បន្ទាប់ពីការដណ្ដើមយកទីក្រុង Kherson មកវិញ អ៊ុយក្រែនធ្វើឲ្យកងកម្លាំងរុស្ស៊ីពិបាកស្មានអំពីផែនការវាយលុយបន្ទាប់របស់ពួកគេ ខណៈទីក្រុង ម៉ូស្គូ កំពុងរវល់ពង្រឹងកងទ័ពនៅទីតាំងការពារមិនមានពេលសម្រាប់ធ្វើប្រតិបត្តិការវាយបកទេ។ នេះបើយោងតាមការចេញផ្សាយដោយសារព័ត៌មាន Aljazeera នាថ្ងៃ សុក្រ ទី ២៥ ខែ វិច្ឆិកា ឆ្នាំ ២០២២។
កងទ័ពរុស្ស៊ីប្រហែល ៣០,០០០នាក់ ដែលបានដកខ្លួនចេញពីច្រាំងខាងលិចនៃទន្លេ Dnieper កាលពីដើមខែនេះ កំពុងពង្រឹងខ្លួននៅក្នុងតំបន់ Zaporizhia និង តំបន់ Kherson ក្នុងកំឡុងសប្ដាហ៍ទី៣៩ នៃសង្រ្គាម នេះបើយោងតាមការបញ្ជាក់របស់អនុប្រធានទីភ្នាក់ងារស៊ើបការណ៍យោធាអ៊ុយក្រែន ឧត្តមសេនីយ៍ទោ Vadym Skibitskyi ប្រាប់កាសែត Kyiv Post។
លោកឧត្ដមសេនីយ៍ទោ Skibitskyi បន្ដថា «កងកម្លាំងរុស្ស៊ីកំពុងរង់ចាំការវាយលុករំដោះរបស់យើង នោះហើយជាមូលហេតុដែលពួកគេបានបង្កើតខ្សែការពារនៅឯ Kherson ហើយមួយទៀតគឺ នៅព្រំដែនរដ្ឋបាលនៃតំបន់ Kherson និង តំបន់ Crimea និង មួយទៀតនៅតំបន់ភាគខាងជើង Crimea»។
ក្រុមមន្រ្តីអ៊ុយក្រែនបាននិយាយថា «សត្រូវកំពុងតែការពារនៅគោលដៅ Zaporizhzhia។ ចំណែកនៅក្នុងគោលដីទីក្រុង Kyivyi Rih និង Kherson សត្រូវកំពុងបង្កើតប្រព័ន្ធការពារដំឡើងឧបករណ៍បង្កើនការដឹកជញ្ជូន ប៉ុន្ដែមិនបញ្ឈប់ការបាញ់កាំភ្លើងធំមកលើទីតាំងនៃកងទ័ពរបស់យើង និង ការតាំងទីលំនៅ កងទ័ពរបស់យើង នៅច្រាំងខាងស្ដាំនៃទន្លេ Dnipro ឡើយ»។
ក្នុងការប្រកាសដកខ្លួនចេញពីទីក្រុង Kherson នៅថ្ងៃទី ០៩ ខែ វិច្ឆិកា អគ្គមេបញ្ជាការកងកម្លាំងរុស្ស៊ីប្រចាំប្រទេស អ៊ុយក្រែន លោក Alexander Surovikin បាននិយាយថា ខ្លួននឹងបង្កើនកម្លាំងមនុស្ស ដើម្បីពង្រឹងរណសិរ្សផ្សេងទៀត។
រុស្ស៊ីបាននិងកំពុងផ្ដល់អាទិភាពដល់ការកាន់កាប់តំបន់ Luhansk និង តំបន់ Donetsk នៅភាគខាងកើត ហើយកាំភ្លើងធំរបស់រុស្ស៊ីបានវាយលុកយ៉ាងសម្បើមទៅលើអ្នកការពារអ៊ុយក្រែននៅទីនោះពេញ ១សប្ដាហ៍។
គួរបញ្ជាក់ថា ទោះបីជាមានការកែនទ័ពចំនួន ៣០០,០០០នាក់ នៅក្នុងខែ កញ្ញា និង ខែ តុលា យ៉ាងណាក្ដី ក៏ហាក់បីដូចជានៅខែខ្វះខាតកម្លាំង ឬ ប្រហែលជាមិនអាចបំពាក់ឧបករណ៍ដល់កងកម្លាំងទាំងនោះបានគ្រប់គ្រាន៕
