ក្រុម Kelantan FC សមាជិតលីគកំពូលម៉ាឡេស៊ី ក្រោមការដឹកនាំដោយគ្រូបង្វឹកលោក Choi Moon Sik សញ្ជាតិកូរ៉េខាងត្បូង ប្រកួតចាញ់ Buriram United ក្នុងលទ្ធផល ៧-០ ក្នុងជំនួបពានរង្វាន់បាល់ទាត់សប្បុរសធម៌ ASEAN Charity Shield 2023 កាលពីថ្ងៃទី១៥ ខែមករា នៅទីក្រុង Songkhla ប្រទេសថៃ។
គ្រាប់បាល់ទាំង៧គ្រាប់របស់ Buriram United រកបានដោយកីឡាករ Suphanat នាទីទី៨,៤១, កីឡាករBolinki នៅនាទីទី១៣, កីឡាករ Supachai នៅនាទីទី១៧, កីឡាករ Vuchkich នាទីទី៤៩, កីឡាករ Causic នាទីទី៥៤ និងកីឡាករ Naruebodin នៅនាទីទី៨៩។
រំលឹកថាការប្រកួតបាល់ទាត់ ASEAN Charity Shield 2023 ធ្វើឡើងដើម្បីផ្សារភ្ជាប់ទំនាក់ទំនងល្អរវាង ថៃ និង ម៉ាឡេស៊ី ដើម្បីជម្រុញយុវជនក្នុងស្រុក ក៏ដូចជាលើកស្ទួយ និងលើកទឹកចិត្តពីការធ្វើដំណើរទេសចរន៍ឡើងវិញ ក្រោយស្ថានភាពជំងឺកូវីដ១៩។ លើសពីនេះ គឺបង្កើនការផ្លាស់ប្តូរពាណិជ្ជកម្មតាមបណ្ដាខេត្ត មិនថាវិស័យទេសចរណ៍ ពាណិជ្ជកម្ម កន្លែងស្នាក់នៅ ភោជនីយដ្ឋាន សំខាន់គឺជាការចាប់ផ្តើមនៃវិស័យបាល់ទាត់ថៃ។
គួរបញ្ជាក់ថា ក្លឹបបាល់ទាត់ Kelantan គឺជាក្លឹបបាល់ទាត់អាជីពរបស់ប្រទេសម៉ាឡេស៊ីដែលមានមូលដ្ឋាន នៅទីក្រុង Kota Bharu រដ្ឋ Kelantan ។ ក្លិបនេះ ធ្លាប់បានគ្រងតំណេងជើងឯកលីគកមពូលម៉ាឡេស៊ីលើកដំបូងក្នុងរដូវកាលឆ្នាំ២០១២ Malaysia Super League ជើងឯក Malaysia FA Cup និង Malaysia Cup ។ សម្រាប់ពានរង្វាន់ក្នុងស្រុក ក្លឹបបានឈ្នះជើងឯក Malaysia Super League ចំនួន២ដង ជើងឯក Malaysia Cup ចំនួន២ដង ជើងឯក Malaysia FA Cup ចំនួន២ដងនិងជើងឯក Malaysia Premier League ចំនួនដង៕