នៅរសៀលថ្ងៃទី៣១ ខែឧសភា ឆ្នាំ២០២៤ អ្នកឧកញ៉ា ឡេង ណាវ៉ាត្រា អគ្គនាយកបុរី ឡេង ណាវ៉ាត្រា បានបង្ហាញពីវឌ្ឍនភាពជាវិជ្ជមានទាំង ៤ជម្រើសជូនដល់អតិថិជនរបស់បុរី ឡេង ណាវ៉ាត្រ។
យោងតាមការបញ្ជាក់លើបណ្ដាញទំនាក់ទំនងសង្គមហ្វេសប៊ុករបស់អ្នកឧកញ៉ា ឡេង ណាវ៉ាត្រា កាលពីរសៀលថ្ងៃទី៣១ ខែឧសភាកន្លងទៅ ដោយបានជម្រាបនិងជូនដំណឹងដល់អតិថិជនរបស់ខ្លួនស្ដីពីវឌ្ឍនភាពទាំង៤ជម្រើស ដែលក្រុមហ៊ុនបានដាក់ចេញដូចតទៅ៖
១. ក្រុមហ៊ុនបានដោះដូរផ្ទះជូនអតិថិជន ប្ដូរពីផ្ទះយកជាដី មកដល់ពេលបច្ចុប្បន្នសរុបបានចំនួន ១៦៣ផ្ទះ។
២. ចំពោះអតិថិជនបានមកដាក់ពាក្យជាមួយក្រសួង ដើម្បីផ្ដល់ប័ណ្ណកម្មសិទ្ធិប្លង់រឹង រយៈ៤ថ្ងៃ បានចំនួន ៥៩៧ផ្ទះ។
៣. ក្រុមហ៊ុនមានគោលដៅនិងបញ្ចប់ផ្ទះសាងសង់ជិតរួចរាល់ ជូនអតិថិជនបន្តបន្ទាប់ទៀត ក្នុងចន្លោះពី
១ខែ ទៅ ៣ខែខាងមុខនេះ អាចប្រគល់ជូនអតិថិជនចន្លោះពី ១០០០ផ្ទះ ទៅ ២០០០ផ្ទះបន្ថែមទៀត ។
៤. ក្រុមហ៊ុនបានប្រគល់ផ្ទះបន្ថែម ពីថ្ងៃទី១ ដល់ថ្ងៃទី៣០ ខែឧសភា ចំនួន ៣០ផ្ទះ។
សូមរំលឹកឡើងវិញថា កាលពីថ្ងៃទី២១ ខែឧសភា ឆ្នាំ២០២៤ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីជូនដំណឹងជម្រាបជូនដល់ លោក លោកស្រី ដែលជាអតិថិជនរបស់ បុរី ឡេង ណាវ៉ាត្រា ផ្លូវជាតិលេខ៦អា ដែលបានបង់ប្រាក់ថ្លៃលក់ទិញដីឡូតិ៍និង/ផ្ទះគ្រប់ចំនួន (១០០%) អាចអញ្ជើញទៅដាក់ពាក្យស្នើសុំចុះបញ្ជីអំពីការផ្ទេរកម្មសិទ្ធិនៅទីស្តីការក្រសួងរៀបចំដែនដី ចាប់ពីថ្ងៃទី២៧ ខែឧសភា ឆ្នាំ២០២៤ នៅរៀងរាល់ម៉ោងធ្វើការ។ ចំពោះករណីអតិថិជនដទៃទៀតរបស់ បុរី ឡេង ណាវ៉ាត្រា ផ្លូវជាតិលេខ៦អា ក្រសួងក៏កំពុងតែសម្របសម្រួលដោះស្រាយជាមួយភាគីពាក់ព័ន្ធបន្តទៀតផងដែរ។
សូមបញ្ជាក់ផងដែរថា ទោះបីជាទទួលរង វិបត្តិសេដ្ឋកិច្ចសាកលយ៉ាងណាក្តី បុរី ឡេងណាវ៉ាត្រានៅតែបន្តសាងសង់ផ្ទះជនជាបន្តបន្ទាប់ដោយទំនួលខុសត្រូវ រហូតដល់បញ្ចប់គម្រោង៕