សិល្បៈជាតិ៖ តាមដំណឹងដែលសារព័ត៌មានត្រយងទទួលបានគឺឱ្យដឹងថា ក្រុមកំប្លែងនាយ ពែកមី ត្រៀមបង្ហាញមុខជាលើកដំបូងនៅស្ថានីយទូរទស្សន៍ប៉ុស្ដិ៍លេខ ៥ តាមរយៈកម្មវិធី «ចៅលោកតា»។ នេះគឺជាកម្មវិធីដ៏ថ្មីសន្លាងមិនមានពីមុនមកនៅលើកញ្ចក់ទូរទស្សន៍ដែលផ្ដោតសំខាន់លើការកម្សាន្ត និងផ្ដល់សំណើចជូនមហាជនអ្នកទស្សនា។
តាមរយៈគណៈរៀបចំការផលិតកម្មវិធីកម្សាន្តប្រចាំស្ថានីយទូរទស្សន៍កងយោធពលខេមរភូមិន្ទប៉ុស្ដិ៍លេខ៥ ឬ TV5 បានប្រាប់ថា ស្ថានីយត្រៀមនឹងក្រុងពាលីកម្មវិធី «ចៅលោកតា» នាព្រឹកថ្ងៃទី ១ ខែកុម្ភៈ វេលាម៉ោង ៩ព្រឹកនាបរិវេញស្ថានីយទូរទស្សន៍ប៉ុស្ដិ៍លេខ ៥ ផ្ទាល់ និងជាការស្វាគមន៍ចំពោះការដំណើរការងាររបស់ក្រុមកំប្លែងនាយ ពែកមី មកកាន់ TV 5។
យ៉ាងណាមិញ គេនៅមិនទាន់ច្បាស់ថា ការលេចវត្តមានថ្មីរបស់ក្រុមកំប្លែងនាយ ពែកមី គឺជាក្រុមថ្មីដែលទើបបង្កើតឡើង ឬជាក្រុមចាស់ដែលស្ថិតក្រោមការដឹកនាំរបស់លោក តាវិចទ័រដដែល។ តែគេចាំបានថា ក្រុមចាស់ដែលបានបង្កើតក្រុមកាលនៅប៉ុស្តិ៍ស៊ីធីអិនតាំងពី ២០០៧ នោះមានសមាជិកចាស់ នាយពែកមី នាយក្រូច នាយ តាក់ស៊ី នាយចឺម នាងអ៊ីត នាង ខ្ញុង នាយគ្រឿន អ្នកនាង នីឡា និងយាយតយ។ ហើយក៏មានបន្ថែមសមាជិកថ្មីមួយចំនួនទៀតដូចជា លោកចាបចៀន អ្នកនាង ង៉ែត សុវណ្ណលីតា នាយក្រាន់ និងអ្នកនាង គីម លីហ្សា ជាដើម។
កុំភ្លេចរង់ចាំតានដានការបង្ហាញវត្តមានរបស់ក្រុមកំប្លែងពែកមីតាមរយៈកម្មវិធី «ចៅលោកតា» នៅលើកញ្ចក់ទូរទស្សន៍កងយោធពលខេមរភូមិន្ទប៉ុស្ដិ៍លេខ៥ ថាតើនឹងមានតារាកំប្លែងរូបណាខ្លះចូលរួមសម្ដែង?