កីឡាករ គួច សុកុម្ភ: បានបង្ហោះសារនៅលើទំព័រហ្វេសបុកកាលពីម្សិលមិញថា៖ «ជាដំបូងខ្ញុំសូមអរគុណដល់សហពន្ធ័កីឡាបាល់ទាត់កម្ពុជាដែលបានរៀបចំវគ្គ B-license និងសូមអរគុណដល់ក្លឹបបាល់ទាត់ NagaWorld FC ដែលបានអនុញ្ញាតឲ្យខ្ញុំបាទចូលរួមវគ្គ B-License ក៏ដូចជាលោកគ្រូ Jose នឹង សំលាញ់ ឃឹម បូរី – Khim Borey assistant staff media នឹងបងប្អូនកីឡាករដែលបានជួយសហការណ៍កន្លងមក និងសូមអរគុណលោកគ្រូឧទ្ទេស kazunori ohara ដែលបានបង្ហាត់បង្រៀន ចំនេះដឹងផ្នែកបាល់ទាត់ដល់ សំលាញ់ បូរ៉ាវី នឹងប្អូនស្រី នីផាដែលបានជួយសម្របសម្រួលដល់ពួកយើងទាំងអស់គ្នា ក៏ដូចជាលោកគ្រូ អ្នកគ្រូសិក្ខាកាមទាំងអស់គ្នាដែលបានសហការនិងចែករំលែកបទពិសោធន៍គ្នាទៅវិញទៅមកបានយ៉ាងល្អ សូមជូនពរសំណាងល្អទាំអស់គ្នា»។
ខ្សែបម្រើរូបនេះ បានចាប់ផ្ដើមអាជីពជាកីឡាករបាល់ទាត់ដោយជាប់ជាជម្រើសយុវជនលេងឲ្យក្រសួងការពារជាតិនៅ២០០៣-២០០៤ និងបានផ្លាស់ទៅលេងនៅក្លិបខេមរាកីឡា ក្នុងក្របខ័ណ្ឌលីគកំពូលកម្ពុជាឆ្នាំ២០០៥ ដល់ឆ្នាំ២០១០។
កីឡាករវ័យ៣៦ឆ្នាំរូបនេះ បានផ្លាស់ទៅលេងឲ្យក្លិបភ្នំពេញក្រោន នៅឆ្នាំ២០១០ រហូតដល់ឆ្នាំ២០១៥ និងបានចូលរួមជាមួយក្លិបបាល់ទាត់ណាហ្គាវើលដ៍ រហូតដល់បច្ចុប្បន្ន។ កីឡាករ គួច សុកុម្ភ: ធ្លាប់ជាម្ចាស់ស្បែកជើងមាស Golden Boots ក្នុងពានរង្វាន់ ហ៊ុន សែនខាប់ នៅឆ្នាំ២០០៧, ២០០៩ និង២០១០។
គួបញ្ជាក់ថា កាលពីល្ងាចថ្ងៃទី២៤ ខែមករា ក្លិបបាល់ទាត់ណាហ្គាវើលដ៍ ប្រកាសសម្រេចបន្តកិច្ចសន្យាបន្ថែមទៀត ជាមួយកីឡាករ គួច សុកុម្ភ: បន្ទាប់ពីចូលរួមជាមួយក្លិបចាប់តាំងពីឆ្នាំ២០១៥៕
