បេសកកម្មរបស់ក្រុមជម្រើសជាតិកម្ពុជា អាយុក្រោម១៧ នឹងជួបក្រុមក្រុមជម្រើសជាតិឡាវ អាយុក្រោម១៧ ពានរង្វាន់ប្រចាំទ្វីប AFC U-17 Asian Cup qualification នៅថ្ងៃទី២៤ វិច្ឆិកានេះ ដែលប្រទេសកៀហ្ស៊ីស៊ីស្ថាន ទទួលជាម្ចាស់ផ្ទះការប្រកួតវគ្គជម្រុះក្នុងពូល B។
ឆ្លងកាត់ការប្រកួតទី១ វគ្គជម្រុះក្នុងពូល B ក្រុមជម្រើសជាតិកម្ពុជា អាយុក្រោម១៧ បានបរាជ័យក្រោមថ្វីដៃរបស់ក្រុមប៉ាគីស្ថាន ដោយលទ្ធផល ៣-១ កាលពីថ្ងៃទី២២ វិច្ឆិកា។ ស្របពេលថ្ងៃនេះ នឹងត្រូវជួបឡាវ វេលាម៉ោង ៤:០០ នាទីរសៀល (ម៉ោងនៅកម្ពុជា) ក្នុងកីឡដ្ឋាន Dostuk Arena។
ចំពោះពានរង្វាន់កម្រិតទ្វីប AFC U-17 Asian Cup qualification វគ្គជម្រុះក្នុងពូលគឺក្រុមកម្ពុជា ស្ថិតនៅពូល B ជាមួយក្រុមជម្រើសជាតិយេម៉ែន, ឡាវ, ម្ចាស់ផ្ទះកៀហ្ស៊ីស៊ីស្ថាន, ក្រុមកោះហ្គាម និង ប៉ាគីស្ថាន ខណៈការប្រកួតវគ្គជម្រុះនេះនឹងធ្វើឡើងនៅថ្ងៃទី២២ ដល់ថ្ងៃទី៣០ ខែវិច្ឆិកា ឆ្នាំ២០២៥ ។
ក្នុងចំណោមក្រុមនៅតាមបូលទាំង៧ ពី A ដល់ G នឹងត្រូវប្រកួតប្រជែងគ្នាដើម្បីយកតែ ១ក្រុមប៉ុណ្ណោះ ឡើងទៅកាន់ជុំចុងក្រោយមាន ១៦ក្រុម រួមមានម្ចាស់ផ្ទះអារ៉ាប៊ីសាអូឌីត ឥណ្ឌូណេស៊ី ជប៉ុន កូរ៉េខាងជើង កាតា កូរ៉េខាងត្បូង តាជីគីស្ថានអេមីរ៉ាតអារ៉ាប់រួម និងអ៊ូសបេគីស្ថាន កំពុងឈរចាំ។ ការប្រកួត នឹងចាប់ផ្ដើមពី៧ ដល់ថ្ងៃទី២៤ ខែឧសភា ឆ្នាំ២០២៦។
សម្រាប់ពានរង្វាន់យុវជនកម្រិតទ្វីប AFC U17 Asian Cup បង្កើតឡើងដំបូងនៅឆ្នាំ១៩៨៥ ពោលគឺមានអាយុកាលជាង ៣៩ឆ្នាំហើយ ខណៈក្រុមយុវជនជប៉ុន ឈ្នះជើងឯងច្រើនជាងគេសរុប៤លើក កូរ៉េខាងត្បូង, កូរ៉េខាងជើង, ចិន, អារ៉ាប់ប៊ីសាអូឌីត, អូម៉ង់, អ៊ូសបេគីស្ថានបានចំនួន២លើក រីឯក្រុមជម្រើសជាតិកាតា, អ៊ីរ៉ុង, ថៃ និងអ៊ីរ៉ាក់ ឈ្នះ១លើកដូចគ្នា៕
