សិល្បៈជាតិ៖ ថ្មីៗនេះរដ្ឋមន្ត្រីក្រសួងវប្បធម៌ និង វិចិត្រសិល្បៈបានផ្ដល់ជយលាភីតែងនិពន្ធប្រលោមលោកខ្នាតខ្លី និងកំណាព្យរឿង ពានរង្វាន់ព្រះនាងឥន្ទ្រទេវី ឆ្នាំ២០២២ ដល់ម្ចាស់ជយលាភីចំនួន១០រូប ដោយក្នុងនោះជាការចាប់អារម្មណ៍ ស្រាប់តែឃើញមានឈ្មោះ ចំរើន សុភ័ក្ត្រ ជាប់ជ័យលាភីលេខ៤ ផ្នែកកំណាព្យរឿង។
នៅថ្ងៃទី២៥ ខែវិច្ឆិកា ឆ្នាំ២០២២ នាសហសាលអង្គរវត្ត ទីស្ដីការក្រសួងវប្បធម៌និងវិចិត្រសិល្បៈបានរៀបចំកម្មវិធី «ប្រកាស និង ប្រគល់ពានរង្វាន់ ព្រះនាងឥន្ទ្រទេវីឆ្នាំ ២០២២ ដល់ជ័យលាភីប្រឡងជ្រើសរើសស្នាដៃតែងនិពន្ធប្រលោមលោកខ្នាតខ្លី និងកំណាព្យរឿង» ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ។
ជាការចាប់អារម្មណ៍ជយលាភីចំនួន ១០រូប ដែលឈ្នះពានរង្វាន់ព្រះនាងឥន្ទ្រទេវីឆ្នាំ២០២២ មានដូចតទៅ៖
១. ផ្នែកប្រលោមលោកខ្នាតខ្លី
- ជយលាភីលេខ១ ប្រលោមលោកខ្នាតខ្លីរឿង «បណ្ដឹងសហគមន៍» និពន្ធដោយលោក ហ៊ុយ សារ៉ាត់ មកពីខេត្តពោធិ៍សាត់
- ជយលាភីលេខ២ ប្រលោមលោកខ្នាតខ្លីរឿង «សំនៀងប៊ិឡានី» និពន្ធដោយលោក សុវណ្ណ សិរីវុឌ្ឍ មកពីរាជធានីភ្នំពេញ
- ជយលាភីលេខ៣ ប្រលោមលោកខ្នាតខ្លីរឿង «ថ្ងៃរះហើយពុក» និពន្ធដោយលោក ពៅ មករា មកពីរាជធានីភ្នំពេញ
- ជយលាភីលេខ៤ ប្រលោមលោកខ្នាតខ្លីរឿង «បាសាក់» និពន្ធដោយលោក តុន ច័័ន្ទរិទ្ធ មកពីបាត់ដំបង
- ជយលាភីលេខ៥ ប្រលោមលោកខ្នាតខ្លីរឿង «ក្រាំងតាត្រៅ» និពន្ធដោយលោក សៀង ឈុនលី មកពីកំពង់ស្ពឺ
២. ផ្នែកកំណាព្យរឿង
- ជយលាភីលេខ១ កំណាព្យរឿង «គុណការងារ» និពន្ធដោយលោក ភីរម្យ ដារ៉ា មកពីខេត្តស្ទឹងត្រែង
- ជយលាភីលេខ២ កំណាព្យរឿង «អ្នកគ្រូជាយដែន» និពន្ធដោយលោក មឿន សំណាង មកពីឧត្តរមានជ័យ
- ជយលាភីលេខ៣ កំណាព្យរឿង «មេស្រុក» និពន្ធដោយលោក ជួន ខ្មៅ មកពីខេត្តព្រហសីហនុ
- ជយលាភីលេខ៤ កំណាព្យរឿង «ព្យុះជីវិតនាងរស្មី» និពន្ធដោយលោក ចំរើន សុភ័ក្ត្រ មកពីខេត្តកំពត
- ជយលាភីលេខ៥ កំណាព្យរឿង «សន្សើមសន្ដិភាព» និពន្ធដោយលោក សាម សុនិត មកពីខេត្តកពង់ចាម
យ៉ាងណាមិញឈ្មោះជយលាភីលេខ៤ ដែលជាម្ចាស់ស្នាដៃកំណា្យរឿង «ព្យុះជីវិតនាងរស្មី» បង្កឱ្យមានការភ្ញាក់ផ្អើលបន្តិចដែរ ព្រោះសាធារណជនយល់ច្រឡំថា ម្ចាស់ជ័យលាភីរូបនោះ គឺជាតារាចម្រៀងប្រចាំផលិតកម្ម ហង្សមាស ចំរើន សុភ័ក្ត្រ ប៉ុន្តែការពិត ម្ចាស់ស្នាដៃកំណាព្យរឿងគឺជាបុរស មិនមែនតារាចម្រៀង ចំរើន សុភ័ក្ត្រ នោះឡើយ៕
