នៅសហគមន៍តាមឆ្នេរសមុទ្រដែលគេរំពឹងថា នឹងទទួលរងនូវឥទ្ធិពលនៃព្យុះដ៏ខ្លាំងក្លានេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី២៥ ខែកក្កដ ឆ្នាំ២០២៣។
ទីភ្នាក់ងារនេះបាននិយាយថា ព្យុះទីហ្វុង Doksuri កំពុងប្រមូលផ្ដុំកម្លាំងខ្យល់ក្នុងល្បឿនអតិបរមា ១៨៥គីឡូម៉ែត្រក្នុងមួយម៉ោង ខណៈវាបានធ្វើដំណើរឆ្ពោះទៅកាន់ប្រជុំកោះចំនួន៣ នៅចុងភាគខាងជើងនៃកោះ Luzon របស់ប្រទេសហ្វីលីពីន។
ព្យុះដែលត្រូវបានគេហៅថា «Egay» ឬ «Doksuri» នៅក្នុងប្រទេសហ្វីលីពីន ត្រូវបានគេរំពឹងថានឹងបោកបក់ ឬឆ្លងកាត់យ៉ាងកៀកខ្លាំងទៅកាន់ប្រជុំកោះ Babuyan ឬខេត្ត Cagayan នៅភាគឦសាន នារសៀលថ្ងៃពុធ សប្ដាហ៍នេះ។ បន្ទាប់មក វានឹងវាយលុកទៅតៃវ៉ាន់ និងភាគខាងកើតប្រទេសចិន។
ព្យុះនេះត្រូវបានគេរំពឹងថា នឹងធ្វើឲ្យមានភ្លៀងធ្លាក់ ហើយនាំមកនូវទឹកភ្លៀងកម្រិតច្រើនជាង២០០មីលីម៉ែត្រ នៅលើកោះ Babuyan និងផ្នែកភាគខាងជើងនៃខេត្ត Cagayan, ខេត្ត Apayao និងខេត្ត Ilocos Norte នៅថ្ងៃអង្គារនេះ។ កោះចំនួន៣ ក្នុងចំណោមកោះទាំង៥ នៅទីប្រជុំកោះ Babuyan មានប្រជាជនរស់នៅសរុបប្រហែល ២០,០០០ នាក់។
ទន្ទឹមនោះ មន្ត្រីគ្រោះមហន្តរាយក្នុងតំបន់ លោក Charles Castillejos បាននិយាយថា សហគមន៍ឆ្នេរសមុទ្រនៅលើកោះត្រូវបានបញ្ជាឲ្យចាកចេញពីផ្ទះរបស់ពួកគេ ខណៈដែលអ្នកនេសាទត្រូវបានប្រាប់ឲ្យយកទូករបស់ពួកគេចេញពីផ្ទៃទឹក ដើម្បីបញ្ជៀសគ្រោះថ្នាក់ ឬ ការខូចខាតធ្ងន់ធ្ងរ។ យ៉ាងណាក៏ដោយ នៅមានប្រជាជនមួយចំនួននៅមិនស្ដាប់តាមការណែនាំរបស់អាជ្ញាធរពាក់ព័ន្ធទេ។
ជាមួយគ្នា ទីភ្នាក់ងាឧតុនិយមបានព្រមានថា ខ្យល់ព្យុះនេះអាចមានកម្ពស់លើសពី ៣ម៉ែត្រ ហើយអាចវាយប្រហារតំបន់ទំនាបមួយចំនួនផងដែរ។ ភ្លៀងធ្លាក់ខ្លាំងត្រូវបានគេរំពឹងថា នឹងកើតមានពាសពេញខេត្តភាគខាងជើងនៃតំបន់ភ្នំ ក្នុងរយៈពេលប៉ុន្មានថ្ងៃខាងមុខនេះ ដោយទំនងជាមានការបាក់ដីថែមទៀត។
ពាក់ព័ន្ធនឹងបញ្ហានេះ អ្នកវិទ្យាសាស្ត្របានព្រមានថា ព្យុះបែបនេះដែលសម្លាប់សត្វពាហនៈ និងបំផ្លាញហេដ្ឋារចនាសម្ព័ន្ធសំខាន់ៗផងដែរ ហើយវាកាន់តែមានឥទ្ធិពលខ្លាំងឡើង នៅពេលដែលពិភពលោកប្រែប្រួលអាកាសធាតុញឹកញាប់ ជាពិសេសការឡើងកំដៅកាន់តែក្តៅ។
សូមជម្រាបថា ប្រទេសហ្វីលីពីនរងការវាយប្រហារដោយព្យុះធំៗ ចំនួន២០ ជារៀងរាល់ឆ្នាំ ដែលសម្លាប់មនុស្សរាប់រយនាក់ និងបណ្ដាលឲ្យតំបន់មួយចំនួនធំស្ថិតនៅក្នុងភាពក្រីក្រជារៀងរហូត៕
