សិល្បៈជាតិ៖ សម្រាប់តារាសម្ដែង Park So Dam គឺជាតារាសម្ដែងមួយដួងដែលអ្នកគាំទ្របានស្គាល់យ៉ាងច្បាស់ព្រោះមានស្នាដៃសម្ដែងរឿងល្បីល្បាញជាច្រើន។ ថ្មីៗនេះនាងបានចេញមកទម្លាយពីដំណើរការព្យាបាលជំងឺមហារីកក្រពេញទីរ៉ូអ៊ីតនិងការសំរាកព្យាបាលរបស់ខ្លួនក្រោយការវះកាត់ ព្រមទាំងប្រាប់ពីស្ថានភាពជំងឺរបស់ខ្លួនក្នុងពេលបច្ចុប្បន្នថែមទៀតផង។
តារាសម្ដែងរូបនេះបានបង្ហើបកាលពីចុងឆ្នាំ២០២១ ក្នុងខណៈដែលកំពុងមមាញឹកថតភាពយន្តនោះ នាងស្រាប់តែមានកើតមានអាការៈប្លែក ក្រោយពេលទៅពិនិត្យសុខភាពគ្រូពេទ្យបាននិយាយថា នាងកើតជំងឺមហារីកក្រពេញទីរ៉ូអ៊ីតប្រភេទ Papillary។
រំលឹកឡើងវិញខណៈថតភាពយន្តភាគ «Phantom» Park So Dam បាននិយាយថានាងរន្ធត់ណាស់ដោយសារតែសុខភាពរបស់នាងកាន់តែខ្សោយទៅៗ «ក្នុងខណៈដែលកំពុងថតភាពយន្តនោះរាងកាយរបស់ខ្ញុំឈឺចាប់បំផុត តែខ្ញុំគ្រាន់តែគិតថារាងកាយរបស់ខ្ញុំបែបហត់នឿយពេក នេះគឺជាលើកដំបូងដែលខ្ញុំមានអារម្មណ៍ខ្លាចការសម្ដែង ខ្ញុំគិតថារាងកាយខ្ញុំកំពុងតែផ្ដល់សញ្ញាអ្វីម្យ៉ាង ប៉ុន្តែពេលនោះខ្ញុំបែរជាគិតថាអាចជាបញ្ហាផ្លូវចិត្ត ខ្ញុំមានអារម្មណ៍សោកស្ដាយនិងសុំទោសផលិតករនិងតារាសម្ដែងរៀមច្បង ក្រោយថតឈុតឆាកចប់ ខ្ញុំមិនអាចទប់ទឹកភ្នែកបានរហូតដល់ថ្នាក់ស្រែកយំ ព្រោះតែមានអារម្មណ៍ឆ្គាំឆ្គង»
ពាក់ព័ន្ធនឹងបញ្ហាសុខភាពបច្ចុប្បន្នរបស់នាង តារាសម្ដែងរូបនេះបានអះអាងថា៖ «ខ្ញុំពេលនេះបានជាសះស្បើយហើយ ខ្ញុំមានអារម្មណ៍ថាអរគុណដែលថ្ងៃនេះអាចត្រលប់មកជួបមនុស្សអ្នកគ្រប់គ្នាអាចសួរសុខទុក្ខគេដោយប្រើប្រាស់សំឡេងខ្លួនឯង។ ទោះជាខ្ញុំមានសុខភាពល្អឡើងវិញច្រើនមែន តែស្បែករបស់ខ្ញុំក៏មិនស្អាត ដោយសារតែបញ្ហាអ័រម៉ូនមិនសមតុល្យគ្នា ខណៈដែលទៅលេងកីឡា Pilates មួយសប្ដាហ៍៥ទៅ៦ដង ខ្ញុំមានអារម្មណ៍ថារាងកាយរបស់ខ្ញុំមានចលនាស្វាហាប់ឡើងវិញម្ដងទៀត ទោះជាកម្លាំងរបស់ខ្ញុំនៅមិនទាន់ត្រលប់មកពេញលេញដូចកាលពីមុនក្ដី តែនៅពេលដែលខ្ញុំគិតដល់ពេលវេលានេះកាលពីឆ្នាំ ខ្ញុំគិតបានថាខ្ញុំមានអារម្មណ៍ថាខ្លួនឯងមានក្ដីសុខកម្រិតណា»
