អភិបាលខេត្ត Suphan Buri បាននិយាយថា មនុស្ស ២៣នាក់បានស្លាប់បន្ទាប់ពីការផ្ទុះនៅរោងចក្រកាំជ្រួចមួយកន្លែង នៅភាគកណ្តាលប្រទេសថៃកាលពីថ្ងៃពុធ សប្ដាហ៍នេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃពុធ ទី១៧ ខែមករា ឆ្នាំ២០២៤។
រូបភាពដែលបានចែករំលែកដោយសេវាសង្គ្រោះក្នុងតំបន់ បានបង្ហាញឱ្យឃើញនូវកំទេចកំទីដែក រាយប៉ាយនៅលើដី និងមានផ្សែងខ្មៅយ៉ាងសន្ធោសន្ធៅ។
ការបំផ្ទុះបានកើតឡើងនៅម៉ោងប្រហែល ៣រសៀល ថ្ងៃទី១៧ ខែមករា នៅជិតទីប្រជុំជន Sala Khao ក្នុងខេត្ត Suphan Buri ភាគកណ្តាលប្រទេសថៃ។
លោក Nattapat Suwanpratep អភិបាលខេត្ត Suphan Buri បានប្រាប់ AFP ថា «យើងបានទទួលរបាយការណ៍ពីក្រុម EOD ថា មានអ្នកស្លាប់ចំនួន ២៣នាក់។ អំឡុងពេលកើតហេតុ ពុំមានការបញ្ជាក់ពីមូលហេតុដែលអាចបណ្តាលឱ្យមានការផ្ទុះនេះឡើយ ខណៈក្រុមមន្ត្រីកំពុងស៊ើបអង្កេត កំពុងស្វែងរកមូលហេតុដែលអាចបង្កឲ្យមានឧបទ្ទវហេតុនេះ។
លោក Nattapat បានបន្តថា ៖ «រោងចក្រនេះបានដំណើរការស្របច្បាប់ដោយមានអាជ្ញាប័ណ្ណត្រឹមត្រូវ។
ស្របពេលជាមួយគ្នានេះ លោកឧត្តមសេនីយ៍ឯក Naiyawat Phademchid បានប្រាប់ឱ្យដឹងថា នាយករដ្ឋមន្ត្រី Srettha Thavisin បច្ចុប្បន្នកំពុងនៅប្រទេសស្វីស សម្រាប់វេទិកាសេដ្ឋកិច្ចពិភពលោក ហើយលោកបានទទួលដំណឹងដ៏ក្រៀមក្រំនេះរួចហើយ។ ថ្វីត្បិតលោកជាប់បំពេញភារកិច្ចនៅក្រៅប្រទេសយ៉ាងណាក៏ដោយ ក៏លោក Srettha Thavisin បានចេញសេចក្ដីថ្លែងការណ៍មួយ សម្ដែងការសោកស្ដាយចំពោះគ្រួសារអ្នកស្លាប់ តាមរយៈបណ្ដាញសង្គមរបស់លោកផងដែរ។ លោកក៏បានបញ្ជាឲ្យមានការស៊ើបអង្កេតថា តើឧបទ្ទវហេតុនេះមានដំណើរការដោយខុសច្បាប់ដែរឬទេ រួមទាំងបញ្ជាមូលហេតុនៃឧបទ្ទវហេតុ។
ទន្ទឹមនោះ មន្ត្រីប៉ូលិសបាននិយាយថា តំបន់ជុំវិញមិនមានការខូចខាតទេ។ ប៉ូលីសបាននិយាយទៀតថា ក្រុមមន្ត្រីកំពុងបិទតំបន់ជុំវិញនោះ ហើយនឹងចាប់ផ្តើមកំណត់អត្តសញ្ញាណសាកសពនៅពេលស្ថានការណ៍មានស្ថិរភាព ដោយមិនបានបញ្ជាក់លម្អិតបន្ថែមពីអ្វីទៀតឡើយ៕