សិល្បៈជាតិ៖ លោក លៀក លីដា ធ្លាប់បានប្រកាសជាសាធារណៈម្ដងហើយពីគោលំហរមិនប្ដូរចំណងជើងរឿង បើទោះជាក្រុមហ៊ុនបរទេស ស្នើមកលោកក្ដី ដោយការរក្សាគោលជំហររបស់លោក ទទួលបាននូវការកោតសរសើរខ្លាំងពីសាធារណជន។ យ៉ាងណាមិញភាពយន្តខ្នាតធំរឿង «ប្រវត្តិស្នេហ៍នាងនាថ» នេះ ក៏នឹងបញ្ចូលនូវសិល្បៈវប្បធម៌ អរិយធម៌ខ្មែរ ឱ្យកូនចៅជំនាន់ក្រោយបានឃើញពីតថភាពនៃសង្គមខ្មែរនាជំនាន់ដើមផងដែរ។
នៅក្នុងការបង្ហោះមួយថ្មីៗនេះ លោក លៀក លីដា បានសំណូមពរដោយចំហរសូមឱ្យមានការលើកទឹកចិត្តដល់អ្នកផលិតពីសំណាក់ប្រជាជនពលរដ្ឋខ្មែរ ត្បិតអីភាពយន្តខ្នាតធំនេះបានបញ្ចូលនូវវប្បធម៌និងអរិយធម៌នៅក្នុងផ្ទៃនៃសាច់រឿងទាំងមូល។ លោកបានលើកឡើងថា៖ «វប្បធម៌អរិយធម៌ត្រូវបានដាក់បញ្ចូល នេះគឺជាជ្រុងមួយនៃរឿងប្រវត្តិស្នេហ៍នាងនាថ ដែលគេប្រើទូកងរបស់ខ្មែរដើម្បីទៅ ធ្វើសឹកសង្គ្រាម។ សូមបងប្អូនប្រជាពលរដ្ឋខ្មែរចូលរួម ថែរក្សា ស្រលាញ់វប្បធម៌និងចូលរួមគាំទ្រ លើកទឹកចិត្តដល់ អ្នកផលិត។ អរគុណ»
ភាពយន្តរឿង ប្រវត្តិស្នេហ៍នាងនាថ គឺជាភាពយន្តខ្នាតធំគុណភាពកម្រិតស្ដង់ដារអន្តរជាតិ ដែលចូលរួមសម្ដែងពីតារាសម្ដែងមីយ៉ាន់ម៉ា Paing Takhon តារាសម្ដែងកូនកាត់បារាំង Melia និងតារាសម្ដែងស្រីប្រុសល្បីៗប្រចាំព្រះរាជាណាចក្រកម្ពុជាជាច្រើនដួងទៀត៕
