សិល្បៈអន្តរជាតិ៖ កំពូលមហាសេដ្ឋីលំដាប់ពិភពលោក Elon Musk បានប្រកាសកាលពីពេលថ្មីៗនេះថា លោកមានបំណងចង់ទិញក្រុមចម្រៀង K-Pop BTS ព្រោះតែក្រុមនេះកំពុងតែល្បីល្បាញនិងរកចំណូលខ្ពស់ជាងគេ នាពេលបច្ចុប្បន្ន។
នៅក្នុងវីដេអូខ្លីមួយដែលត្រូវបានគេយកមកបង្ហោះចែកចាយគ្នា រហូតធ្វើឱ្យក្រុម ARMY (ឈ្មោះក្រុមគាំទ្រ BTS) ផ្ទុះប្រតិកម្មនោះគឺ លោកមហាសេដ្ឋីអាហ្វ្រិកខាងត្បូង បានប្រកាសពីចេតនាចង់ទិញយកក្រុម BTS ដោយលោកបាននិយាយកំប្លែងថា លោកត្រូវសុំការអនុញ្ញាតពី ARMY សិន។
ហេតុអ្វី Elon Musk ចាប់អារម្មណ៍ចង់ទិញយកក្រុម BTS?
កំពូលមហាសេដ្ឋីរូបនេះកំពុងតែសម្លឹងរកមើលការបណ្ដាក់ទុនថ្មី ហើយលោកទទួលស្គាល់ថា លោកចូលចិត្តក្រុម BTS ប៉ុន្តែមូលហេតុដែលលោកចង់ទិញនោះគឺវាលើសពីការពេញចិត្តផ្ទាល់ខ្លួន ប៉ុន្តែក្រុមចម្រៀង K-pop មានម្លៃទាំងលើផ្នែកសិល្បៈ និងសេដ្ឋកិច្ច។
ក្រុមចម្រៀងដែលមានសមាជិក Jin, Suga, J Hope, RM, Jimin V និង Jungkook នេះគឺជាក្រុមដែលល្បីល្បាញបំផុតក្នុងចំណោមយុវវ័យទូទាំងពិភពលោក ចម្រៀង តន្ត្រី និងរូបភាពរបស់ក្រុមគឺមានតម្លៃជាទីបំផុត។
បច្ចុប្បន្ន BTS ស្ថិតក្នុង Agency HYBE (អតីត BigHit Entertainment) ដោយសមាជិកគ្រប់រូបមានភាគហ៊ុននៅក្នុងក្រុមហ៊ុន ចំណែកកុងត្រារបស់ពួកគេនឹងអស់សុពលភាពនៅឆ្នាំ២០២៧។
តាំងពីដុតភ្លើងតាមរយៈការបោះសម្ដីថាចង់ទិញយក BTS មកដល់ពេលនេះ Elon Musk មិនទាន់ចេញមកបញ្ជាក់ឬអះអាងថាលោកនៅតែមានមហិច្ឆិតាចង់ក្លាយជាម្ចាស់ក្រុមចម្រៀងកូរ៉េមួយនេះឬក៏យ៉ាងណានោះឡើយ។ អ្នកខ្លះបានលើកយករឿងនេះមកវិភាគថា លោកគ្រាន់តែនិយាយចោលប៉ុណ្ណោះ ដូចកាលពីលើកមុនដែលលោកនិយាយថាចង់ទិញ Coke និង McDonald’s ប៉ុន្តែមិនពិតនោះឡើយ៕
ប្រភព៖ បរទេស អត្ថបទ៖ ស្រាវជ្រាវ
