សិល្បៈអន្តរជាតិ៖ ដំណឹងស្នេហាដែលធ្វើឱ្យអ្នកគាំទ្រភ្ញាក់ផ្អើលព្រោះនឹកស្មានមិនដល់រវាងបុរសសង្ហាបបូរមាត់ព្រែក Lee Jong Suk និងតារាចម្រៀងរាងតូចច្រឡឹង IU នៅតែស្ថិតក្រោមការតាមដាននិងចង់ដឹងចង់ឮពីសំណាក់អ្នកគាំទ្រ។ ជាការពិតណាស់ IU គឺជានារីសាច់ក្រអូbដែលមានកន្លង់ជាច្រើនប៉ងប្រាថ្នា ប៉ុន្តែ បុប្ផាមួយទងនេះមានម្ចាស់ថែរក្សារួចទៅហើយ ក្រោយទំនាក់ទំនងស្នេហាត្រូវបានសារព័ត៌មាន Dispatch ទម្លាយជាសាធារណៈ។
មែនទែនទៅស្រីស្អាត IU មិនមែនទើបតែត្រូវសារព័ត៌មានផ្សាយពីចំណងស្នេហារបស់នាងជាលើកដំបូងនោះទេ ព្រោះកន្លងៗមកស្រីតូចរូបនេះក៏ធ្លាប់ប្រកាសពីទំនាក់ទំនងស្នេហារបស់ខ្លួន ក៏ដូចជាត្រូវសារព័ត៌មានផ្សព្វផ្សាយពីដំណឹងចចាមអារ៉ាមស្នេហាផងដែរ? តើអ្នកធ្លាប់ដឹងទេថា IU ធ្លាប់ប្រកាសថាខ្លួនមានសង្សារប៉ុន្មានដង ហើយត្រូវសារព័ត៌មានចុះផ្សាយរឿងអាស្រូវស្នេហាថាធ្លាប់ទាក់ទងនឹងបុរសណាខ្លះ?
រឿងរ៉ាវស្នេហារបស់ IU តែងតែត្រូវសាធារណជនចាប់អារម្មណ៍និងតាមដានជានិច្ច សូម្បីតែពេលដែលនាងចេញបទចម្រៀងថ្មីដែលមានអត្ថន័យផ្អែមល្ហែម ក៏ត្រូវបានគេលើកសេចក្ដីសន្និដ្ឋានថា IU ប្រហែលជាកំពុងតែមានស្នេហា។ កត្តាទាំងអស់នេះហើយធ្វើឱ្យ IU ជារឿយៗតែងតែត្រូវបានអ្នកសារព័ត៌មានទាញភ្ជាប់នឹងព័ត៌មានស្នេហា រហូតសាមីខ្លួនត្រូវចេញមកបដិសេធដំណឹងចចាមអារ៉ាមទាំងអស់នេះថាមិនមែនជាការពិតដោយផ្ទាល់ខ្លួន។ ប៉ុន្តែនៅក្នុងចំណោមដំណឹងចចាមអារ៉ាមស្នេហាទាំងអស់នោះ មានមួយចំនួនដែរដែល IU ហ៊ានទទួលស្គាល់ថាកញ្ញាពិតជាទាក់ទងជាមួយនឹងបុរសនោះពិតប្រាកដមែន។
ចាប់តាំងពីបោះជំហានចូលប្រឡូកសិល្បៈនាឆ្នាំ២០០៨ IU ធ្លាប់ជួបរឿងអាស្រូវស្នេហារាប់មិនអស់ ប៉ុន្តែដំណឹងស្នេហាដែលល្បីល្បាញនិងមានការចាប់អារម្មណ៍ខ្លាំងគឺនៅក្នុងឆ្នាំ២០១២ បន្ទាប់ពីមានរូបភាព IU និង Eunhyuk សមាជិក Super Junior បែកធ្លាយចេញមកខាងក្រៅ រហូតមានដំណឹងលេចឮតៗគ្នាពីសម្ព័ន្ធភាពរបស់អ្នកទាំងពីរ ប៉ុន្តែក្រោយមកផលិតកម្មគ្រប់គ្រងលើ IU បានចេញមកបដិសេធព្រមទាំងបញ្ជាក់ថាអនកទាំងពីរគឺជាសិស្សច្បងសិស្សប្អូនក្នុងវិស័យសិល្បៈដែលស្និតស្នាលគ្នាខ្លាំងប៉ុណ្ណោះ។
មួយឆ្នាំក្រោយមកពោលគឺនៅឆ្នាំ 2013 សារព័ត៌មាន Dispatch បានទម្លាយរូបភាព IU និង Lee Hyun-woo ដែលមើលទៅដូចជាកំពុងតែណាត់ជួបគ្នា ប៉ុន្តែភ្លាមៗនោះតំណាងឱ្យភាគីខាង IU បានចេញមកបដិសេធថាមិនមែនជាការពិត អ្នកទាំងពីរគ្រាន់តែជាមិត្តភក្ដិជិតស្និទ្ធនឹងគ្នាប៉ុណ្ណោះ ដោយក្រោយមកអ្នកទាំងពីរបានត្រលប់មករួមការងារសម្ដែងជាមួយគ្នាម្ដងទៀត ដែលបញ្ជាក់ឱ្យឃើញថារវាងអ្នកទាំងពីរគឺជាមិត្តជិតស្និទ្ធិនឹងគ្នាពិតប្រាកដមែន។
ក្រោយត្រូវចេញមកបដិសេធចំពោះដំណឹងស្នេហានេះរហូតដល់ទៅ២ដង នៅឆ្នាំ២០១៥ សារព័ត៌មាន Dispatch ក៏បានចេញព័ត៌មានរឿងស្នេហារបស់ IU ជាថ្មីម្ដងទៀត ដោយលើកនេះព័ត៌មានបានលើកឡើងថានាងកំពុងតែសេពគប់មើលចិត្តគ្នាជាមួយនឹងតារារៀមច្បងដែលមានអាយុលើសខ្លួនរហូត១១ឆ្នាំ ឈ្មោះ Chang Kiha ដោយអ្នកទាំងពីរស្គាល់គ្នាដំបូងកាលពីឆ្នាំ២០១៣។ ម្ដងនេះតំណាង IU មិនបានចេញមកបដិសេធដូចរាល់ដងនោះឡើយ ប៉ុន្តែបានចេញមកទទួលស្គាល់ថាអ្នកទាំងពីរពិតជាស្រលាញ់គ្នាពិតមែន ប៉ុន្តែគួរឱ្យស្ដាយ ស្រលាញ់គ្នាបានត្រឹម២ឆ្នាំ ចំណងស្នេហ៍អ្នកទាំងពីរបានបញ្ចប់ត្រឹមឆ្នាំ២០១៧។
ក្រោយបែកសង្សារមានដំណឹងថា IU មានទំនាក់ទំនងជាមួយនឹង Lee Jun Ki និង Kang Ha Neul ដែលជាបានសម្ដែងភាពយន្ត Moon Lovers: Scarlet Heart Ryeo ជាមួយគ្នា ក្នុងឆ្នាំ២០១៨ដដែលនេះក៏មានដំណឹងថា IU កំពុងមានទំនាក់ទំនងជាមួយនឹង ZICO ដែលជាមិត្តភក្ដិស្គាល់គ្នា១០ឆ្នាំ ប៉ុន្តែអ្នកទាំងពីរបានចេញមកបដិសេធ ហើយទទួលស្គាល់ថាគ្រាន់តែស្និតស្នាលនឹងគ្នាប៉ុណ្ណោះ។ យ៉ាងណាមិញធ្លាប់មានអ្នកសង្ស័យពីទំនាក់ទំនង IU និង Yoo Jin Goo ដែលជាតួឯកប្រុសសម្ដែងរឿង Hotel De Luna ដោយរឿងនេះនៅតែស្ថិតក្នុងការសង្ស័យព្រោះមិនមានភាគីណាចេញមកទទួលស្គាល់ឬបដិសេធនោះឡើយ។
ដំណឹងស្នេហា IU ចាប់ផ្ដើមមានការចាប់អារម្មណ៍ជាថ្មីនៅពេលដែលនាងបញ្ចេញបទចម្រៀង «Strawberry Moon» ដែលមានអត្ថន័យពោរពេញទៅដោយស្នេហា ព្រោះមានអ្នកសង្ស័យថា IU អាចកំពុងមានស្នេហា ទើបអាចសរសេរអត្ថបទចម្រៀងផ្អែមល្ហែមបែបនេះបាន។ ក្នុងនោះមានអ្នកទាយពីឈ្មោះតារាប្រុសដែលអាចកំពុងបង្កាត់ភ្លើងស្នេហ៍ជាមួយនឹង IU ដូចជា Park Seo-joon, Baekhyun EXO, Suga BTS, Joongkok BTS, Sung Si-kyung ,G-Dragon ប៉ុន្តែនេះគ្រាន់តែការទាយរបស់អ្នកគាំទ្រប៉ុណ្ណោះ។
IU ក៏ធ្លាប់មានដំណឹងស្នេហាជាមួយនឹងបុរសសង្ហា Yoo Ah In បន្ទាប់ពីអ្នកទាំងពីរបានទៅចូលរួមកម្មវិធី Fashion Show នៅអ៊ីតាលីជាមួយគ្នាដោយចៃដន្យ ហើយក្រោយមានទៀតមានព័ត៌មានចចាមអារ៉ាមថាអ្នកទាំងពីរលួចណាត់គ្នាទៅដើរលេងនៅប៉ារីស។
យ៉ាងណាមិញដំណឹងចចាមអារ៉ាមទាំងអំបាលម៉ានបានសាបរលាបអស់ហើយការពិតបានលេចឡើងនៅពេលដែលសារព័ត៌មាន Dispatch បានទម្លាយរូបភាពព្រមទាំងដំណឺងស្នេហារវាង IU និង Lee Jung Suk កាលពីថ្ងៃទី៣១ ខែធ្នូ ឆ្នាំ២០២២ ដោយបញ្ជាក់ថាអ្នកទាំងពីរស្រលាញ់គ្នាបាន៤ខែហើយ។ ជាថ្មីម្ដងទៀតផលិតកម្មតំណាងឱ្យតារាទាំងពីរដួងបានចេញមកទទួលស្គាល់ថាអ្នកទាំងពីរពិតជាកំពុងស្រលាញ់គ្នាមែន ដែលធ្វើឱ្យរឿងរ៉ាវស្នេហារបស់អ្នកទាំងពីរក្លាយជាដំណឹងធំចុងឆ្នាំ២០២២។
សូមជូនពរគូស្នេហ៍ថ្មោងថ្មី ឱ្យស្រលាញ់គ្នានិងឆ្លងកាត់ឧបសគ្គទាំងអស់ជាមួយគ្នា និងអាចកាន់ដៃគ្នាចូលរោងការឆាប់ៗនេះ៕
ប្រភព៖ បរទេស
