ឃាត់ខ្លួនក្មេងទំនើង ៧នាក់ ពាក់ព័ន្ធករណីហិង្សា នៅសួនច្បារមុខ

ភ្នំពេញ ៖ អនុវត្តតាមបទបញ្ជារបស់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយអធិការដ្ឋាននគរបាលខណ្ឌដូនពេញ បានបង្រ្កាប និងឃាត់ខ្លួនក្មេងទំនើងចំនួន ៧នាក់ មានរហស្សនាម “វត្តក្នុង (WK)” ពាក់ព័ន្ធករណីហិង្សាដោយចេតនា។

ករណីនេះបានកើតឡើងនៅវេលាម៉ោង ០២ៈ៣០ នាទី យប់ថ្ងៃទី ៣០ ខែវិច្ឆិកា ឆ្នាំ ២០២៥ នៅត្រង់សួនច្បារមុខសាលាអនុវត្ត ផ្លូវព្រះសីហនុ សង្កាត់ចតុមុខ ខណ្ឌដូនពេញ។ ក្រុមជនសង្ស័យត្រូវបានសង្ស័យថាបានប្រើដុំថ្ម ស្បែកជើង និងមួកសុវត្ថិភាព ដេញគប់ និងវាយគ្នាទៅវិញទៅមក បង្កឱ្យមានភាពវឹកវរ នៅតំបន់។

ជនសង្ស័យ ៧នាក់ រួមមាន៖ ពិន លីហៃ (កើត​២០០៧)។ ឡុង សេដ្ឋកុល (កើត​២០០៧)។ ឈិន វ៉ាន់ឈីវ (កើត​២០០៧)។ សន សុវណ្ណដារ៉ា (កើត​២០០៧)។ លាស់ ពេជ្រ (កើត​២០០៧)។ មិត្ត រដ្ឋា (កើត​២០០៧)។ នៅ សុវណ្ណមករា (កើត​២០០៧)។

បច្ចុប្បន្ន ការិយាល័យជំនាញកំពុងសាកសួរតាមនីតិវិធី ដើម្បីបន្តនាំចូលដំណើរការច្បាប់។