![](https://cdn.troryorng.com/wp-content/uploads/2024/06/19115229/Screenshot-2024-06-19-115208.png)
លោក Facundo Tello អាជ្ញាកណ្ដាលបាល់ទាត់ដែលធ្លាប់ចាយកាតក្រហម១០សន្លឹក ដេញកីឡាករ១០នាក់ចេញពីទីលានប្រកួត ក្នុងវគ្គផ្ដាច់ព្រ័ត្រពានរង្វាន់ជើងឯកលីគបាល់ទាត់កំពូលប្រទេសអាហ្សង់ទីន Argentine Primera División champions ក្នុងឆ្នាំ២០២២ កន្លងទៅត្រូវបានសហព័ន្ធកីឡាបាល់ទាត់អឺរ៉ុប អញ្ជើញឱ្យចូលរួមកាត់សេចក្តីក្នុងព្រឹត្តិការណ៍ប្រកួតបាល់ទាត់ធំប្រចាំទ្វីប UEFA Euro 2024 នៅប្រទេសអាល្លឺម៉ង់។
លោក Facundo Tello វ័យ៤២ឆ្នាំបានក្លាយជាអាជ្ញាកណ្តាលក្រៅទ្វីបអឺរ៉ុប មុនគេ ដែលចូលរួមកាត់សេចក្តីក្នុងការប្រកួតកីឡាបាល់ទាត់ UEFA Euro បន្ទាប់ពីសហព័ន្ធកីឡាបាល់ទាត់អឺរ៉ុប សហការជាមួយសហព័ន្ធកីឡាបាល់ទាត់អាមេរិកខាងត្បូង នាំរូបលោកទៅទឹកដីអឺរ៉ុប។
![](https://cdn.troryorng.com/wp-content/uploads/2024/06/19115046/Screenshot-2024-06-19-114945.png)
បុរសជនជាតិអាហ្សង់ទីន រូបនេះបានដឹកនាំការប្រកួតក្នុងពូល F គ្រាដែលក្រុមតួរគី យកឈ្នះលើក្រុមចចជី ដោយលទ្ធផល ៣-១ លើទីលាន Westfalenstadion ក្នុងទីក្រុង Dortmund ក្រោមក្រសែភ្នែកទស្សនិកជនប្រមាណជិត៦ម៉ឺននាក់ នារាត្រីថ្ងៃទី១៨ ឈានចូលទី១៩ ខែមិថុនា ឆ្នាំ២០២៤។
![](https://cdn.troryorng.com/wp-content/uploads/2024/06/19115100/Screenshot-2024-06-19-114646-1024x685.png)
លោកFacundo Tello កាន់កញ្ចែចាយកាតក្រហម១០សន្លឹកក្នុង១ប្រកួត ក្នុងចំណោមកាតសរុប២២សន្លឹក នៅវគ្គផ្ដាច់ព្រ័ត្រពានរង្វាន់លីកកំពូលអាហ្សង់ទីន កាលពីឆ្នាំ២០២២ កន្លងទៅរវាងក្រុម Racing Club ប៉ះក្រុម Boca Juniors លើទីលានកីឡដ្ឋាន Estadio Único del Parque La Pedrera។ កាលនោះចប់លទ្ធផល១២០នាទី ក្រុម Boca Juniors ឈ្នះ Racing Club ដោយលទ្ធផល ២-១។
អត្ថបទពាក់ព័ន្ធ៖ ប្រកួត១នៅអាហ្សង់ទីន ត្រូវអាជ្ញាកណ្ដាលពិន័យកាតក្រហម១០សន្លឹក (វីដេអូ)
![](https://cdn.troryorng.com/wp-content/uploads/2024/06/19114414/Screenshot-2024-06-19-114346.png)
សូមរំលឹកថាលោកFacundo Tello បានជាប់ឈ្មោះកាត់សេចក្តីការប្រកួតលីគកំពូលអាហ្សង់ទីន ពីឆ្នាំ២០១៣ ហើយរហូតដល់ឆ្នាំ២០១៩ លោកបានបន្តជាប់ឈ្មោះជាសមាជិករបស់សហព័ន្ធកីឡាបាល់ទាត់អាមេរិកខាងត្បូង CONMELBOL និងសហព័ន្ធកីឡាបាល់ទាត់អន្តរជាតិ FIFA។
![](https://cdn.troryorng.com/wp-content/uploads/2024/06/19115107/Screenshot-2024-06-19-115023.png)
នេះមិនមែនជាលើកដំបូងសម្រាប់លោក Tello ដែលចេញដឹកនាំការប្រកួតនៅក្រៅទ្វីបអាមេរិកខាងជើងនោះទេ កន្លងមកលោកធ្លាប់ដឹកនាំការប្រកួតនៅក្នុងពានរង្វាន់ 2021 FIFA Arab Cup ដែលធ្វើឡើងនៅប្រទេសកាតារ និង ពានរង្វាន់ 2022 FIFA World Cup នៅប្រទេសកាតារជាដើម៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)