ខណៈដែលមានការបារម្ភអំពីការហក់ឡើងនៃតម្លៃប្រេងឥន្ទនៈនៅលើពិភពលោកដែលបានបណ្តាលមកពីសង្គ្រាមផ្ទុះឡើងនៅអ៊ីរ៉ង់នោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំក្រសួងពាណិជ្ជកម្ម ក្រសួងរ៉ែនិងថាមពល ព្រមទាំងក្រសួងសេដ្ឋកិច្ចនិងហិរញ្ញវត្ថុ តាមដានឱ្យបានជាប់លាប់រឿងតម្លៃប្រេងឥន្ធនៈ។ ជាមួយនឹងការណែនាំនេះ សម្តេចមហាបវរធិបតី ហ៊ុន ម៉ាណែត បានអំពាវនាវដល់ម្ចាស់ស្ថានីយប្រេងឥន្ធនៈនានា កុំដំឡើងថ្លៃ។
សម្តេចមហាបវរធិបតី ហ៊ុន ម៉ាណែត បានលើកឡើងបែបនេះ ក្នុងឱកាសអញ្ជើញបិទសន្និបាតអាជ្ញាធរជាតិប្រយុទ្ធប្រឆាំងគ្រឿងញៀន នាថ្ងៃទី៦ ខែមីនា ឆ្នាំ២០២៦។
សម្តេចថ្លែងយ៉ាងដូច្នេះថា «ក្រសួងពាណិជ្ជកម្ម ក្រសួងរ៉ែនិងថាមពល ព្រមទាំងក្រសួងសេដ្ឋកិច្ចនិងហិរញ្ញវត្ថុ តាមដានឱ្យបានជាប់ ទៅលើទិន្នន័យ និងការប្រែប្រួលប្រេង»។ក្នុងនោះការតាមដានត្រូវធ្វើលើការពិនិត្យមើលបរិមាណប្រេង ដែលត្រូវគ្រប់គ្រងនៅក្នុងប្រទេស និងការគ្រប់គ្រងលើតម្លៃ ដោយសម្តេចបញ្ជាក់ថា មានស្ថានីយ៍ខ្លះដំឡើងតម្លៃប្រេងហើយ។
ក្រសួងពាណិជ្ជកម្ម តាមរយៈអ្នកនាំពាក្យរបស់ខ្លួន នៅថ្ងៃទី៣ ខែមីនា ឆ្នាំ២០២៦ បានអំពាវនាវដល់បងប្អូនប្រជាពលរដ្ឋ សូមមេត្តាប្រើប្រាស់ប្រេងឥន្ធនៈដោយសន្សំសំចៃ ខណៈតម្លៃប្រេងចាប់ផ្តើមកើនឡើង ដោយសារការផ្ទុះសង្គ្រាមនៅតំបន់ដើមបូព៌ា បណ្តាលឱ្យកាត់ផ្តាច់នូវការផ្គត់ផ្គង់ប្រេង៕
អត្ថបទ៖ត្រយង