ក្រុមបាល់ទាត់មជ្ឍមណ្ឌលកងយោធពលខេមរភូមិន្ទ (ទ័ព) បានយកឈ្នះលើក្រុមម្ចាស់ផ្ទះព្រះខ័នរាជស្វាយរៀង នៅក្នុងប្រកួតបិទពូល B នៃពានរង្វាន់ League Cup 2021 By Forward នៅល្ងាចថ្ងៃសៅរ៍ ទី១៩ ខែមិថុនា ឆ្នាំ២០២១ លើទីលានកីឡដ្ឋានខេត្តស្វាយរៀង។
ក្រោយប្រកួត៩០នាទីពេញ បញ្ចប់ទៅក្រុមទាំង២ស្មើគ្នា ១ទល់១ ដែលកីឡាករ អ៊ាន ពិសី រកគ្រាប់បាល់ឱ្យព្រះខ័នរាជស្វាយរៀង មុននៅនាទី៧៥ ខណៈកីឡាករប្រេស៊ីល Romario បានរកគ្រាប់បាល់ឱ្យក្រុមទ័ព ក្រោយទាត់បាល់ពិន័យ១១ម៉ែត្របានសម្រេច។
លទ្ធផលនេះបានធ្វើឱ្យក្រុមទាំង២ ទាត់បាល់ប៉េណាំងទីកាត់សេចក្តី ដើម្បីរកអ្នកខ្លាំងក្នុងពូល B ហើយជាលទ្ធផលក្រុមទ័ព បានយកឈ្នះព្រះខ័នរាជស្វាយរៀង ដោយលទ្ធផល ៥ទល់៣។ ដូច្នេះក្រុមទ័ព ឈរលេខ១ ហើយព្រះខ័នរាជស្វាយរៀង ឈរលេខ២ នៅក្នុងពូល B។
សម្រាប់គម្រោងប្រកួតបន្ទាប់មានការប្រែប្រួល ដោយក្រុមព្រះខ័នរាជស្វាយរៀង ត្រូវប៉ះក្រុមវិសាខា ហើយក្រុមឈ្នះ មានកៅអីឡើងទៅជួបក្រុមទ័ព នៅវគ្គផ្ដាច់ព្រ័ត្រ ដើម្បីដណ្តើមជើងឯក។
ចំណែកគូប្រកួតរវាងក្រុម អាយ.អេស.អាយ ដង្កោសែនជ័យ ជាមួយក្រុមវិសាខា នៅវេលាម៉ោង៣:៣០នាទីរសៀល នៅថ្ងៃសៅរ៍ ទី ១៩ ខែមិថុនា ឆ្នាំ២០២១ លើទីលានបាល់ទាត់ KMH Park ក្នុងរាជធានីភ្នំពេញ បានរំសាយចោល ដោយសារកីឡាករខាងក្រុម អាយ.អេស.អាយ ដង្កោសែនជ័យ មានវិជ្ជមានជំងឺកូវីដ-១៩។
ចំណែកព័ត៌មានបន្ថែមនៃការកែប្រែរូបមន្តប្រកួតនៅក្នុងពានរង្វាន់ League Cup 2021 By Forward នេះសារព័ត៌មានត្រយង នឹងជម្រាបជូននៅពេលក្រោយ៕