សមាជិកលីគកំពូលមួយភាគធំ ដែលមានភារកិច្ចប្រកួតពានរង្វាន់លីគកំពូលកម្ពុជា សម្រាប់បង្គ្រប់សប្តាហ៍ទី១០ បានប្រកាសពីការ បរិច្ចាគថវិកាពីការលក់សំបុត្រដើម្បីជូនទៅកាន់ជនភៀសសឹកតាមបណ្តោយព្រំដែន និងក្លិបមួយចំនួនទៀតសម្រេចបង្កើតលនិធិ ផ្ទាល់ខ្លួនដើម្បីរៀបចំជំនួយទៅកាន់ជនភៀសសឹកដែលកំពុងជួបការលំបាក។
ចំណែកឯក្រុមបាល់ទាត់យុវជនតាមបណ្តាលក្លិបមួយចំនួនក៏បានចូលរួមរៀបចំសម្ភារផងដែរ ដែលជាជំនួយរបស់សប្បុរសជន ដើម្បីផ្ដល់ជូនជនភៀសសឹករាប់ម៉ឺននាក់ ដែលបានជម្លៀសមកទីកន្លែងសុវត្ថិភាព ក្រោយរងការឈ្លានពាននៅតាមព្រំដែនពីយោធាថៃ ។
នេះជាក្រុមយុវជនដែលបានចូលរួមរៀបចំសម្ភារ ដែលជាជំនួយរបស់សប្បុរសជន រួមមាន៖
ទី១) ក្រុមយុវជនបឹងកេត ឆ្លៀតពេលក្រោយបញ្ចប់ពីការហ្វឹកហាត់ បានទៅចូលរួមជាមួយបងប្អូនប្រជាពលរដ្ឋខ្មែរ ជួយរៀបចំស្បៀង អាហារ និងសម្ភារៈប្រើប្រាស់ផ្សេងៗ ដើម្បីជួយដល់វីរកងទ័ពជួរមុខ និងបងប្អូនជនភៀសសឹក។
ទី២) ក្រុមយុវជនវិសាខា បានចូលរួមរៀបចំសម្ភារ ដែលជាជំនួយរបស់សប្បុរសជន ដើម្បីផ្ដល់ជូនជនភៀសសឹករាប់ម៉ឺននាក់ ដែលបានជម្លៀសមកទីកន្លែងសុវត្ថិភាព ក្រោយរងការឈ្លានពាននៅតាមព្រំដែនពីយោធាថៃ ។
នេះជាសមាជិកលីគកំពូលកម្ពុជា ដែលនឹងបរិច្ចាគថវិកាពីការលក់សំបុត្រទៅកាន់ វីរៈកងទ័ព និងជនភៀសសឹកតាមបណ្តោយព្រំដែន ៖
ទី១) ក្លិបបាល់ទាត់អាយអេសអាយ ដង្កោសែនជ័យ ប្រកាសបង្កើត “មូលនិធិ អាយ អេស អាយ សម្រាប់ជនភៀសសឹក” ដើម្បីផ្តល់ជំនួយ ដល់ប្រជាពលរដ្ឋខ្មែរនៅជំរុំភៀសសឹក ដោយចាប់ផ្តើមទទួលការបរិច្ចាគចាប់ពីថ្ងៃទី១១ ខែធ្នូ ២០២៥ នេះតទៅ ចាប់ពីម៉ោង ៨:០០ ព្រឹកដល់៨:០០ យប់។
ទី២) ក្លិបបាល់ទាត់ភ្នំពេញក្រោន នឹងធ្វើការបរិច្ចាគចំណូលអំពីការលក់សំបុត្រទស្សនាការប្រកួតរវាងក្រុមភ្នំពេញក្រោន និងក្រុមអង្គរថាយហ្គឺ ដែលគូទាំងពីរនឹងប្រកួតនៅថ្ងៃទី១៤ ខែធ្នូ ឆ្នាំ២០២៥ ខាងមុខនេះ ដើម្បីជូនទៅកាន់កាកបាទក្រហមកម្ពុជា ក្នុងបុព្វហេតុជួយឧបត្ថម្ភដល់ជនភៀសសឹក។
ទី៣) ក្លិបបាល់ទាត់ព្រះខ័នរាជស្វាយរៀង នឹងបរិច្ចាគថវិការទាំងអស់ពីការលក់សំបុត្រទស្សនាការប្រកួតជាមួយអឹមអូអាយ កំពង់ដេវ៉ា ដែលគូទាំងពីរនឹងប្រកួតនៅថ្ងៃទី១៤ ខែធ្នូ ឆ្នាំ២០២៥ ខាងមុខនេះ ជូនទៅសមរភូមិមុខ ៕
