ប៉េកាំង៖ យោធាតៃវ៉ាន់ បានចល័តកម្លាំងរបស់ខ្លួន ហើយបាននិយាយថា ខ្លួនមានទំនុកចិត្តថា ខ្លួនអាចការពារកោះនេះ បន្ទាប់ពីចិនបានចាប់ផ្តើមសមយុទ្ធ «ដាក់ទណ្ឌកម្ម» រយៈពេល២ថ្ងៃ ជុំវិញកោះតៃវ៉ាន់ នាថ្ងៃព្រហស្បតិ៍ សប្ដាហ៍នេះ ក្នុងអ្វីដែលចិនបាននិយាយថា ជាការឆ្លើយតបទៅនឹង «ទង្វើផ្តាច់ខ្លួន»។ នេះបើយោងតាមការចេញផ្សាយដោយសារព័ត៌មាន CNA នាថ្ងៃព្រហស្បតិ៍ ទី២៣ ខែឧសភា ឆ្នាំ២០២៤។
![](https://cdn.troryorng.com/wp-content/uploads/2024/05/27123427/image-1955.png)
សមយុទ្ធនៅច្រកសមុទ្រតៃវ៉ាន់ និងជុំវិញប្រជុំកោះដែលគ្រប់គ្រងដោយតៃវ៉ាន់ ដែលស្ថិតនៅជាប់នឹងឆ្នេរសមុទ្រចិន បានកើតឡើងត្រឹមតែ ៣ថ្ងៃ បន្ទាប់ពីលោក Lai Ching-te ចូលកាន់តំណែងជាប្រធានាធិបតីថ្មីរបស់តៃវ៉ាន់ ដែលទីក្រុងប៉េកាំង ចាត់ទុកថាជា «អ្នកបំបែកខ្លួន ដ៏គ្រោះថ្នាក់»។
ប្រទេសចិន ដែលចាត់ទុកកោះតៃវ៉ាន់ជាទឹកដីរបស់ខ្លួន បានតាមឃ្លាំស្ដាប់សុន្ទរកថាបើក ក្នុងថ្ងៃឡើងតំណែងរបស់លោកកាលពីថ្ងៃចន្ទ សប្ដាហ៍នេះ ដែលក្នុងនោះលោកបានអំពាវនាវឱ្យប្រទេសចិន បញ្ឈប់ការគំរាមកំហែងរបស់ខ្លួន ហើយកាលពីថ្ងៃអង្គារ រដ្ឋមន្ត្រីការបរទេសចិន លោក Wang Yi បានហៅលោក Lai ថា «គួរឱ្យអាម៉ាស់»។
![](https://cdn.troryorng.com/wp-content/uploads/2024/05/27123426/image-1956.png)
![](https://cdn.troryorng.com/wp-content/uploads/2024/05/27123426/image-1957.png)
បញ្ជាការភាគខាងកើតនៃកងទ័ពរំដោះប្រជាជនចិន (PLA) បាននិយាយថា ខ្លួនបានចាប់ផ្តើមសមយុទ្ធយោធារួមគ្នា ដែលមានការចូលរួមពីកងទ័ព កងទ័ពជើងទឹក កងទ័ពអាកាស និងកងកម្លាំងរ៉ុក្កែត នៅក្នុងតំបន់ជុំវិញកោះតៃវ៉ាន់ នៅម៉ោង ៧:៤៥នាទីព្រឹក (ម៉ោងក្នុងស្រុក)។
បញ្ជាការនេះបាននិយាយនៅក្នុងសេចក្តីថ្លែងការណ៍មួយថា «សមយុទ្ធកំពុងធ្វើឡើងនៅច្រកសមុទ្រតៃវ៉ាន់ ភាគខាងជើង ភាគខាងត្បូង និងខាងកើតនៃកោះតៃវ៉ាន់ ក៏ដូចជាតំបន់ប្រជុំកោះ Kinmen, Matsu, Wuqiu និងកោះ Dongyin ដែលគ្រប់គ្រងដោយតៃវ៉ាន់ផងដែរ»។
![](https://cdn.troryorng.com/wp-content/uploads/2024/05/27123425/image-1958-1024x683.png)
ខណៈក្រសួងការពារជាតិតៃវ៉ាន់ បានថ្កោលទោសសមយុទ្ធនេះ ដោយបាននិយាយថា ខ្លួនបានបញ្ជូនកងកម្លាំងទៅកាន់តំបន់ជុំវិញកោះនេះ ហើយមានទំនុកចិត្តថា វាអាចការពារទឹកដីរបស់ខ្លួន។
ក្រសួងបាននិយាយថា «ការចាប់ផ្តើមសមយុទ្ធយោធាក្នុងឱកាសនេះ មិនត្រឹមតែមិនរួមចំណែកដល់សន្តិភាព និងស្ថិរភាពនៃច្រកសមុទ្រតៃវ៉ាន់ប៉ុណ្ណោះទេ វាថែមទាំងបង្ហាញពីចិត្តគំនិតយោធានិយមរបស់ចិនផងដែរ»។
![](https://cdn.troryorng.com/wp-content/uploads/2024/05/27123424/image-1959.png)
![](https://cdn.troryorng.com/wp-content/uploads/2024/05/27123422/image-1961.png)
មន្ត្រីជាន់ខ្ពស់តៃវ៉ាន់ម្នាក់ ដែលនិយាយដោយមិនបញ្ចេញឈ្មោះបានប្រាប់ទីភ្នាក់ងាររ៉យទ័រថា «សមយុទ្ធនេះ គឺជាផ្នែកមួយនៃសេណារីយ៉ូ ដែលតៃវ៉ាន់បានគិតទុកជាមុន ហើយថា រដ្ឋាភិបាលរបស់កោះនេះ បានដឹងទុកជាមុននៃចលនាយោធារបស់ចិន»។
យោធាចិនបាននិយាយថា សមយុទ្ធនេះផ្តោតទៅលើការល្បាតត្រៀមប្រយុទ្ធតាមផ្លូវអាកាសរួមគ្នា ការវាយប្រហារយ៉ាងជាក់លាក់លើគោលដៅសំខាន់ៗ និងប្រតិបត្តិការរួមបញ្ចូលគ្នាទាំងក្នុង និងក្រៅខ្សែសង្វាក់កោះ ដើម្បីសាកល្បង «សមត្ថភាពប្រយុទ្ធពិតប្រាកដរួម» នៃកងកម្លាំងយោធាចិន។
![](https://cdn.troryorng.com/wp-content/uploads/2024/05/27123423/image-1960-1024x592.png)
ជាមួយគ្នាបញ្ជាការភាគខាងកើតនៃកងទ័ពរំដោះប្រជាជនចិន នោះបានបន្ថែមថា «នេះក៏ជាការដាក់ទណ្ឌកម្មយ៉ាងខ្លាំងក្លា ចំពោះទង្វើផ្តាច់ខ្លួនរបស់កងកម្លាំងឯករាជ្យតៃវ៉ាន់ និងការព្រមានយ៉ាងម៉ឺងម៉ាត់ប្រឆាំងនឹងការជ្រៀតជ្រែក និងការបង្កហេតុដោយកងកម្លាំងខាងក្រៅ»។
សូមជម្រាបថា សមយុទ្ធនេះ បានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីលោក Lai Ching-te បានស្បថចូលកាន់តំណែងជាប្រធានាធិបតីថ្មី បន្ទាប់ពីអតីតប្រធានាធិបតីកោះតៃវ៉ាន់ លោកស្រី Tsia Ing-wen និងបានអំពាវនាវឱ្យទីក្រុងប៉េកាំង បញ្ឈប់ការគំរាមកំហែងរបស់ខ្លួន។ យ៉ាងណាម៉ិញ លោក Lai និយាយថា មានតែប្រជាជនតៃវ៉ាន់ទេ ដែលអាចសម្រេចចិត្តអនាគតរបស់ពួកគេ ហើយបដិសេធការទាមទារអធិបតេយ្យភាពរបស់ទីក្រុងប៉េកាំង៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)