ក្រុមមន្ត្រីក្នុងតំបន់បាននិយាយថា យ៉ាងហោចណាស់ពលរដ្ឋហ្សកដានី ១៤នាក់បានស្លាប់ អំឡុងធ្វើធម្មយាត្រា Hajj ក្នុងប្រទេសអារ៉ាប៊ីសាអូឌីត ដោយសារតែដើរហាលថ្ងៃ ទាំងដែលអាកាសធាតុក្ដៅខ្លាំង។ នេះបើយោងតាមការចេញផ្សាយដោយសារព័ត៌មាន BBC នាថ្ងៃចន្ទ ទី១៧ ខែមិថុនា ឆ្នាំ២០២៤។
ក្រសួងការបរទេសហ្ស៊កដានី បាននិយាយថា ប្រជាជនរបស់ខ្លួនចំនួន ១៤នាក់បានស្លាប់ បន្ទាប់ពីទទួលរងនូវជំងឺដាច់សរសៃឈាមខួរក្បាល ដោយសាររលកកំដៅខ្លាំងហើយ ខណៈពលរដ្ឋរបស់ខ្លួនចំនួន ១៧នាក់ទៀតត្រូវបានគេរាយការណ៍ថា បានបាត់ខ្លួន ហើយយើងកំពុងបន្តស្វែងរកអ្នកបាត់ខ្លួន។
![](https://cdn.troryorng.com/wp-content/uploads/2024/06/17111843/4416016-709881230.jpg)
![](https://cdn.troryorng.com/wp-content/uploads/2024/06/17111900/FCMIRMVG5JNXRKF5BYJTXTZ2EY-scaled.jpg)
យោងតាមទីភ្នាក់ងារសារព័ត៌មាន AFP បានឱ្យដឹងថា អឌ្ឍចន្ទក្រហមអ៊ីរ៉ង់ បានបញ្ជាក់ថា អ្នកធ្វើធម្មយាត្រាអ៊ីរ៉ង់ ៥នាក់ក៏បានបាត់បង់ជីវិតដែរ ប៉ុន្តែមិនបានបញ្ជាក់ពីរបៀបដែលពួកគេបានបាត់បង់ជីវិតនោះទេ។
នៅក្នុងសេចក្តីថ្លែងការណ៍មួយ ក្រសួងការបរទេសហ្ស៊កដានី បាននិយាយថា ខ្លួនកំពុងសម្របសម្រួលជាមួយអាជ្ញាធរអារ៉ាប៊ីសាអូឌីត លើនីតិវិធីមួយចំនួន ដើម្បីបញ្ចុះ ឬដឹកជញ្ជូនសាកសពរបស់អ្នកស្លាប់ ទៅតាមការចង់បានរបស់ក្រុមគ្រួសាររបស់ពួកគេ។
![](https://cdn.troryorng.com/wp-content/uploads/2024/06/17112135/%E1%9F%A2-11.jpg)
![](https://cdn.troryorng.com/wp-content/uploads/2024/06/17112148/skynews-saudi-arabi-heat-haj_6583132.jpg)
ពិធីបុណ្យ Hajj គឺជាពិធីបុណ្យដ៏ធំបំផុតមួយក្នុងពិភពលោក។ យោងតាមមន្ត្រីអារ៉ាប៊ីសាអូឌីត បានឱ្យដឹងថា អ្នកធម្មយាត្រាជាង ១.៨លាននាក់កំពុងចូលរួមនៅឆ្នាំនេះ។ ប៉ុន្តែពុិធីបុណ្យនេះ ធ្លាប់មានប្រវត្តិនៃគ្រោះមហន្តរាយដ៏សាហាវនានា ដូចជា ការរត់ជាន់គ្នា និងភ្លើងឆេះតង់ យ៉ាងណាបញ្ហាប្រឈមចម្បង គឺមកពី ការឡើងកំដៅខ្លាំងតែម្ដង។
សីតុណ្ហភាពលើសពី ៤៦អង្សាសេនៅសប្តាហ៍នេះ ដែលធ្វើឲ្យពិធីជាច្រើនដែលត្រូវបានអនុវត្តនៅខាងក្រៅវិហារ មានការលំបាក ជាហេតុបង្កជាគ្រោះថ្នាក់ផ្សេងៗ ជាពិសេសសម្រាប់មនុស្សចាស់។
![](https://cdn.troryorng.com/wp-content/uploads/2024/06/17111857/240616-hajj-pilgrimage-mecca-saudi-arabia-vl-213p-d1958d.webp)
ទាក់ទិននឹងបញ្ហានេះ ប្រធានមជ្ឈមណ្ឌលឧតុនិយមជាតិអារ៉ាប៊ីសាអូឌីត លោក Ayman Ghulam បានព្រមានកាលពីសប្តាហ៍មុនថា «អាកាសធាតុដែលរំពឹងទុកសម្រាប់ពិធីបុណ្យ Hajj នៅឆ្នាំនេះ នឹងប្រព្រឹតត្តទៅក្រោមកម្ដៅថ្ងៃ ក្ដៅខ្លាំងជាងឆ្នាំមុន ដោយជាមធ្យមមានសីតុណ្ហភាពពី ១.៥អង្សាសេ ទៅ ២អង្សាសេ ដែលលើសពីសីតុណ្ហភាពធម្មតានៅក្នុងទីក្រុង Mecca និងទីក្រុង Medina»។
យ៉ាងណាម៉ិញ ដើម្បីជួយកាត់បន្ថយកម្ដៅ ក្រុមមន្រ្តីអារ៉ាប៊ីសាអូឌីត បានបាញ់ចំហាយទឹក ចែកចាយទឹក និងផ្ដល់ដំបូន្មានដល់អ្នកធ្វើធម្មយាត្រា អំពីរបៀបការពារខ្លួនពីកម្ដៅព្រះអាទិត្យផងដែរ។
![](https://cdn.troryorng.com/wp-content/uploads/2024/06/17111906/1fb6a5d0-2c0f-11ef-98ee-45d563e0553f.jpg.webp)
![](https://cdn.troryorng.com/wp-content/uploads/2024/06/17112018/Capture-1.jpg)
![](https://cdn.troryorng.com/wp-content/uploads/2024/06/17112102/%E1%9F%A1-25.jpg)
ទន្ទឹមនោះ ក្រសួងសុខាភិបាលអារ៉ាប៊ីសាអូឌីត ក៏បានចេញសេចក្តីណែនាំផងដែរ ដោយស្នើឱ្យអ្នកធ្វើធម្មយាត្រា រក្សាជាតិទឹក និងជៀសវាងការនៅកណ្ដាលវាល អំឡុងម៉ោងក្តៅបំផុត ចាប់ពីចន្លោះពីម៉ោង ១០:០០នាទីព្រឹក ដល់ ៤:០០នាទីរសៀល។
សូមជម្រាបថា កាលពីឆ្នាំមុន យ៉ាងហោចណាស់មនុស្ស ២៤០នាក់បានស្លាប់ ក្នុងពិធីបុណ្យនេះ ហើយកាលពីឆ្នាំ២០១៥ កើតមានគ្រោះមហន្ដរាយដ៏អាក្រក់បំផុតមួយ ដោយមនុស្សជាង ២,០០០នាក់ បានស្លាប់ព្រោះតែការរត់ជាន់គ្នា៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)