ប៉េកាំង៖ ប្រព័ន្ធផ្សព្វផ្សាយរដ្ឋបានរាយការណ៍នាថ្ងៃពុធ ថា មនុស្សជិតមួយភាគបួននៃប្រជាជន ១លាននាក់ត្រូវបានជម្លៀសចេញនៅភាគខាងកើតប្រទេសចិន ខណៈដែលព្យុះភ្លៀងបានបោកបក់មកលើប្រទេស និងបណ្តាលឱ្យកម្ពស់ទឹកទន្លេ Yangtze និងទន្លេផ្សេងហក់ឡើងខ្ពស់។ នេះបើយោងតាមការចេញផ្សាយដោយសារព័ត៌មាន CNA នាថ្ងៃពុធ ទី៣ ខែកក្កដា ឆ្នាំ២០២៤។
ប្រទេសចិន បាននឹងកំពុងស៊ូទ្រាំនឹងលក្ខខណ្ឌអាកាសធាតុខ្លាំងក្នុងរយៈពេលប៉ុន្មានខែថ្មីៗនេះ ចាប់ពីភ្លៀងធ្លាក់ខ្លាំងរហូតដល់ការកើនឡើងនៃរលកកម្ដៅខ្លាំង។
![](https://cdn.troryorng.com/wp-content/uploads/2024/07/03150437/1-7.jpg)
ទីភ្នាក់ងារសារព័ត៌មានរដ្ឋចិន Xinhua បាននិយាយថា ព្យុះភ្លៀងនេះ បានប៉ះពាល់ដល់អ្នកស្រុកចំនួន ៩៩១,០០០នាក់នៅក្នុងខេត្ត Anhui ហើយបានបង្ខំឱ្យមានការជម្លៀសមនុស្សចំនួន ២៤២,០០០នាក់គិតត្រឹមរសៀលថ្ងៃអង្គារសប្ដាហ៍នេះ។
បើតាមទីភ្នាក់ងារដដែល បានដកស្រង់ពីនាយកដ្ឋានគ្រប់គ្រងគ្រាអាសន្នខេត្ត ថា គិតត្រឹមម៉ោង ៤រសៀលថ្ងៃអង្គារ ព្យុះភ្លៀងបានបំផ្លិចបំផ្លាញដោយបង្កឱ្យមានការខូចខាតធ្ងន់ធ្ងរ នៅក្នុងតំបន់ និងស្រុកចំនួន៣៦ ក្នុងទីក្រុងចំនួន៧ នៃខេត្ត Anhui ចំណែកឯទឹកទន្លេ Yangtze ដែលជាទន្លេវែងជាងគេបំផុតរបស់ប្រទេសចិន មានកម្រិតទឹកហក់ឡើងខ្ពស់នៅក្នុងខេត្ត Anhui ដោយវាលើសពីកម្រិតប្រកាសអាសន្ន ហើយទឹកទន្លេអាចនឹងបន្តកើនឡើងថែមទៀត។
![](https://cdn.troryorng.com/wp-content/uploads/2024/07/03150447/3-4.jpg)
![](https://cdn.troryorng.com/wp-content/uploads/2024/07/03150458/20240703-china_19076a61108_medium.jpg)
ភ្លៀងធ្លាក់ខ្លាំងក៏បានធ្វើឱ្យកម្ពស់ទឹកលើសពីកម្រិតប្រកាសអាសន្ននៅក្នុងទន្លេចំនួន២០ និងបឹងចំនួន ៦ផ្សេងទៀត ក្នុងខេត្តនេះផងដែរ។
យោងតាមទីភ្នាក់ងារព័ត៌មានរដ្ឋ ស៊ីនហួរ បានឱ្យដឹងថា ទឹកភ្លៀងធ្លាក់ច្រើនជាង ១០០មីលីម៉ែត្រ ត្រូវបានកត់ត្រានៅស្ថានីយ៍អាកាសធាតុរាប់រយកន្លែងនៅទូទាំងខេត្តអានហ៊ុយ ចន្លោះម៉ោង ៥ល្ងាចថ្ងៃចន្ទ និងម៉ោង ៥ល្ងាចដូចគ្នាកាលពីថ្ងៃអង្គារ។ នៅតំបន់ Hexi ជិតទីរួមខេត្ត Hefei កម្ពស់ទឹកកើនឡើងប្រហែល ២៦៦មីលីម៉ែត្រ ត្រូវបានកត់ត្រាទុក ខណៈមន្ត្រីរាប់ម៉ឺននាក់ត្រូវបានដាក់ពង្រាយដើម្បីត្រួតពិនិត្យទំនប់ទឹកនៅតាមដងទន្លេ Yangtze ក្នុងទីក្រុង Anhui។
![](https://cdn.troryorng.com/wp-content/uploads/2024/07/03150507/2-4.jpg)
![](https://cdn.troryorng.com/wp-content/uploads/2024/07/03150517/1200x900.jpg)
![](https://cdn.troryorng.com/wp-content/uploads/2024/07/03150522/b083fe955fd618ac888e09.jpg)
ទាក់ទិននឹងបញ្ហានេះ ការិយាល័យអាកាសធាតុខេត្ត បានព្យាករណ៍ថា នឹងមានភ្លៀងធ្លាក់បន្ថែមទៀតនៅទូទាំងខេត្ត Anhui ចាប់ពីថ្ងៃពុធ រហូតដល់ថ្ងៃសុក្រ សប្ដាហ៍នេះ ហើយបានចេញការព្រមានសម្រាប់ «គ្រោះមហន្តរាយភូមិសាស្ត្រ» នៅក្នុងតំបន់ភាគខាងត្បូងផងដែរ។
យោងតាមរបាយការណ៍របស់ប្រព័ន្ធផ្សព្វផ្សាយរដ្ឋ បានឱ្យដឹងថា ទឹកជំនន់នៅកណ្តាលខេត្តហ៊ូណាន បានឆក់យកជីវិតមនុស្ស ៥នាក់កាលពីខែមុន ខណៈការរអិលបាក់ដីនៅក្នុងខេត្ត តែមួយនោះ បានសម្លាប់មនុស្ស ៨នាក់។ ជាមួយគ្នា ភ្លៀងធ្លាក់ខ្លាំង និងទឹកជំនន់ក៏បានបណ្តាលឱ្យមនុស្ស ៣៨នាក់ស្លាប់នៅក្នុងខេត្ត Guangdong ភាគខាងត្បូងក្នុងខែមិថុនា នេះ។
សូមជម្រាបថា ការប្រែប្រួលអាកាសធាតុ បណ្ដាលឱ្យមានភ្លៀងធ្លាក់ខ្លាំងបានបង្កឱ្យមានគ្រោះមហន្តរាយ បណ្ដាលឱ្យមានមនុស្សស្លាប់នៅភាគខាងត្បូងប្រទេសចិន ក្នុងរយៈពេលប៉ុន្មានខែថ្មីៗនេះ៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)