ពិធីបុណ្យណូអែល ដែលភាសាអង់គ្លេសហៅថា Christmas ជិតឈានចូលមកដល់ហើយ ខណ:ពិធីនេះ ជាពិធីបុណ្យដ៏ធំមួយរបស់បណ្ដាប្រទេសអ្នកកាន់សាសនាគ្រិស្ត តែងតែធ្វើឡើងវិលជុំ ជារៀងរាល់ឆ្នាំ ចំថ្ងៃទី២៥ ខែធ្នូ។
ចុះក្នុងវិស័យបាល់ទាត់វិញ តើនៅលើពិភពលោកមានក្រុមបាល់ទាត់ Santa Claus ដែរឬទេ? ដើម្បីជ្រាបកាន់តែច្បាស់តោះៗ ទៅស្វែងយល់ទាំងអស់គ្នា!
ក្លិបបាល់ទាត់ Santa Claus FC ដែលមានមូលដ្ឋាននៅទីក្រុង Rovaniemi ប្រទេសហ្វាំងឡង់ ដែលបច្ចុប្បន្នកំពុងលេងនៅលីគ Vitonen ដែលស្ថិតនៅកម្រិតទីប្រាំមួយ នៃលីគបាល់ទាត់របស់ប្រទេសហ្វាំងឡង់។
ក្លិបបាល់ទាត់ Santa Claus ឈ្មោះហៅក្រៅថា Santa មានលោក Juha Eteläinen ជាប្រធាន ត្រូវបានបង្កើតឡើងដំបូងនៅឆ្នាំ ១៩៩២ តាមរយៈការរួមបញ្ចូលគ្នានៃ Rovaniemen Reipas និង Rovaniemen Lappi។
បន្ទាប់ពីដំណើរការអស់រយ:ពេល២០រដូវកាល ក្លិបក៏បានប្រកាសក្ស័យធននៅឆ្នាំ ២០១២ ហើយក៏បានបង្កើតឡើងវិញជាអង្គភាពថ្មីមួយក្រោមឈ្មោះថា FC Santa Claus Arctic Circle លុះនៅឆ្នាំ ២០១៩ ក្លិបបាល់ទាត់ Santa Claus ប្រកាសរំសាយចោលទាំងស្រុងតែម្តង។
ជាថ្មីម្តងទៀតនៅឆ្នាំ ២០២១ ក្លិបចាប់ផ្តើមបង្កើតឡើងសារជាថ្មី ហើយបន្តដាក់ឈ្មោះ Santa Claus FC ដដែល ដោយប្រើប្រាស់កីឡដ្ឋាន Saarenkylän ដែលអាចផ្ទុកអ្នកគាំទ្របាន១,០០០នាក់ ចូលរួមលីគលំដាប់ទី៦ នៃលីគបាល់ទាត់របស់ប្រទេសហ្វាំងឡង់។
រយ:ពេល១រដូវកាល ក្រោយចាប់ដំណើរការឡើងវិញ ក្លិបបាល់ទាត់ Santa Claus FC ក្រោមការដឹកនាំរបស់លោក Santtu Pätäri បានបញ្ចប់ចំណាត់ថ្នាក់លេខ៥ ដោយឆ្លងកាត់១២ប្រកួត ឈ្នះ៣ ស្មើ១ និងចាញ់៨ដង។
ខណ:រដូវកាល ២០២២ ក្លិបបាល់ទាត់ Santa Claus FC ចាប់ផ្តើមធ្វើបានខ្លាំង ពោលគឺបញ្ចប់ចំណាត់ថ្នាក់លេខ២ ក្រោយឆ្លងកាត់១៦ប្រកួត ឈ្នះ១១ ស្មើ១ និងចាញ់៤។
សរុបចាប់តាំងពីឆ្នាំ ១៩៩២ នៅពេលក្លិប Santa Claus បង្កើតឡើងដំបូង រហូតមកដល់បច្ចុប្បន្នឆ្នាំ ២០២២ ធ្លាប់ឈ្នះពានរង្វាន់ចំនួន៧គ្រឿងដូចជា៖
-Kakkonen លីគកំដាប់ទី៣ នៅឆ្នាំ ២០១០
-Kolmonen លីគលំដាប់ទី៥ នៅឆ្នាំ ២០០១, ២០០៨ និង ២០១៤
-Midnattsolscupen Cup នៅឆ្នាំ ១៩៩៤
-Nelonen លីគលំដាប់ទី៤ នៅឆ្នាំ ២០១៥, ២០១៧៕