សិល្បៈអន្តរជាតិ៖ អតីតតារាចម្រៀង Zuny សមាជិក ladies’Code ដែលរួចរស់ជីវិតពីគ្រោះថ្នាក់ចរាចរណ៍ដែលសម្លាប់សមាជិក២នាក់ កាលពី៩ឆ្នាំមុន បានឱ្យដឹងថានាងបានធ្វើការងារជាអ្នករត់តុកាហ្វេ ៣ឆ្នាំហើយ។
Zuny បានលើកឡើងថាហេតុការណ៍គ្រោះថ្នាក់កាលពីថ្ងៃទី៣ កញ្ញា ឆ្នាំ២០១៤ បានផ្លាស់ប្ដូរជីវិតរបស់នាងស្ទើតែទាំងស្រុង។ តារាចម្រៀងដែលបានក្លាយខ្លួនជាអ្នករត់តុក្នុងភោជនីយដ្ឋានរបស់អ្នកស្គាល់គ្នា ជាំង៣ឆ្នាំមកនេះ បានបង្ហើបឱ្យដឹងថាខ្លួនរស់នៅក្នុងភាពភ័យខ្លាចអស់ជាច្រើន។
ក្រោយហេតុការណ៍គ្រោះថ្នាក់នោះខ្ញុំរស់នៅដោយភាពតក់ស្លុតនិងរន្ធត់រហូតមក។ «រាល់ពេលធ្វើដំណើរទៅស្រុកកំណើតខ្ញុំមានបញ្ហារហូតជាពិសេសគឺនៅក្នុងថ្ងៃដែលមានភ្លៀង បើសិនជាឡានបើកលឿន ខ្ញុំមានអាការៈពិបាកដកដង្ហើម ឬបើសិនជាជួនកាលឡានក្រុងស្រាប់តែឈប់ងក់ ខ្លួនខ្ញុំចាប់ផ្ដើមបែកញើស ចំណែកបេះដូងលោតញាប់ខុសចង្វាក់។»
អតីតតារាចម្រៀងរូបនេះបានឱ្យដឹងថានាងនឹកដល់អាជីពសិល្បៈនឹកដល់សមាជិកក្រុម Ladies Code។ ថ្មីៗនេះនាងទើបតែចុះកុងត្រាជាមួយនឹងផលិតកម្មមួយ ហើយនាងនឹងចាប់ផ្ដើមវិលត្រលប់ចូលសិល្បៈវិញ។ Zuny និយាយថានាងបានដាក់ឈ្មោះសិល្បៈថា Kim Joo Mi នៅពេលដែលនាងត្រលប់ចូលសិល្បៈវិញ។
ក្រុមចម្រៀង Ladies Code គឺជាក្រុមស្ថិតក្រោមផលិតកម្ម Polaris Entertainment កាលពីឆ្នាំ២០១៣។ ក្រុមចម្រៀងនេះមានសមាជិក៥នាក់ក្នុងនោះមានប្រធានក្រុម Ashley និងសមាជិក Rise, EunB, Sojung និង Zuny។ នៅថ្ងៃទី៣ កញ្ញា ២០១៣ ក្រុមចម្រៀងនេះជួបថ្នាក់ចរាចរណ៍ធ្ងន់ធ្ងរមួយក្រោយត្រលប់ពីការសម្ដែង ដោយកាលនោះសមាជិក២នាក់គឺ EunB និង Rise បានបាត់បង់ជីវិត។
ក្រោយនៅសល់សមាជិកត្រឹម៣នាក់ក្រុមនេះនៅតែបន្តធ្វើការងារក្នុងរង្វង់សិល្បៈ ប៉ុន្តែពួកគេបានចាកចេញពីផលិតកម្ម Polaris កាលពីខែកុម្ភៈ ឆ្នាំ២០២០ ក្រោយផុតកុងត្រា បន្ទាប់ពីនោះសមាជិកម្នាក់ៗបានបន្តការងារជាតារាចម្រៀងទោល។
សម្រាប់ Zuny នាងមានបញ្ហាលំបាកបន្តិចដោយសារតែក្រោយពេលគ្រោះថ្នាក់ នាងត្រូវទៅជួបគ្រូពេទ្យផ្លូវចិត្ត។ សមាជិកក្មេងជាងគេនេះបាននិយាយថានាងមិនហ៊ានលុបមុខអស់ពេលជាយូរព្រោះរាល់ពេលបិទភ្នែកនាងតែនឹកដល់រូបភាពដំណក់ទឹកភ្លៀងដែលស្រក់មកលើមុខរបស់នាងនៅថ្ងៃគ្រោះថ្នាក់នោះ។ ថែមពីលើនោះនាងមិនហ៊ានសូម្បីតែបិទភ្នែកគេង មិនហ៊ានបិទភ្លើង ព្រោះរាល់ពេលដែលនាងគេងនាងតែងតែយល់សប្តិឃើញរូបភាពគ្រោះថ្នាក់ដ៏អាក្រក់នាយប់នោះ៕