វ៉ាស៊ីនតោន៖ យោធាអាមេរិកបាននិយាយនៅថ្ងៃព្រហស្បតិ៍ នេះថា ខ្លួនបានបំផ្លាញយន្តហោះគ្មានមនុស្សបើករបស់ក្រុម Houthi ចំនួន៤គ្រឿង និងយន្តហោះ ២គ្រឿងទៀតនៅលើសមុទ្រក្រហម ពីប្រទេសយេម៉ែន។ នេះបើយោងតាមការចេញផ្សាយដោយសារព័ត៌មាន CNA នាថ្ងៃសុក្រ ទី២១ ខែមិថុនា ឆ្នាំ២០២៤។
ក្រុមឧទ្ទាម Houthis គាំទ្រដោយអ៊ីរ៉ង់ បានបាញ់បង្ហោះយន្តហោះគ្មានមនុស្សបើក និងមីស៊ីលជាច្រើនគ្រាប់ ទៅលើកប៉ាល់ពាណិជ្ជកម្មនៅសមុទ្រក្រហម និងឈូងសមុទ្រ Aden ចាប់តាំងពីខែវិច្ឆិកា ដោយពណ៌នាអំពីការវាយប្រហារថាជាការជួយដល់ប៉ាឡេស្ទីន ក្នុងអំឡុងសង្គ្រាមអ៊ីស្រាអែល និងក្រុមហាម៉ាស់នៅតំបន់ហ្គាហ្សាស្ទ្រីប។
សហរដ្ឋអាមេរិក និងសម្ព័ន្ធមិត្តរបស់ខ្លួន ជាពិសេសចក្រភពអង់គ្លេស បានឆ្លើយតបជាមួយនឹងការកើនឡើងនៃវត្តមានកងទ័ពជើងទឹក ដើម្បីការពារការដឹកជញ្ជូននៅក្នុងផ្លូវទឹកដ៏សំខាន់ និងជាមួយនឹងការវាយប្រហារសងសឹកទៅលើគោលដៅរបស់ក្រុម Houthi ។
ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយនៅក្នុងសេចក្តីថ្លែងការណ៍មួយកាលពីយប់ថ្ងៃព្រហស្បតិ៍ ថា កងកម្លាំងរបស់ខ្លួនបាន «បំផ្លាញយន្ដហោះគ្មានមនុស្សបើកនៅលើផ្ទៃទឹកដែលគាំទ្រដោយក្រុមឧទ្ទាម Houthi (USV) ចំនួន ៤គ្រឿង នៅសមុទ្រក្រហម និងយន្ដហោះគ្មានមនុស្សបើក (UAS) ចំនួន ២គ្រឿងទៀតនៅលើសមុទ្រក្រហម ក្នុងរយៈពេល ២៤ម៉ោងកន្លងមក»។
យោងតាមទីភ្នាក់ងារសន្តិសុខដែនសមុទ្រដែលគ្រប់គ្រងដោយកងទ័ពជើងទឹកអង់គ្លេស បានឱ្យដឹងថា នៅសប្តាហ៍នេះ កប៉ាល់ពាណិជ្ជករមួយគ្រឿងដែលត្រូវបានរំលោភបំពាននៅក្នុងការវាយប្រហាររបស់ក្រុមឧទ្ទាម Houthi មុននេះ។ នាវា M/V Tutor ត្រូវបានគេជឿថា បានលិចនៅក្នុងសមុទ្រក្រហម បន្ទាប់ពីនាវិករបស់ខ្លួនត្រូវបានជម្លៀស។
ដោយឡែកអ្នកនាំពាក្យក្រសួងការបរទេសអាមេរិក លោក Matthew Miller បានថ្កោលទោសការវាយប្រហារទាំងនោះនៅក្នុងសេចក្តីថ្លែងការណ៍មួយ ហើយបាននិយាយថា ទីក្រុងវ៉ាស៊ីនតោន នឹងបន្តចាត់វិធានការចាំបាច់ ដើម្បីការពារសេរីភាពនៃការធ្វើនាវាចរណ៍ និងការដឹកជញ្ជូនពាណិជ្ជកម្មតាមផ្លូវទឹក។
ជាមួយគ្នា លោក Miller ក៏បានអំពាវនាវឱ្យក្រុម Houthis «ដោះលែងអ្នកជាប់ឃុំទាំងអស់ រួមមានទាំងបុគ្គលិកអង្គការសហប្រជាជាតិ អ្នកការទូត និងអង្គការមិនមែនរដ្ឋាភិបាល ដែលពួកគេបានឃុំខ្លួនកាលពីដើមខែនេះផងដែរ»។
ក្រុម Houthis កាលពីដើមខែនេះ បានចាប់ខ្លួនមនុស្សមួយចំនួន ដែលពួកគេអះអាងថា ជាផ្នែកនៃបណ្តាញចារកម្ម អាមេរិក-អ៊ីស្រាអែល ដោយបន្ថែមថា អ្នកដែលត្រូវបានចាប់ខ្លួននោះ ធ្វើការនៅក្រោម «ការបិទបាំងរបស់អង្គការអន្តរជាតិ និងទីភ្នាក់ងារអង្គការសហប្រជាជាតិ»។
ប្រធានទីភ្នាក់ងារអង្គការសហប្រជាជាតិចំនួន៦ និងអង្គការក្រៅរដ្ឋាភិបាលអន្តរជាតិចំនួន៣ បានប្រកាសជាបន្តបន្ទាប់ នូវការអំពាវនាវរួមគ្នាមួយឱ្យមានការដោះលែងបុគ្គលិករបស់ពួកគេ ដោយប្រធានសិទ្ធិមនុស្សរបស់អង្គការសហប្រជាជាតិលោក Volker Turk បានច្រានចោលការចោទប្រកាន់ចារកម្មនេះថា «គួរឱ្យស្អប់ខ្ពើម»។
សូមជម្រាបថា ក្រុមឧទ្ទាម Houthis កំពុងចូលរួមក្នុងសង្គ្រាមស៊ីវិលដ៏រ៉ាំរ៉ៃ ដែលបានបង្កឱ្យមានវិបត្តិមនុស្សធម៌ដ៏អាក្រក់បំផុតមួយរបស់ពិភពលោក។ ជាងពាក់កណ្តាលនៃចំនួនប្រជាជន គឺពឹងផ្អែកលើជំនួយនៅក្នុងប្រទេសក្រីក្របំផុតរបស់ឧបទ្វីបអារ៉ាប់មួយនេះ៕
