ជនសង្ស័យម្នាក់ត្រូវសមត្ថកិច្ចចាប់ខ្លួនក្រោយពីបានកាប់ទៅលើបុរសម្នាក់បណ្តាលឲ្យរងរបួសក្បាលដោយសារ តែខឹងជនរងគ្រោះជញ្ជក់មាត់ដាក់សង្សាររបស់ខ្លួន។ចំណែកបក្ខពួកជនសង្ស័យ ផ្សេងទៀតគេចខ្លួនបាត់។
ករណីហិង្សានេះកើតឡើងនៅ ថ្ងៃទី២១ ខែមករា ឆ្នាំ២០២៣ វេលាម៉ោង ១៦:២០នាទីនៅចំណុច ភូមិពោធិ៍រាម្មា (ក) ឃុំព្រែកស្ដី ស្រុកកោះធំ ខេត្តកណ្តាល។
បើតាមសមត្ថកិច្ច ជនរងគ្រោះមានឈ្មោះ ម៉េង សេងគី ភេទប្រុស អាយុ២៤ឆ្នាំ ជនជាតិខ្មែរ ភូមិពោធិ៍រាម្មា ឃុំព្រែកស្ដី ស្រុកកោះធំ ខេត្តកណ្តាល មុខរបរ ជាងផ្សាដែក ។
ចំណែកជនសង្ស័យចំនួន ១២នាក់ និងបក្ខពួកប្រមាណ ៤០នាក់ ទៀត ប៉ុន្តែមិនត្រូវបានគេស្គាល់អត្តសញ្ញាណនោះឡើយ។
ជនសង្ស័យដែលត្រូវបានសមត្ថកិច្ចចាប់ខ្លួនមាន ឈ្មោះ ទោល សៀកគិ ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ រស់នៅភូមិកាប៉ាល់កឿង ឃុំសំពៅពូន ស្រុកកោះធំ ខេត្តកណ្ដាល។ ជនសង្ស័យធ្លាប់ជាប់ពន្ធនាគារខេត្តកណ្ដាល រយៈពេល ០១ខែ ពីបទ ហិង្សាដោយចេតនាទៅវិញទៅមក។
ចំពោះវត្ថុតាងដែលសមត្ថកិច្ចរឹបអូសបានរួមមាន៖
-ម៉ូតូ០១គ្រឿង ម៉ាកHonda C125 ពណ៌ខ្មៅ ស៊េរីឆ្នាំ២០១៨ ពាក់ផ្លាកលេខ កណ្ដាល 1HH-2996។
-ឥដ្ឋប្រហោង ០១ដុំ
-ដំបងឫស្សី ០១ដេីម ប្រវែង ១៧៣ ស.ម។
យោងតាមរបាយការណ៍ពីសមត្ថកិច្ចបានឲ្យដឹងថា មុនពេលកេីតហេតុ ជនរងគ្រោះ និងមិត្តភក្តិរួមមាន ឈ្មោះ ផល ធារ៉ា ភេទប្រុស អាយុ២៣ឆ្នាំ មុខរបរ កសិករ រស់នៅភូមិ-ឃុំកេីតហេតុ និងឈ្មោះ ថេង វុទ្ធី (ឆាង) ភេទប្រុស អាយុ២៣ឆ្នាំ មុខរបរ កសិករ រស់នៅភូមិ-ឃុំកេីតហេតុ បានជួបជុំគ្នាផឹកស្រាបៀរ នៅចំណុចមុខផ្ទះ ឈ្មោះ បញ្ញា រ៉ាឈីត ភេទប្រុស អាយុ២៣ឆ្នាំ មុខរបរ កម្មកររោងចក្រ រស់នៅចំណុចកេីតហេតុ ខណៈនោះ មាននារីៗ មិនស្គាល់អត្តសញ្ញាណ កំពុងធ្វេីដំណេីរលេីកំណត់ផ្លូវជាតិលេខ២១អា ឃេីញដូចនេះ ឈ្មោះ ថេង វុទ្ធី បានជញ្ជូតមាត់ដាក់ នារីៗទាំងនោះ។ ក្រោយមកជនសង្ស័យឈ្មោះ យុទ្ធ រដ្ឋា បានជិះម៉ូតូ ០១គ្រឿងក្នុងវត្ថុតាង ឈប់សួររក “អ្នកណាគេជញ្ជក់មាត់ដាក់សង្សារអញ” ភ្លាមនោះឈ្មោះ ថេង វុទ្ធី ឆ្លេីយថា “អញអ្ហែងចង់យ៉ាងមិញ” ឈ្មោះ យុទ្ធ រដ្ឋា ប្រាប់ថាមិនអីទេអ្ហែងតិចទៀតអញទៅហៅបក្ខពួកអញមកកាប់ ពួកអ្ហែង។ មួយសន្ទុះក្រោយមកបក្ខពួកជនសង្ស័យមានគ្នាជិះម៉ូតូប្រហែល ២០គ្រឿង ប្រដាប់ដោយអាវុធគ្រប់ដៃ រួមមាន ដាវ, កាំបិត, ដំបង,ដុំថ្ម-ដុំឥដ្ឋ។ល។ មកចំណុចកេីតហេតុ បានធ្វេីសកម្មដេញកាប់-វាយទៅលេីក្រុមជនរងគ្រោះ បណ្ដាលឱ្យជនរងគ្រោះត្រូវមួយដុំឥដ្ឋ រងរបួសធ្ងន់បែកក្បាល។ ខណៈពេលនោះប្រជាពលរដ្ឋរស់នៅក្បែរៗនោះ បានស្រែកឃាត់ពួគគេ ក្រុមជនសង្ស័យ ឃេីញប្រជាពលរដ្ឋច្រេីនពេកក៏បាននាំគ្នារត់គេចខ្លួន ដោយបានបន្សល់ ម៉ូតូ០១គ្រឿង ក្នុងវត្ថុតាង។
ក្រោយពីទទួលបានព័ត៌មានអំពីករណីហិង្សារួចមក កម្លាំងនគរបាលជំនាញយុត្តិធម៌ស្រុកកោះធំ រួមជាមួយបណ្ដាប៉ុស្ដិ៍ពាក់ព័ន្ធ សហការជាមួយកម្លាំងនគរបាលការិយាល័យកម្រិតធ្ងន់ និងកម្រិតស្រាល បានចុះទៅកន្លែងកេីតហេតុ ដេីម្បីប្រមែលប្រមូលព័ត៌មាន ភស្ដុតាង ធ្វេីការឃាត់ខ្លួនជនសង្ស័យម្នាក់ឈ្មោះ ទោល សៀកគិ បច្ចុប្បន្នជនសង្ស័យ និងវត្ថុតាង បញ្ជូនមកកាន់អធិការដ្ឋាននគរបាលស្រុកកោះធំ ដេីម្បីចាត់ការទៅតាមនីតិវិធី។
ក្រោយឃាត់ខ្លួនបានជនសង្ស័យរួចមក កម្លាំងជំនាញកំពុងបន្តស្រាវជ្រាវស្វែងរកបក្ខពួកក្រុមជនសង្ស័យ ដេីម្បីយកមកចាត់ការទៅតាមផ្លូវច្បាប់៕
អត្ថបទ៖តាខ្មៅ