សមាជិកអាយុក្រោម២២ឆ្នាំរបស់ក្រុមជម្រើសជាតិកម្ពុជា ចំនួន៣រូបស្ថិតក្នុងបញ្ជីកីឡាករ ១១នាក់ល្អជាងគេប្រចាំរដូវកាល ២០២២ នៃលីគកំពូលកម្ពុជាក្នុងកម្មវិធី CPL Football Award 2022។
កីឡាករល្អទាំង៣នាក់នោះរួមមាន៖ ខ្សែបម្រើប្រយុទ្ធ សារ ទី (វិសាខា), ខ្សែបម្រើប្រយុទ្ធ សៀង ចន្ធា (បឹងកេត) និងខ្សែប្រយុទ្ធ លឹម ពិសុទ្ធ (ភ្នំពេញក្រោន) ហើយពួកគេទាំង៣ក៏ស្ថិតក្នុងចំណោមកីឡាករចំនួន២៤នាក់ របស់ក្រុមជម្រើសជាតិកម្ពុជា ចេញដំណើរទៅប្រទេសម៉ាឡេស៊ី ដើម្បីប្រកួតមិត្តភាពអន្តរជាតិកម្ដៅសាច់ដុំជាមួយក្រុមជម្រើសជាតិម៉ាឡេស៊ី នៅថ្ងៃទី៩ ខែធ្នូ ឆ្នាំ២០២២ខាងមុខនេះ។
ជាពិសេសត្រៀមសម្រាប់ការប្រកួតពានរង្វាន់ AFF Mitsubishi Electric Cup 2022 ដែលគ្រោងនឹងប្រព្រឹត្តទៅចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ២០២៣។
១១នាក់ល្អជាងគេប្រចាំរដូវកាល ២០២២ ក្នុងទម្រង់ ៤-៣-៣ ដូចជា៖
អ្នកចាំទី៖ សាវែង សំណាង (ភ្នំពេញក្រោន)
ខ្សែការពារ៖ ឆេង ម៉េង (វិសាខា), អ៊ុក សុវណ្ណ (វិសាខា), សារ៉េត គ្រីយ៉ា (ព្រះខ័នរាជស្វាយរៀង), Mizanu Hikaru (ព្រះខ័នរាជស្វាយរៀង)
ខ្សែបម្រើ៖ ម៉ាត នូរុណ (បឹងកេត), សៀង ចន្ធា (បឹងកេត), សារ ទី (វិសាខា)
ខ្សែប្រយុទ្ធ៖ Andres Nieto (ភ្នំពេញក្រោន), Marcus Haber (ព្រះខ័នរាជស្វាយរៀង) និង លឹម ពិសុទ្ធ (ភ្នំពេញក្រោន)៕
