ក្លិបមហាសេដ្ឋីម៉ាឡេស៊ី Johor Darul Ta’zim FC (JDT) បានប្រកាសអំពីការផ្ទេរខ្សែប្រយុទ្ធ Safawi Rasid សមាជិកជម្រើសជាតិម៉ាឡេស៊ី ទៅកាន់ក្លិប Ratchaburi សមាជិកលីគកំពូលថៃ Thai League 1 ក្នុងលក្ខខណ្ឌខ្ចីជើងចំនួន១រដូវកាល។
ដូច្នេះខ្សែប្រយុទ្ធរបស់ក្លិប Johor Darul Ta’zim FC រូបនេះ នឹងក្លាយជាកីឡាករកូតាអាស៊ានទី៣របស់ក្លិបបាល់ទាត់ Ratchaburi សមាជិកលីគកំពូលថៃ បន្ទាប់ពីកីឡាករមីយ៉ាន់ម៉ា Myo Min Latt និង Hein Phyo Win។
គួរដឹងថា Safawi Rasid កើតនៅថ្ងៃទី៥ ខែមីនា ឆ្នាំ១៩៩៧ នៅរដ្ឋ Terengganu ប្រទេសម៉ាឡេស៊ី បច្ចុប្បន្នមានវ័យ២៧ឆ្នាំ កម្ពស់ ១.៧៣ម៉ែត្រ ជាថ្នាលយុវជនរបស់ក្លិប Terengganu F.C. II នៅឆ្នាំ២០១៤ មុនផ្ទេរទៅកាន់ Johor Darul Ta’zim FC នៅឆ្នាំ២០១៧។
រយ:ពេល៥ឆ្នាំនៅទីនោះ Safawi Rasid បង្ហាញខ្លួនសរុប៨៦លើក ស៊ុតបញ្ចូលទី២៧គ្រាប់ ចំណែកឯក្នុងក្រុមជម្រើសជាតិម៉ាឡេស៊ី រូបគេធ្លាប់ជាប់តាំងពីឈុត U18, U23 ខណ:ឈុតធំជាប់នៅឆ្នាំ២០១៦ បង្ហាញខ្លួនលើទីលាន ៤៤ប្រកួត ស៊ុតបាន១៨គ្រាប់។ នៅរដូវកាលឆ្នាំ ២០២០-២០២១ កន្លងទៅរូបគេត្រូវបានក្លិប Portimonense S.C សមាជិកលីគកំពូលប្រទេសព័រទុយហ្គាល់ ខ្ចីជើងពីក្រុម JDT ផងដែរ។
គួរដឹងថាក្លិបបាល់ទាត់ Jorhor Darul Ta’zim របស់ព្រះអង្គម្ចាស់ Tunku Ismail Sultan Ibrahim បានគ្រងតំណែងជើងឯកពានរង្វាន់លីគកំពូលរបស់ប្រទេសម៉ាឡេស៊ី Malaysia Super League ចំនួន៩ឆ្នាំជាប់ៗគ្នាហើយ គឺគិតចាប់តាំងពីឆ្នាំ២០១៤ មកម៉្លេះ។
ក្លិបដែលមានកីឡដ្ឋានជាប់ឈ្មោះជាកីឡដ្ឋានស្អាតជាងគេបំផុតនៅលើលោកក្នុងឆ្នាំ២០២០ មួយនេះបានឡើងមកលេងពានរង្វាន់លីគកំពូលម៉ាឡេស៊ី នៅរដូវកាល២០០៥-២០០៦ ហើយឈ្នះជើងឯកជាប់ៗគ្នាគឺនៅឆ្នាំ២០១៤,២០១៥,២០១៦,២០១៧,២០១៨,២០១៩,២០២០,២០២១ និង២០២២ នេះ៕