ប៉េកាំង៖ ប្រព័ន្ធផ្សព្វផ្សាយរដ្ឋចិន បាននិយាយនាថ្ងៃចន្ទ នេះថា មនុស្ស១១នាក់បាននឹងកំពុងបាត់ខ្លួន បន្ទាប់ពីព្យុះដ៏ខ្លាំងមួយបានវាយលុកភាគខាងត្បូងប្រទេសចិន ដោយមនុស្សរាប់ម៉ឺននាក់ត្រូវបានជម្លៀសទៅកាន់កន្លែងសុវត្ថិភាព។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី២២ ខែមេសា ឆ្នាំ២០២៤។
![](https://cdn.troryorng.com/wp-content/uploads/2024/04/27135920/image-1466.png)
ភ្លៀងធ្លាក់ខ្លាំងបានកើតមាននៅខេត្ត Guangdong ភាគខាងត្បូងអស់រយៈពេលជាច្រើនថ្ងៃមកហើយ ដោយទឹកទន្លេបានហក់ឡើងខ្ពស់គួរឱ្យព្រួយបារម្ភ និងបង្កើនការភ័យព្រួយថា អាចនឹងបង្កទៅជាគ្រោះទឹកជំនន់ធ្ងន់ធ្ងរ ដែលប្រព័ន្ធផ្សព្វផ្សាយរដ្ឋបាននិយាយថា អាចជាប្រភេទ ដែលគេបានជួបតែមួយដងក្នុងមួយសតវត្ស។
![](https://cdn.troryorng.com/wp-content/uploads/2024/04/27135919/image-1467-1024x683.png)
ទីភ្នាក់ងារព័ត៌មានរដ្ឋចិន Xinhua បាននិយាយដោយដកស្រង់ពីនាយកដ្ឋានគ្រប់គ្រងគ្រាអាសន្នក្នុងតំបន់ថា «មនុស្សសរុបចំនួន ១១នាក់បានបាត់ខ្លួន បន្ទាប់ពីភ្លៀងធ្លាក់ដ៏ខ្លាំង បានវាយប្រហារផ្នែកជាច្រើននៃខេត្ត Guangdong ក្នុងរយៈពេលប៉ុន្មានថ្ងៃថ្មីៗនេះ»។ ដោយបានបន្ថែមថា «មនុស្សជាង ៥៣,០០០ នាក់ ត្រូវបានផ្លាស់ប្តូរទីលំនៅទៅកាន់ទីទួលមានសុវត្ថិភាព នៅទូទាំងខេត្ត»។
ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអាទិត្យថា ក្នុងចំណោមនោះ មនុស្សជាង ៤៥,០០០នាក់ត្រូវបានជម្លៀសចេញពីទីក្រុង Qingyuan នៃខេត្ត Guangdong ស្ថិតនៅជាប់ច្រាំងទន្លេ Bei។
![](https://cdn.troryorng.com/wp-content/uploads/2024/04/27135918/image-1468.png)
ភ្លៀងធ្លាក់ខ្លាំងត្រូវបានគេរំពឹងថា នឹងបន្តនៅថ្ងៃចន្ទនេះ ដោយអាជ្ញាធរឧតុនិយមបានព្យាករណ៍ថា «ព្យុះផ្គររន្ទះ និងខ្យល់បក់ខ្លាំងនៅក្នុងដែនទឹកឆ្នេរសមុទ្រនៃខេត្ត Guangdong» ជាប់នឹងទីក្រុងសំខាន់ៗ រួមទាំងទីក្រុងហុងកុង និងទីក្រុង Shenzhen អាចរងផលប៉ះពាល់ដោយសារព្យុះភ្លៀងនេះ។
ខណៈមជ្ឈមណ្ឌលឧតុនិយមជាតិ បាននិយាយថា ខេត្តជិតខាងនៃខេត្ត Guangdong រួមទាំងផ្នែកខ្លះនៃខេត្ត ហ្វូចៀន (Fujian), ខេត្ត គួយចូវ (Guizhou) និងខេត្ត ក្វាងស៊ី (Guangxi) ក៏នឹងរងផលប៉ះពាល់ដោយព្យុះភ្លៀងនេះផងដែរ។
![](https://cdn.troryorng.com/wp-content/uploads/2024/04/27135918/image-1469.png)
ដោយឡែកប្រព័ន្ធផ្សព្វផ្សាយរដ្ឋបានរាយការណ៍ថា នៅទីក្រុង ជាំងហ្វាង (Jiangwan) មានមនុស្ស ៦នាក់បានរងរបួស និងមួយចំនួនទៀតបានជាប់នៅក្នុងការរអិលបាក់ដីដែលបណ្តាលមកពីភ្លៀងធ្លាក់ខ្លាំងកាលពីថ្ងៃអាទិត្យសប្ដាហ៍មុននេះ។
សូមជម្រាបថា ការប្រែប្រួលអាកាសធាតុមិនមែនជារឿងចម្លែកសម្រាប់ប្រទេសចិននោះទេ ប៉ុន្មានឆ្នាំចុងក្រោយនេះ គេបានឃើញប្រទេសនេះរងការវាយប្រហារដោយទឹកជំនន់ធ្ងន់ធ្ងរ បញ្ហាគ្រោះរាំងស្ងួត និងការឡើងកំដៅបំបែកកំណត់ត្រា។ បញ្ហាបម្រែបម្រួលអាកាសធាតុដែលជំរុញដោយឧស្ម័នផ្ទះកញ្ចក់ដែលបញ្ចេញដោយមនុស្ស ធ្វើឱ្យព្រឹត្តិការណ៍អាកាសធាតុកាន់តែធ្ងន់ធ្ងរកើតមានកាន់តែញឹកញាប់ និងខ្លាំងឡើង ហើយប្រទេសចិន គឺជាប្រទេសដែលបញ្ចេញឧស្ម័នដ៏ធំបំផុតរបស់ពិភពលោក៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)