កីឡាករកូនកាត់ខ្មែរ-អ៊ូបេគីស្ថាន រ៉ាចាពៅ នឹងធ្វើការប្រកួតវគ្គផ្តាច់ព្រ័ត្រប្រដាល់សកលជើងឯកអាស៊ី Asian Boxing Confederation (ASBC) នៅថ្ងៃនេះដោយត្រូវប៉ះជាមួយកីឡាករ Tokhirov Nusratbek មកពីប្រទេសអ៊ូប៊ែគីស្ថាន ក្នុងប្រភេទទម្ងន់៩២គីឡូក្រាម។ កម្មវិធីប្រកួតនឹងចាប់ផ្ដើមចាប់ពីម៉ោង ២:០០នាទៅរសៀលតទៅ នៅប្រទេសថៃ។
កីឡាករកូនកាត់ខ្មែរ-អ៊ូបេគីស្ថាន អាប់ឌុលឡាស់ រ៉ាចាពៅ បានឈ្នះកីឡាករ Toktosun របស់កៀហ្ស៊ីស៊ីស្ថាន ក្នុងវគ្គពាក់កណ្តាលផ្តាច់ព្រ័ត្រ ដោយលទ្ធផល ៣ទឹកទល់១ទឹក អាចថាបានកក់មេដាយប្រាក់ក្នុងដៃ រួចជាស្រេច។ ខណ:កីឡាករTokhirov Nusratbek បានយកឈ្នះលើកីឡាករ Bekzat Yerkhat របស់កាហ្សាក់ស្ថាន ដោយលទ្ធផល៥ទឹកទល់០ ក្នុងវគ្គពាក់កណ្តាលផ្ដាច់ព្រ័ត្រលើសង្វៀន Huamark Indoor Stadium ក្នុងរាជធានីបាងកក ដូចគ្នា។
នេះជាការបំបែកកំណត់ត្រាថ្មីក្នុងនាមជាកីឡាករប្រដាល់សកលកម្ពុជាដំបូងគេ ដែលបាន ឈានដល់ វគ្គផ្តាច់ព្រ័ត្រ ប្រដាល់សកលជើងឯកអាស៊ី Asian Boxing Confederation (ASBC) បន្ទាប់ពីយកឈ្នះកីឡាករ Toktosun របស់កៀហ្ស៊ីស៊ីស្ថាន ក្នុងវគ្គពាក់កណ្តាលផ្តាច់ព្រ័ត្រ កាលពីរាត្រីថ្ងៃទី២៣ ខែមករា ឆ្នាំ២០២៣ នៅប្រទេសថៃ។
ដោយឡែក កីឡាករ ពេញ វណ្ណថង ក៏ទទួលបានមេដាយសំរឹទ្ធ ១គ្រឿង បន្ទាប់ពីចាញ់កីឡាករកាហ្សាក់ស្ថានក្នុងវគ្គពាក់កណ្តាល់ផ្តាច់ព្រ័ត្រដូចគ្នា។ សម្របពេលដែលកម្ពុជា បានបញ្ជូនកីឡាករ ៣ រូប និងកីឡាការីនីមួយរូប ទៅចូលរួមប្រកួតក្នុងព្រឹត្តិការណ៍កម្រិតទ្វីបអាស៊ី មួយនេះ។ នេះជាជោគជ័យ និង កំណត់ត្រាប្រវត្តិសាស្រ្តថ្មី សម្រាប់សហព័ន្ធក្នុងការឈាន ឆ្ពោះរៀបចំការប្រកួតកីឡាស៊ីហ្គេម ឆ្នាំ២០២៣ នាខែឧសភា ខាងមុខនេះ។
គួរំលឹកថា ព្រឹត្តិការណ៍ប្រដាល់សកលជើងឯកអាស៊ីយុវជនក្រោមអាយុ២២ឆ្នាំ Asian Boxing Confederation (ASBC) នេះ មានប្រទេសចំនួន ២១ ក្នុងទ្វីបអាស៊ី ចូលរួម ដោយមានកីឡាករ-កីឡាការិនី សរុបចំនួន ២៤៣ នាក់ ចាប់ដំណើរការពីថ្ងៃទី១៦ ខែមករា ដល់ ថ្ងៃទី២៧ មករា ២០២៣។ កម្មវិធីប្រកួតនេះដែរមានមានចំនួន១៣វិញ្ញាសាសម្រាប់បុរស និង១១វិញ្ញាសារសម្រាប់នារី៕
