សិល្បៈអន្តរជាតិ៖ ចាប់តាំងពីបុរសសង្ហា Song Jong Ki បានទម្លាយពីទំនាក់ទំនងស៊ីជម្រៅរបស់ខ្លួន ក៏មានលេចចេញនូវព័ត៌មានចចាមអារ៉ាមជាច្រើនពីអត្តសញ្ញាណមិត្តស្រីថ្មីរបស់គេ។ បើទោះជាតារារូបនេះបិទមាត់យ៉ាងជិតមិនប្រាប់ថានារីដែលក្ដោបបានបេះដូងខ្លួនជានរណា តែមានដំណឹងលេចចេញមកថានារីម្នាក់នោះគឺជាអតីតតារាសម្ដែងអង់គ្លេសវ័យ ៣៨ឆ្នាំ។
ដំណឹងដ៏រសើបពីទំនាក់ទំនងរបស់អ្នកទាំងពីរនេះត្រូវបានទម្លាយចេញមកទៀត គូស្នេហ៍ថ្មោងថ្មីបានទៅចូលរួមកម្មវិធីរៀបអាពាហ៍ពិពាហ៍ជាមួយគ្នាជាច្រើនលើកច្រើនសារ ប៉ុន្តែមិនទាន់មានអ្នកណាចាប់អារម្មណ៍ព្រោះប្រុសស្អាតវ័យ៣៧ឆ្នាំ មិនទាន់បង្ហើបឱ្យអ្នកណាបានដឹងថាខ្លួនកំពុងតែមានស្នេហាថ្មី។
តាមដឹងសង្សារថ្មីរបស់ Song Joong Ki នាង Katy Louise គឺជាគ្រូបង្ហាត់ភាសាអ៊ីតាលីឱ្យគេនៅពេលដែលគេសម្ដែងភាពយន្ត «Vincenzo» ដែលតួឯកប្រុសគឺជាមេធាវីម៉ាហ្វៀអាចប្រើប្រាស់ភាសាអ៊ិតាលីនិងកូរ៉េ។ហើយបើតាមការផ្សាយពីសារព័ត៌មានកូរ៉េបានឱ្យដឹងទៀតថា Song Joong Ki និងសង្សារស្រលាញ់គឺបានជាង១ឆ្នាំហើយ។
ដំណឹងស្នេហារវាងបុរសមានមន្ដស្នេហ៍រូបនេះមិនសូវមានការចាប់អារម្មណ៍ច្រើនទេបើប្រៀបនឹងដំណឹងចុងក្រោយដែលបានទម្លាយចេញមកថា Katy មានកូនស្រីម្នាក់អាយុ ១០ឆ្នាំ ដោយភ្ជាប់ជាមួយនឹងរូបថត Katy មានពោះធំ នៅក្នុងកម្មវិធីមួយនាប្រទេសអ៊ីតាលីកាលពីឆ្នាំ២០១២ ព្រមទាំងរូបនាងជាមួយនឹងក្មេងស្រីសក់ ពណ៌ទង់ដែង ដែលគេអះអាងថាគឺជាកូនស្រីរបស់នាង។
អ្នកគាំទ្រជាច្រើនបានបង្ហាញការភ្ញាក់ផ្អើលយ៉ាងខ្លាំង ដែលកំពូលតារាសម្ដែងរបស់ប្រទេសកូរ៉េរូបនេះទាក់ទងជាមួយនឹងស្ដ្រីកូនមួយ ប៉ុន្តែជាសំណាងល្អដែលអ្នកបញ្ចេញមតិជាច្រើនមិនបានវាយប្រហារទៅលើបញ្ហានេះនោះទេ។
«Song Joong Ki ធ្លាប់រៀបការពីមុន ខ្ញុំមិនគិតថានេះគឺជាបញ្ហានោះទេ។» «នេះគឺជារឿងផ្ទាល់ខ្លួនរបស់គេ ហេតុអីយើងជាអ្នកដទៃសោះត្រូវទៅខ្វល់?» «សង្ឃឹមថាអ្នកទាំងពីរនឹងមានក្ដីសុខ» ទាំងអស់នេះគឺជាមតិលើកឡើងខ្លះៗរបស់អ្នកគាំទ្រដែលលើកទឹកចិត្តនិងផ្ដល់កម្លាំងចិត្តដល់គូស្នេហ៍ទាំងពីរ។
ប្រភព៖ 8days