ដើម្បីឲ្យយន្តការច្រកចេញចូលតែមួយ ដែលជាមធ្យោបាយដ៏មានសារៈសំខាន់ ក្នុងការផ្ដល់សេវាជូនដល់ប្រជាពលរដ្ឋនៅមូលដ្ឋានប្រកបដោយប្រសិទ្ធភាព ស្របតាមគោលការណ៍ និងនីតិវិធីជាធរមាននោះ ត្រូវពឹងផ្អែកទៅលើកត្តាគន្លឹះសំខាន់ៗចំនួន៣។ នេះជាការលើកឡើងរបស់ឯកឧត្ដម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ នៅក្នុងសន្និសីទសារព័ត៌មាន ដែលរៀបចំដោយអង្គភាពអ្នកនាំពាក្យក្រសួងមហាផ្ទៃកាលពីថ្ងៃទី ១៤ ខែមិថុនា ឆ្នាំ២០២៤។ កត្តាទាំង៣នោះគឺ ទី១ ក្រសួង ស្ថាប័នពាក់ព័ន្ធ ត្រូវផ្ដល់កិច្ចសហការ គាំទ្រដល់ការបណ្ដុះបណ្ដាល កសាងសមត្ថភាព ដល់ថ្នាក់ដឹកនាំ និងមន្ត្រីនៅថ្នាក់ក្រោមជាតិ អំពីបែបបទ និងនីតិវិធីបច្ចេកទេស។ ទន្ទឹមគ្នានេះដែរ ក្រសួងស្ថាប័នពាក់ព័ន្ធក៏មានតួនាទីភារកិច្ចតាមដាន ត្រួតពិនិត្យ និងវាយតម្លៃ ទៅលើការងាររបស់មន្ត្រីនៅតាមច្រកចេញចូលតែមួយ ដើម្បីធានាឲ្យការផ្ដល់សេវានានានៅថ្នាក់ក្រោមជាតិមានគុណភាព ប្រសិទ្ធភាព ប្រសិទ្ធផល តម្លាភាព និងគណនេយ្យភាព ប្រកបដោយបរិយាបន្ន។
ទី២ ត្រូវយកចិត្តទុកដាក់លើការរៀបចំកន្លែងផ្ដល់សេវាឲ្យបានសមរម្យ មន្ត្រីបម្រើសេវាត្រូវមានភាពរោះរាយរាក់ទាក់ និងបង្កភាពកក់ក្ដៅជូនប្រជាពលរដ្ឋ។ ជាមួយគ្នានេះមន្ត្រីដែលបម្រើការនៅច្រកចេញចូលតែមួយត្រូវមានក្រមសីលធម៌ វិជ្ជាជីវៈ មានការទទួលខុសត្រូវ និងស្អាតស្អំក្នុងការបម្រើសេវាជូនប្រជាពលរដ្ឋ។
ទី៣ ត្រូវធ្វើការផ្សព្វផ្សាយអំពីសារៈសំខាន់នៃយន្តការច្រកចេញចូលតែមួយឲ្យបានទូលំទូលាយ ឲ្យប្រជាពលរដ្ឋបានយល់ដឹង។ ហើយមន្ត្រីបម្រើការនៅច្រកចេញចូលតែមួយក៏ត្រូវខិតខំប្រឹងប្រែងកសាងសមត្ថភាពខ្លួនឯងឲ្យកាន់តែល្អប្រសើរជាលំដាប់ផងដែរ ជាពិសេសសមត្ថភាពយល់ដឹងអំពីលិខិតបទដ្ឋានគតិយុត្តិ បែបបទការងារ និងបច្ចេកទេសពាក់ព័ន្ធ។
ឯកឧត្ដម សួស ប្រាថ្នា បានក្រើនរំលឹកឲ្យថ្នាក់ដឹកនាំ និងមន្ត្រីនៅថ្នាក់ក្រោមជាតិ ជាពិសេសមន្ត្រីដែលបម្រើការនៅច្រកចេញចូលតែមួយ ត្រូវសិក្សាឈ្វេងយល់ បង្កើនសមត្ថភាពផ្នែកបច្ចេកវិទ្យាឌីជីថល ឲ្យស្របទៅតាមទិសដៅរបស់រាជរដ្ឋាភិបាល។
អគ្គនាយករដ្ឋបាលនៃក្រសួងមហាផ្ទៃ បានអំពាវនាវឲ្យប្រជាពលរដ្ឋចូលរួមជំរុញយន្តការច្រកចេញចូលតែមួយឲ្យកាន់តែប្រសើរឡើង តាមរយៈទៅទទួលសេវាដោយផ្ទាល់ ជាជាងពឹងលើអ្នករត់ការណ៍ ហើយចូលរួមលើកជាមតិយោបល់ក្នុងន័យស្ថាបនា ប្រសិនបើមានចំណុចខ្វះចន្លោះណាមួយដែលត្រូវបំពេញបន្ថែម។ លោកបង្ហាញនូវសុទិដ្ឋិនិយមលើការចូលរួមរបស់ប្រជាពលរដ្ឋ គឺពិតជាមានសារៈសំខាន់ណាស់ ហើយមិនត្រូវមានការស្ទាក់ស្ទើរលើការទទួលសេវានៅច្រកចេញចូលតែមួយឡើយ ប្រសិនបើមានកន្លែងណាមួយ ដែលមិនយល់ ឬមិនទាន់ជាក់ច្បាស់ ដូចជាការបំពេញបែបបទផ្សេងៗ ត្រូវរកជំនួយអន្តរាគមន៍ពីមន្ត្រីនៅច្រកចេញចូលតែមួយនោះតែម្ដង ត្បិតភារកិច្ចរបស់ពួកគាត់ គឺចាំជួយប្រជាពលរដ្ឋអ្នកទទួលសេវា៕
អត្ថបទ៖ ឈិន ធារ៉ាត់
