ក្រោយមានលេចឮព័ត៌មានចេញមកថា មានស្ថានីយទូរទស្សន៍មួយមានបុគ្គលិកឆ្លងជំងឺកូវីដ-១៩ ជាច្រើននាក់ ថ្មីៗនេះស្ថានីយទូរទស្សន៍ Workpoint Entertainment បានចេញមកប្រកាសបិទស្ទីតយ៉ូថត និង ផ្នែកការងារការិយាល័យចំនួន ១១ ថ្ងៃដើម្បីធ្វើការសម្អាត និង បាញ់ថ្នាំសម្លាប់មេរោគ។
យោងតាមសេចក្ដីប្រកាសរបស់ស្ថានីយមួយនេះ បានឱ្យដឹងថាស្ថានការរាតត្បាតជំងឺ Covid-19 (កូវីដ-១៩) នៅក្នុងប្រទេសថៃនៅតែបន្តឆ្លងជាទ្រង់ទ្រាយធំ ក្រុមហ៊ុនទូរទស្សន៍ Workpoint សូមប្រកាសសេចក្ដីជូនដំណឹងបិទស្ទីតយ៉ូនិងការិយាល័យការងារចាប់ពីថ្ងៃទី១០ មិថុនា រហូតដល់ថ្ងៃទី២០ មិថុនា ដោយថ្ងៃទី២១ មិថុនានេះ គឺជាថ្ងៃដំបូូងដែលស្ថានីយទូរទស្សន៍មួយនេះនឹងធ្វើការបើកដំណើរការថតកម្មវិធីផ្សេងៗ ក៏ដូចជាការិយាល័យធ្វើការឡើងវិញ។
Workpoint គឺជាស្ថានីយទូរទស្សន៍ ដែលនាំមុខនិងឈានមុខគេលើផ្នែក Game Show និង Variety Show ព្រោះថ្មីៗនេះ ទូរទស្សន៍ថៃមួយនេះទើបតែលក់កម្មសិទ្ធិបញ្ញាកម្មវិធី «The Wall Duet» ឱ្យប្រទេសនៅអ៊ឺរ៉ុបចំនួន៧ប្រទេស និង ប្រទេសអាស៊ានគឺប្រទេសវៀតណាម ដើម្បីយកទៅផលិតនិងផ្សព្វផ្សាយនៅប្រទេសរបស់គេរៀងៗខ្លួន៕
