ក្រុមជម្រើសជាតិកម្ពុជានឹងត្រូវបើកទ្វាកីឡដ្ឋានជាតិមរតកតេជោដើម្បីទទួលក្រុមជម្រើសជាតិប្រ៊ុយណេ ប្រកួតពានរង្វាន់ AFF Mitsubishi Electric Cup 2022 ដែលនឹងប្រព្រឹត្តទៅនៅថ្ងៃទី២៩ ខែធ្នូ ស្អែក វេលាម៉ោង ៥:00នាទីល្ងាចតទៅ។
មុនពេលប៉ះក្រុមកម្ពុជាលោក Mario Rivera គ្រូបង្វឹករបស់ក្រុមជម្រើសជាតិប្រ៊ុយណេ បានបង្ហាញចំណាប់អារម្មណ៍ក្នុងសន្និសីទសារព័ត៌មានថា៖ «សម្រាប់ការប្រកួតនៅថ្ងៃស្អែក គឺជាការប្រកួតដ៏តានតឹងមួយសម្រាប់ពួកយើង ព្រោះកម្ពុជា ជាក្រុមខ្លាំង»។
គ្រូបង្គោលប្រ៊ុយណេ សញ្ជាតិអេស្ប៉ាញរូបនេះបន្ថែមថា៖ «យើងកមពុងបន្តការកែលម្អក្រុមរបស់ពួកយើងនៅរាល់គ្រប់ការប្រកួត ដើម្បីឲ្យទទួលបានលទ្ធផលល្អបំផុតដូចពីមុន ហើយវាគឺជាអាទិភាពក្នុងក្រុមរបស់យើង។ យើងនឹងព្យាយាមឲ្យអស់ពីសម្ថភាពដើម្បីទទួលបានអ្វីមួយសម្រាប់ការប្រកួតនៅថ្ងៃស្អែក»។
គួររំលឹកថា កម្ពុជានិងប្រ៊ុយណេ គឺជាក្រុមដែលស្ថិនៅក្នុងពូល A។ ឆ្លងកាត់ការប្រកួត ២ប្រកួតកម្ពុជាឈ្នះហ្វីលីពីន ក្នុងលទ្ធផល ៣-២ និងចាញ់ឥណ្ឌូណេស៊ី ២-០ ខណ:ប្រ៊ុយណេ ឆ្លងកាត់ ៣ប្រកួតចាញ់ទាំងអស់ ចាញ់ថៃ ៥-០ ចាញ់ហ្វីលីពី ៥-១ និងចាញ់ឥណ្ឌូណេស៊ី ៧-០។
គិតត្រឹមថ្ងៃនេះតារាងចំណាត់ថ្នាក់ពូល A បណ្តោះអាសន្ន៖ ថៃ ឈរនៅកមពូលតារាង មាន៦ពិន្ទុ, ឥណ្ឌូណេស៊ី លេខ២មាន ៦ពិន្ទុ, កម្ពុជា លេខ៣មាន ៣ពិន្ទុ, ហ្វីលីពីន លេខ៤មាន ៣ពិន្ទុ ៥. ប្រ៊ុយណេ សូន្យពិន្ទុ។ តារាងចំណាត់ថ្នាក់ពូល B បណ្តោះអាសន្ន៖ ម៉ាឡេស៊ី ឈរនៅកមពូលតារាង មាន ៦ពិន្ទុ, វៀតណាម លេខ២មាន ៦ពិន្ទុ, សិង្ហបុរី លេខ៣មាន ៦ពិន្ទុ ខណ: មីយ៉ាន់ម៉ា និងឡាវ មានសូន្យពិន្ទុ៕