លោក អ៊ុច សុខវិបុល គ្រូបង្វឹកកីឡាកង់ភ្នំកម្ពុជា បានបង្ហាញការពេញចិត្តទៅនឹងកម្រិត ប្រកួតប្រជែងរបស់កីឡាករ កីឡាការិនីជម្រើសជាតិកង់ភ្នំកម្ពុជា ដែលពួកគេធ្វើបានយ៉ាងល្អ លើវិញ្ញាសា eliminate ក្នុងការប្រកួតពានរង្វាន់ King Cup នៅប្រទសថៃ បើទោះបីជានេះជាវិញ្ញាសាថ្មី សម្រាប់ពួកគេក៏ដោយ។
លោក អ៊ុច សុខវិបុល ដែលកំពុងស្ថិតនៅ ខេត្តកាឆាណាក់បូរី ប្រទេសថៃ បានប្រាប់ថា៖ ក្រោយការប្រកួត កាលពីរសៀលថ្ងៃទី២៩ ខែមករានេះថាកីឡាករ កីឡាការិនីជម្រើសជាតិវ័យក្មេងរបស់កម្ពុជា មានសិទ្ធផលប្រហាក់ប្រហែលទៅនឹងកីឡាករ កីឡាការិនីកម្រិតខ្ពស់របស់បណ្តាប្រទេសក្នុងតំបន់អាស៊ាន។ ទោះបីជាពួកគេ ទើបបានចូលរួមប្រកួតជាលើកដំបូងលើវិញ្ញាសានេះ ប៉ុន្តែកីឡាករ កីឡាការិនីកង់ភ្នំកម្ពុជា មានលទ្ធភាពប្រកួតប្រជែងដណ្តើមមេដាយបានជាមួយនឹងកីឡាករ កីឡាការិនីបណ្តាប្រទេសនានា ជាពិសេសម្ចាស់ផ្ទះថៃតែម្តង និងជាសញ្ញាវិជ្ជមានមួយ សម្រាប់ត្រៀមស៊ីហ្គេម នៅកម្ពុជា។
លទ្ធផលការប្រកួត នាថ្ងៃទី២៩នេះ នៅខេត្តKanchanburi ប្រទេសថៃ៖
វិញ្ញាសា Eliminate
១.កីឡាករ ឃឹម ម៉េងឡុង ចំណាត់ថ្នាក់លេខ ៣
២.កីឡាការិនី ខេន ម៉ាឡៃ ចំណាត់ថ្នាក់លេខ ៦
៣.កីឡាករ ឆាន ឆៃហ្វុង ចំណាត់ថ្នាក់លេខ ៧
លទ្ធផលប្រកួតកាលពីថ្ងៃទី២៨ ខែមករា នៅខេត្តKanchanburi ប្រទេសថៃ៖
ក.វិញ្ញាសា XCO Men elite
កីឡាករ ឃឹម ម៉េងឡុង ចំណាត់ថ្នាក់លេខ ៣
កីឡាករ ឆាន ឆៃហ្វុង ចំណាត់ថ្នាក់លេខ ៤
ខ.វិញ្ញាសា XCO Men under23
កីឡាករ ឃឹម ម៉េងឡុង ចំណាត់ថ្នាក់លេខ ៣
កីឡាករ ឆាន ឆៃហ្វុង ចំណាត់ថ្នាក់លេខ ៤
គ.វិញ្ញសា XCO Women elite
កីឡាការិនី ខេន ម៉ាឡៃ ចំណាត់ថ្នាក់លេខ ៥
ឃ.វិញ្ញាសា XCO Women under23
កីឡាការិនី ខេនម៉ាឡៃ ចំណាត់ថ្នាក់លេខ ៣
គ្រូបង្វឹកកីឡាកង់ភ្នំកម្ពុជារូបនេះ បានបន្ថែមថា៖ «សម្រាប់ការប្រកួត eliminate នេះ យើងអាចនិយាយបានថា ជាវិញ្ញាសាថ្មីសម្រាប់កីឡាករ កីឡាការិនីរបស់យើង ប៉ុន្តែពួកគេធ្វើបានល្អ លើសពីការរំពឹងទុកដោយ កីឡាករ ឃឹម ម៉េងឡុង ដណ្តើមបានចំណាត់ថ្នាក់លេខ៣ រីឯកីឡាករ ឆាន ឆៃហ្វុង បានលេខ៧ និងកីឡាការិនី ខេន ម៉ាឡៃ បានលេខ៦ ហើយគោលបំណងចូលរួមប្រកួតវិញ្ញាសាថ្មីនេះ គឺមិនមែនត្រឹមតែការត្រៀមដណ្តើមមេដាយឱ្យបានពីស៊ីហ្គេម លើកទី៣២ នៅកម្ពុជាប៉ុណ្ណោះទេ ប៉ុន្តែវាជាការពង្រឹងសមត្ថភាព និងបង្កើនសិទ្ធផលឱ្យបានល្អ ជាពិសេសពិនិត្យមើលពីចំណុចខ្វះខាត ដើម្បីត្រៀមឆ្ពោះទៅកាន់ការប្រកួតស៊ីហ្គេមបន្ទាប់ នៅឆ្នាំ២០២៥ ដែលប្រទេសថៃ ធ្វើជាម្ចាស់ម្ចាស់ផ្ទះផងដែរ»។
សូមបញ្ជាក់ថា ការប្រកួតកង់ភ្នំ ពានរង្វាន់ Royal Cup or King Cup ជុំទី១ ដែលធ្វើនៅប្រទេសថៃនេះ កម្ពុជាបានបញ្ជូនប្រតិភូ និងកីឡាករ កីឡាការិនីសរុប៥នាក់ ឱ្យទៅចូលរួម ក្នុងនោះមាន លោក ផេង ប៉ូលីន ជាប្រតិភូដឹកនាំ លោក អ៊ុច សុខវិបុល ជាគ្រូបង្វឹក ព្រមទាំងកីឡាករ ឆាន ឆៃហ្វុង កីឡាករ ឃឹម ម៉េងឡុង និងកីឡាការិនី ខេន ម៉ាឡៃ៕
