អង្គភាពអ្នកនាំពាក្យក្រសួងមហាផ្ទៃចាត់ទុកការចេញផ្សាយអំពីចំណាត់ថ្នាក់បទល្មើសព្រហ្មទណ្ឌ របស់ប្រព័ន្ធផ្សព្វផ្សាយបរទេសមួយចំនួន មានចេតនាមិនល្អ និងធ្វើឲ្យខូចកិត្តិយសរបស់ប្រទេសកម្ពុជា ដោយប្រើឧបាយកលបន្លាចភ្ញៀវទេសចរ និងអ្នកជំនួញ ឲ្យមានការភ័យខ្លាច និងរារែកក្នុងការសម្រេចចិត្តចូលមកប្រទេសកម្ពុជា។ អង្គភាពអ្នកនាំពាក្យក្រសួងមហាផ្ទៃយល់ថា ការផ្សព្វផ្សាយព័ត៌មានអវិជ្ជមាន ជ្រុលលើសពីការពិតទាំងនេះ គឺជាផ្នែកមួយនៃរបៀបវារៈ ដែលមានការរៀបចំទុកដើម្បីវាយប្រហារមកលើប្រទេសកម្ពុជាដោយអគតិ។
ប្រតិកម្មរបស់ក្រសួងមហាផ្ទៃនេះ ធ្វើឡើងស្របពេលមានការផ្សព្វផ្សាយអំពីចំណាត់ថ្នាក់ នៃសន្ទស្សន៍បទល្មើសព្រហ្មទណ្ឌរបស់ប្រទេសនានាលើសកលលោក និងសន្ទស្សន៍បទល្មើសព្រហ្មទណ្ឌរបស់ប្រទេសនៅក្នុងតំបន់អាស៊ីអាគ្នេយ៍ របស់គេហទំព័រ NUMBEO ។ NUMBEO គឺជាគេហទំព័រទិន្នន័យដែលបានពីការបញ្ចូលរបស់អ្នកមហាជនអ្នកប្រើប្រាស់អ៊ីនធឺណិត និងមានប្រភពមកពីអឺរ៉ុបកណ្ដាល មូលដ្ឋាននៅប្រទេសសឺប៊ា (Serbia)។
NUMBEO បានដាក់ប្រទេសកម្ពុជាលើលេខរៀងទី១ ដែលមានករណីបទល្មើសព្រហ្មទណ្ឌច្រើនជាងគេ ក្នុងចំណោមប្រទេសអាស៊ាន ដោយមានសន្ទស្សន៍ ៥២.៨% និងសន្ទស្សន៍សុវត្ថិភាពត្រឹម ៤៧.២% ប៉ុណ្ណោះ។ បន្ទាប់មកគឺប្រទេសម៉ាឡេស៊ី មានសន្ទស្សន៍ ៥០.៧% និងសន្ទស្សន៍សុវត្ថិភាព ៤៩.៣%។
បើប្រៀបធៀបទៅនឹងប្រទេសនានាលើសកលលោក NAMBEO ដាក់កម្ពុជាក្នុងលេខរៀងទី៧ បន្ទាប់ពីម៉ុងហ្គោល និងតោងពីក្រោយដោយម៉ាឡេស៊ី។
អង្គភាពអ្នកនាំពាក្យសួងមហាផ្ទៃតាមរយៈលោកបណ្ឌិត ទូច សុឃៈ (សុខៈ) អ្នកនាំពាក្យរង គូសបញ្ជាក់ថា ក្រសួងមហាផ្ទៃបានយកទិន្នន័យដែលបានចេញផ្សាយទាំងនោះមកធ្វើការផ្ទៀងផ្ទាត់ និងសន្និដ្ឋានអំពីផលវិបាកវិជ្ជមាន និងអវិជ្ជមាន ព្រមទាំងចេតនានៃការផ្សព្វផ្សាយយ៉ាងហ្មត់ចត់។ ជាលទ្ធផល គឺពុំឃើញមានលក្ខណៈត្រឹមត្រូវ ពិតប្រាកដ ជាក់ស្ដែងនោះទេ ហើយក៏មិនបានឆ្លុះបញ្ចាំងពីចេតនាជួយជ្រោមជ្រែង ជាទិន្នន័យ និងអនុសាសន៍កែលម្អអ្វីដែរ។ ផ្ទុយទៅវិញ បែរជាមានចេតនាជាន់ពន្លិចកេរ្តិ៍ឈ្មោះ និងប៉ែងជើងប្រទេសកម្ពុជា។
លោកបណ្ឌិតក៏បានពន្យល់ថា ចាប់តាំងពីកម្ពុជាសម្រេចដំណើរការលើគម្រោងព្រែកជីកហ្វូណនតេជោ ក្រុមបរទេសនិយម និងបណ្ដាប្រទេសដែលមានចិត្តច្រណែនឈ្នានីស បានរៀបចំរបៀបវារៈផ្សេងដើម្បីវាយប្រហារមកលើកម្ពុជា ក្នុងនោះមធ្យោបាយប្រព័ន្ធផ្សព្វផ្សាយគឺជាគោលដៅចម្បងមួយផងដែរ។
អត្ថបទ៖ ឈិន ធារ៉ាត់
