ប៉ូលិសក្នុងប្រទេសថៃ កាលពីថ្ងៃច័ន្ទ បានឆ្មក់ចូលផ្ទះរបស់អគ្គស្នងការរងនគរបាលជាតិមួយរូប នៅទីក្រុងបាងកក ដែលជាសកម្មភាពមួយត្រូវបានគេតវ៉ាថា មានគោលបំណងបង្ខូចកិត្តិយស ដោយសារតែ “នយោបាយនៅក្នុងស្ថាប័នប៉ូលីសថៃ»។ នេះបើយោងតាមការចេញផ្សាយដោយសារព័ត៌មាន AP News នាថ្ងៃទី២៥ ខែកញ្ញា ឆ្នាំ២០២៣។
ឧត្តមសេនីយ៍ទោ ស៊ូរ៉ាឆាត ហាក់ផាន (Surachate Hakparn) ដែលមានរហ័សនាមថា Big Joke គឺជាអ្នកប្រជែងយកតំណែងអគ្គស្នងការនគរបាលជាតិថៃ ១រូប ក្នុងចំណោមអគ្គស្នងការរងនគរបាលជាតិទាំង៤ របស់ប្រទេស ដែលគេរំពឹងថា នឹងស្វែងរកអ្នកណាម្នាក់មកកាន់តំណែងនេះក្នុងពេលឆាប់ៗ។
លោក ទ្រីរុង ភីផាន (Trairong Phiwpan) មេបញ្ជាការនៃការិយាល័យកិច្ចការច្បាប់ និងវិវាទរបស់កងកម្លាំង បាននិយាយថា ការឆែកឆេរនៅផ្ទះដែលលោក Surachate គឺជាផ្នែកមួយនៃការស៊ើបអង្កេត បន្ទាប់ពីមានការបង្ក្រាបបណ្តាញដ៏ធំនៃប្រតិបត្តិការល្បែងស៊ីសងខុសច្បាប់តាមអ៉ីនធឺណិត។ កាលពីខែមិថុនា និងខែកក្កដា មនុស្ស ៤នាក់ត្រូវបានចាប់ខ្លួន ពាក់ព័ន្ធនឹងករណីនេះ។
មេបញ្ជាការនៃការិយាល័យកិច្ចការច្បាប់ និងវិវាទរបស់កងកម្លាំង រូបនេះបន្តថា ដីកាចាប់ខ្លួនត្រូវបានចេញសម្រាប់តាមចាប់មនុស្ស ២៣ នាក់ផ្សេងទៀត រួមមានមន្ត្រីប៉ូលិស ៨នាក់ដែលត្រូវបានចាប់ខ្លួនកាលពីថ្ងៃចន្ទ ដែលលោក Surachat ទទួលស្គាល់ថា ជាអ្នកនៅក្រោមបង្គាប់របស់លោក។ ប៉ុន្ដែលោក Surachat ខ្លួនឯងមិនត្រូវបានគេដាក់ឈ្មោះក្នុងដីកា និងមិនត្រូវបានចាប់ខ្លួនទេ។
លោក Trairong បន្ថែមថា មន្ត្រីដែលត្រូវបានចាប់ខ្លួនមួយចំនួន ត្រូវបានចោទប្រកាន់ថា មានជាប់ពាក់ព័ន្ធក្នុង «ការត្រួតត្រា និងគ្រប់គ្រង» គេហទំព័រទាំង១២ ដែលពាក់ព័ន្ធនឹងបណ្តាញល្បែងស៊ីសងខុសច្បាប់ដែលគេចោទប្រកាន់។
លោកបាននិយាយថា មនុស្សសរុបចំនួន ១៧នាក់ត្រូវបានចាប់ខ្លួននៅពេលការវាយឆ្មក់ក្នុងពេលដំណាលគ្នាកាលពីថ្ងៃចន្ទ នៅទីតាំងចំនួន៣០ នៅទូទាំងប្រទេស។
ក្រោយពីមានការឆ្មក់ចូលឆែកឆេរផ្ទះរួច ឧត្តសេនីយ៍ទោ Surachat បានប្រាប់អ្នកសារព័ត៌មានថា លោកគ្មានកំហុសអ្វីទាំងអស់។ លោកបានប្រកាសថា លោកជឿជាក់លើសមាជិកក្រុមរបស់លោក ប៉ុន្តែក៏បាននិយាយថា លោកនឹងមិនជួយអ្នកណាដែលត្រូវបានគេបង្ហាញថា បានជាប់ពាក់ព័ន្ធនឹងសកម្មភាពខុសច្បាប់នោះទេ។
នៅពេលសួរថា តើការឆែកឆេរផ្ទះរបស់លោកអាចពាក់ព័ន្ធនឹងការតែងតាំងអគ្គស្នងការនគរបាលជាតិថ្មីដែលជិតផុតអាណត្តិឬអត់នោះ លោក Surachate បានឆ្លើយថា «ខ្ញុំនឹងឲ្យអ្នកយកព័ត៌មានគិតដោយខ្លួនឯង អំពីពេលវេលានៃការវាយឆ្មក់បែបនេះ»។ លោក Surachat ក៏បាននិយាយដែរថា «លោកជឿថាដីកាដែលបានចុះមកឆែកឆេរនៅផ្ទះរបស់លោក គួរតែបានទទួលការបោកបញ្ឆោត។ ប្រហែលជាខ្ញុំបានធ្វើការលើករណីជាច្រើន ហើយវាអាចប៉ះពាល់ដល់មនុស្សជាច្រើននៅក្នុងសង្គម។ ដូច្នេះហើយ ថ្ងៃនេះខ្ញុំត្រូវទប់ទល់នឹងបញ្ហាបែបនេះ»។
បន្ទាប់ពីការឆ្មក់ចូលឆែកឆេរផ្ទះ វីដេអូមួយបានលេចចេញតាមប្រព័ន្ធអ៊ីនធឺណែត ដែលបង្ហាញពីលោក Surachat និងមន្ត្រីក្រោមឱវាទរបស់លោក កំពុងជប់លៀងជាមួយស្ត្រីម្នាក់ដែលត្រូវបានចាប់ខ្លួនកាលពីខែកក្កដា ជាជនសង្ស័យសំខាន់នៅក្នុងបណ្តាញល្បែងស៊ីសងខុសច្បាប់។
លោក Surachate បាននិយាយថា ព្រឹត្តិការណ៍នេះ គឺជាពិធីជប់លៀងដែលលោករៀបចំសម្រាប់ក្រុមរបស់លោក។ លោកបានអះអាងថា លោកមិនបានស្គាល់ស្ត្រីនោះទេ ហើយបាននិយាយថា លោកមិនអាចដឹងថា មនុស្សទាំងអស់ដែលចូលមកពិធីជប់លាង អាចនាំនរណាមកក្នុងពិធីជប់លៀងនោះទេ។
សូមជម្រាបថា លោក Surachate Hakparn មានរហស្សនាមថា «Big Joke» ត្រូវបានគេឃើញបង្ហាញខ្លួនជាញឹកញាប់តាមប្រព័ន្ធផ្សព្វផ្សាយ លោក Surachate គឺជាតារាដែលកំពុងរះក្នុងការិយាល័យប៉ូលីសអន្តោប្រវេសន៍ កាលពីឆ្នាំ២០១៨។លោកត្រូវបានគេដកចេញពីមុខតំណែង ហើយបានបាត់ខ្លួនជាបណ្តោះអាសន្នពីទិដ្ឋភាពសាធារណៈនៅឆ្នាំ២០១៩។ ក្រោយមក បានត្រលប់ទៅស្នងការនគរបាលជាតិវិញនៅឆ្នាំ២០២១ បន្ទាប់ពីលោក Prayuth Chan-ocha ដែលជាមេបញ្ជាការកងទ័ព បានឡើងកាន់អំណាចបន្ទាប់ពីធ្វើរដ្ឋប្រហារឆ្នាំ២០១៤ ដោយបានតែងតាំងលោក ជាទីប្រឹក្សាអគ្គស្នងការនគរបាល។ ក្រោយៗទៀត លោក Surachate បន្តឡើងឋានន្តរស័ក្តិជាបន្ដបន្ទាប់ រហូតក្លាយជាអគ្គស្នងការរងនគរបាល ជាតិ និងបានដឹកនាំ ឬ បង្រ្កាបសំណុំរឿងធំៗជាច្រើនករណី៕
