សិល្បៈអន្តរជាតិ៖ តារាសម្ដែងកូរ៉េខាងត្បូង Na Chul ដែលបានបង្ហាញវត្តមានសម្ដែងភាពយន្តល្បីៗជាច្រើនដូចជា Jirisan, Weak Hero Class 1, Vincenzo និង Little Women បានស្លាប់ហើយ នេះបើយោងតាមសេចក្ដីប្រកាសព័ត៌មានពី Allkpop។
បុរសវ័យ ៣៦ឆ្នាំ ដែលទើបតែប្រារព្ធកម្មវិធីខួបកំណើតរបស់ខ្លួនកាលពីពេលថ្មីៗនេះ បានស្លាប់នៅក្នុងមន្ទីរពេទ្យកាលពីថ្ងៃទី២១ មករា កន្លងទៅដោយសារជំងឺ ប៉ុន្តែមិនមានដំណឹងណាមួយបញ្ជាក់ថាលោកកើតជំងឺអ្វីឱ្យពិតប្រាកដនោះឡើយ។ ពិធីបុណ្យសពរបស់លោកបានរៀបចំឡើងកាលពីថ្ងៃចន្ទ ទី២៣ ម្សិលមិញនេះ។
Na Chul ទើបតែរៀបចំកម្មវិធីជប់លាងខួបកំណើតរបស់ខ្លួនកាលពីខែធ្នូ ប៉ុន្តែមិនយូរប៉ុន្មានលោកបែរជាលាចាកលោកទៅវិញ។ លោកប្រឡូកសិល្បៈដំបូងតាមរយៈការដើរតួជាតារាសម្ដែងតាមមហោស្រព ដោយក្រោយមកទៀតលោកមានឱកាសបានចូលរួមសម្ដែងក្នុងភាពយន្តខ្នាតធំជាច្រើន តួយ៉ាងដូចជា Extreme Job ជាដើម។ ក្រៅពីភាពយន្តខ្នាតធំលោកក៏បានសម្ដែងក្នុងភាពយន្តភាគតាមទូរទស្សន៍ជាច្រើនដែរក្នុងនោះមានដូចជា DP, Hospital Playlist 2. Once Upon A Small Town និង Weak Hero Class 1 ជាដើម។
អតីតមិត្តភក្តិដែលបានរួមសម្ដែងជាមួយនឹងលោកបានបង្ហាញអារម្មណ៍សោកស្ដាយនិងចូលរួមរំលែកទុក្ខចំពោះការលាចាកលោករបស់លោកក្នុងនោះមានដូចជា Kim Go Eun «តារាសម្ដែងឆ្នើមជានិរន្តន៍។ បុរសដ៏អស្ចា្យ លោកប៉ា ស្វាមី កូន និងមិត្តភក្ដិដ៏ល្អ»
តារាស្រីរូបនេះក៏បាននិយាយបន្ថែមនៅលើបណ្ដាញ Social Media ដោយភ្ជាប់រូបថតរបស់ខ្លួននិងតារាសម្ដែងរូបនេះថា៖ «ខ្ញុំសោកស្ដាយណាស់ដែលខ្ញុំមិនអាចនៅក្បែរអ្នកនៅនាទីចុងក្រោយ។អរគុណដែលបន្សល់ទុកការចងចាំល្អជាច្រើនជាមួយគ្នា»។
ប្រភព៖ Allkpop
