នៅព្រឹកថ្ងៃទី០៦ ខែធ្នូ ឆ្នាំ២០២២ នេះក្លិបបាល់ទាត់វិសាខា បានចាប់ផ្ដើមធ្វើការជួសជុលស្មៅថ្មី ដើម្បីលើកកម្ពស់សោភ័ណភាព និងគុណភាពទីលានរបស់កីឡដ្ឋានព្រីនស៍ ឲ្យកាន់តែស្រស់ស្អាត និងល្អប្រសើរបន្ថែមទៀត។
ពោលគឺសម្រាប់ត្រៀមស្វាគមន៍រដូវកាលថ្មី និងការប្រកួតអន្ដរជាតិផ្សេងៗ នាពេលខាងមុខ ជាពិសេសព្រឹត្តិការណ៍កីឡាស៊ីហ្គេម ឆ្នាំ២០២៣ ដែលប្រទេសកម្ពុជាទទួលធ្វើជាម្ចាស់ផ្ទះ ខណ:ការជួសជុលកីឡដ្ឋានព្រីនស៍មួយនេះ គឺត្រូវប្រើរយៈពេលចន្លោះពី ៣ ទៅ ៤ខែប៉ុណ្ណោះ។
គួរដឹងថាកីឡដ្ឋានព្រីនស៍ ស្ថិតក្នុងចំណោមកីឡដ្ឋានចំនួន៣ ដែលត្រូវបានក្រុមមន្រ្តីបច្ចេកទេស សហព័ន្ធកីឡាបាល់ទាត់កម្ពុជា និងមន្ត្រីសម្របសម្រួល គណៈកម្មាធិការជាតិ រៀបចំស៊ីហ្គេម ឆ្នាំ២០២៣ ពិនិត្យពីសក្ដានុពល សម្រាប់រៀបចំការប្រកួតបាល់ទាត់ ក្នុងព្រឹត្តិការណ៍ស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ហេដ្ឋារចនាសម្ព័ន្ធទាំង៣ នោះ មានដូចជា៖ ពហុកីឡដ្ឋានជាតិ មរតកតេជោ កីឡដ្ឋាន Smart RSN និង កីឡដ្ឋានព្រីនស៍។ ចំពោះពហុកីឡដ្ឋានស្ដាតអូឡាំពិក ក៏កំពុងតែ កែលម្អពីស្មៅសិប្បនិម្មិត មកជាស្មៅធម្មជាតិ និងបំពាក់កៅអីថ្មីនោះ ក៏ជាកន្លែងសម្រាប់ ប្រកួតកីឡា ជាច្រើនប្រភេទ ដែលក្នុងនោះ ក៏មានបាល់ទាត់ដែរ៕
