មែនទែនទៅ! ការងងុយគេង នៅអំឡុងពេលធ្វើការ បានក្លាយជារឿងធម្មតា ជាពិសេសអំឡុងបាយថ្ងៃត្រង់ហើយ។ ការកើតឡើងនៃការងងុយគេង កើតឡើងច្រើនយ៉ាង ជួនកាលមកពីការធ្វើការច្រើន គេងមិនគ្រប់ ការអស់កម្លាំង ឬញាំអាហារថ្ងៃត្រង់ហើយ រមែងងងុយដេក ភ្នែកចេះតែចង់បិទ បានធ្វើឲ្យរំខានអារម្មណ៍ដល់ការផ្ចង់ការងារ។ បញ្ហាទាំងអស់នេះ បានធ្វើឲ្យមនុស្សមួយចំនួនយកដំណោះស្រាយទទួលទានភេសជ្ជៈ ដែលមានជាតិកាហ្វេអ៊ីន បំបាត់ការងារងងុយគេ នៅពេលព្រឹក ឬពេលថ្ងៃត្រង់។ ដំណោះស្រាយនេះអាចល្អ និងមិនល្អ ព្រោះកាហ្វេអ៊ីន មានទាំងគុណសម្បត្តិ និងគុណវិបត្តិ។
ប្រិយមិត្តមួយចំនួនដែលមិនចង់ទទួលកាហ្វេ ហើយចង់បំបាត់ការងារងងុយគេង នៅអំឡុងធ្វើការ គឺអាចសាកល្បង វិធី៦យ៉ាងខាងក្រោមនេះបាន៖
១. ងើបចេញពីកៅអី៖ ការចំណាយពេលអង្គុយមុខកុំព្យូរទ័រយូរធ្វើឲ្យអស់កម្លាំង ដូច្នេះគួរក្រោកចេញពីកៅអី ហើយធ្វើលំហាត់ប្រាណ ដោយពត់ខ្លួនចុះឡើង ដើម្បីដាស់អារម្មណ៍ឲ្យស្វាងពីការងងុយគេង។
២. សម្រាកភ្នែក៖ នៅពេលយើងនៅមុខកំព្យូរទ័រ យូរពេកអាចធ្វើឲ្យងងុយដេក ព្រោះតែអស់កម្លាំង ដូច្នេះគួរលៃពេលសម្រាកភ្នែករបស់អ្នក កុំឲ្យអស់កម្លាំង ក៏ជាវិធីសាស្រ្តមួយជួយបានមួយផ្នែកដែរ។
៣. ធ្វើសកម្មភាព៖ ផ្អាកសកម្មភាពការងារបន្ដិច ហើយដើរចុះឡើង កុំឲ្យសរីរាង្គរបស់យើងនៅស្ងៀម ដែលធ្វើឲ្យយើងងងុយដេក ដូច្នេះការធ្វើសកម្មភាពដើរចុះឡើងក៏ជាផ្នែកមួយជួយឲ្យបាត់ងងុយដេកដែរ។
៤. ឥរិយាបទ អង្គុយធ្វើការ៖ ជួនកាលការអង្គុយនៅកៅអីមិនត្រឹមត្រូវធ្វើឲ្យឈឺចង្កេះ ខ្នង ហើយឈានទៅដល់ការងងុយដេក ដូច្នេះគួរប្ដូរទម្លាប់មិនល្អមួយចំនួន ហើយគួរសម្រាកការងារបន្ដិច ហើយតម្រង់ខ្នងរបស់អ្នកឲ្យត្រង់ ក៏ជាផ្នែកមួយជួយដល់ស្មារតីរបស់អ្នកកំពុងផ្ចង់ការងារ។
៥. អាហារបំប៉ន៖ ការធ្វើការច្រើនរមែងធ្វើឲ្យឆាប់អស់កម្លាំង ម៉្លោះហើយយើងរមែងចង់ងងុយដេក ដូច្នេះយើងគួរគប្បីហូបអាហារដែលបំប៉នសុខភាព ឬអាហារប៉ូវកម្លាំង ដើម្បីធ្វើឲ្យយើងមានសុខភាពរឹងមាំ ឈ្នះនៅភាពងងុយដេកបាន។
៦. ជជែក៖ ងើបឡើងដើរចុះដើរឡើងហើយ និងទទួលទានអាហារបំប៉នហើយ នៅតែងងុយដេក ប្រិយមិត្តគួរគប្បីរកអ្នកជជែកពីនេះពីនោះ ដើម្បីបន្លប់ការងងុយដេក ប៉ុន្ដែហាមរឿងមួយកុំទម្លាប់ជជែករឿងមិនល្អរបស់ក្រុមការងារ ឬមេដឹកនាំ ដែលនាំឲ្យខាតប្រយោជន៍៕
តើប្រិយមិត្តមានគន្លឹះអ្វីបន្ថែម អាចជួយផ្ដល់យោបល់បាន !