នៅថ្ងៃនេះ (២២ មិថុនា ២០២១) តារាសម្ដែងល្បីឈ្មោះ លោក អេដវីន ត្រូវបានសមត្ថកិច្ចចាប់បញ្ជូនទៅតុលាការ ក្រោយពីលោកបានប្រើហិង្សាលើអ្នកនាង សុទ្ធ បញ្ចកា។ តើលោក អេដវីន ត្រូវបានតុលាការសម្រេចចោទប្រកាន់ពីបទអ្វី?
នៅពេលនេះលោកត្រូវបាន តុលាការសម្រេចចោទប្រកាន់ពីបទអំពើហិង្សាប្រព្រឹត្តដោយសហព័ន្ធ ឬ អនីតិសង្វាសជន ដែលមានចែងក្នុងមាត្រា ២២២ នៃក្រមព្រហ្មទណ្ឌ។
យោងតាមមាត្រា ២២២ នៃក្រមព្រហ្មទណ្ឌ បទល្មើសហិង្សាប្រព្រឹត្តដោយសហព័ទ្ធ ឬអនីតសង្វាសជន៖ អំពើហិង្សាប្រព្រឹត្តដោយចេតនា ត្រូវផ្តន្ទាទោសដាក់ពន្ធនាគារពី ២(ពីរ) ឆ្នាំ ទៅ ៥(ប្រាំ) ឆ្នាំ និងពិន័យជាប្រាក់ពី ៤០០០០០០(បួនលាន) រៀល ទៅ ១០០០០០០០(ដប់លាន) កាលបើអំពើហិង្សានេះ ត្រូវបានប្រព្រឹត្តដោយសហព័ទ្ធឬដោយ អនីតិសង្វាសជនរបស់ជនរងគ្រោះ។
តើពាក្យសហព័ទ្ធ និងពាក្យអនីតិសង្វាសជនមានន័យដូចម្ដេច?
១. សហព័ទ្ធ ៖ សម្ដៅទៅលើប្ដី ឬប្រពន្ធ ឬទាំងប្ដី ទាំងប្រពន្ធដែលទទួលឋានៈជាសហព័ទ្ធនេះ ក្រោយពីបានចុះបញ្ជីអាពាហ៍ពិពាហ៍ត្រឹមត្រូវតាមច្បាប់។
២. អនីតិសង្វាសជន៖ គឺជាជនដែលរស់នៅជាមួយគ្នាដូចជាប្ដីប្រពន្ធ តែមិនបានចុះសំបុត្រអាពាហ៍ពិពាហ៍ត្រឹមត្រូវតាមច្បាប់។
គួរដឹងដែរថានៅថ្ងៃស្អែកនេះ លោក យិត មាសឧស្សាហ៍ ហៅ អេដវីន នឹងត្រូវបញ្ជូនទៅចៅក្រមស៊ើបសួរ ដើម្បីបន្តនីតិវិធី ជាបន្តទៀត៕
