ឯកឧត្ដម ស សុខា ប្រធានគណៈកម្មការរៀបចំការប្រកួតពានរង្វាន់ Soccer League លើកទី៦ រដូវកាលថ្មីឆ្នាំ២០២៣ បានមានប្រសាសន៍ថា៖ «ក្រោមការចង្អុលបង្ហាញពី ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា(ស.ស.យ.ក) ការរៀបចំការប្រកួតពានរង្វាន់ Soccer League នឹងគ្រោងរៀបចំឲ្យបាន១០រដូវកាល»។ ការលើកឡើងនេះក្នុងពិធីស្និសីទសាព័ត៌មាន និងចាប់ឆ្នោតជ្រើសរើសពូលការប្រកួតកីឡាបាល់ទាត់ពាន់រង្វាន់ Soccer League លើកទី៦ ឆ្នាំ២០២៣ កាលពីថ្ងៃទី៣០ ខែធ្នូ ឆ្នាំ២០២២។
ឯកឧត្ដម ស សុខា បន្តថា៖«ដោយលើកនេះគឺជាលើកទី៦ហើយ ដូចនេះនៅសល់៤ឆ្នាំបន្ទាប់ទៀត ហើយនឹងបន្តឲ្យអ្នកជំនាន់ក្រោយធ្វើការរៀបចំបន្តទៀត។ ឯកឧត្ដម លើកឡើងថាការប្រកួតពានរង្វាន់ពាក់កណ្ដាលអាជីពនេះ មិនផ្ដោតសំខាន់តែលើការប្រកួតប្រជែងយកឈ្នះចាញ់ តែអ្វីដែលជាគោលដៅសំខាន់ គឺការចូលរួមដើម្បីសុខភាព មិត្តភាព និងសាមគ្គីភាព រវាងក្រសួង-ស្ថាប័ននីមួយៗ ក៏ដូចជាការផ្ដល់ឱកាសសម្រាប់យុវជនផងដែរ»។
ឯកឧត្ដម បន្ថែមថា «ការរៀបចំប្រកួតពានរង្វាន់នេះគឺដើម្បីឲ្យកីឡាករបង្កើនភាពស្និតស្នាល លើសពីនេះក៏នឹងអាចជួយឱ្យកម្ពុជាស្វែងរកបានកីឡាករឆ្នើមៗពីព្រឹត្តការណ៍នេះ ដោយកន្លងមកក៏ធ្លាប់មានកីឡាករចេញពីក្រុមលេងនៅ Soccer League នេះ ចូលរួមក្នុងក្រុមអាជីពនៅលីគកំពូលកម្ពុជាផងដែរ»។
ពានរង្វាន់ Soccer League លើកទី៦ រដូវកាលថ្មីឆ្នាំ២០២៣មានក្រុម/ក្លិបចូលរួមសរុបដល់ទៅ៧៤ក្រុម ក្រុមបុរសមានចំនួន ៦៤ក្រុម និងក្រុមនារីមានចំនួន ១០ក្រុម និងមានប្រាក់រង្វាន់កើនដល់២៥លានរៀល សម្រាប់ជ័យលាភីលេខ១។
គួរបញ្ជាក់ថា ការប្រកួតពានរង្វាន់ Soccer League លើកទី៦ ឆ្នាំ២០២៣ នឹងចាប់ផ្ដើមការប្រកួតពីថ្ងៃទី០៧ ខែមករា ដល់ថ្ងៃទី០៥ ខែកុម្ភៈ ឆ្នាំ២០២៣ ខាងមុខ ដោយគ្រោងប្រើប្រាស់ទីលានចំនួន៩ និងកីឡដ្ឋាមួយចំនួនទៀតដើម្បីធ្វើការប្រកួត៕