សមាគមបាល់ទាត់ឥណ្ឌូនេស៊ី (PSSI) បានប្រកាសតែងតាំងលោក Indra Sjafri ជាគ្រូបង្វឹកក្រុមកីឡាករបាលទាត់ U23 ឥណ្ឌូណេស៊ីបណ្ដុះអាសន្នដើម្បីត្រៀមចូលរួមប្រកួតកីឡាស៊ីហ្គេមឆ្នាំ២០២៣នៅកម្ពុជា។ ការប្រកាសតែងតាំងគ្រូបង្វឹកសញ្ជាតិឥណ្ឌូណេស៊ីរូបនេះ ធ្វើឡើងកាលពីថ្ងៃទី៣០ ខែមករា ឆ្នាំ២០២៣។
ការតែងតាំងលោក Indra Sjafri ត្រូវបានធ្វើឡើងដោយសារតែគ្រូបង្វឹកលោក Shin Tae-yong នឹងផ្តោតលើក្រុម U20 ឥណ្ឌូនេស៊ី ដែលនឹងចូលរួមប្រកួតព្រឹត្តិការណ៍ FIFA U20 World Cup ឆ្នាំ 2023 ដែលនឹងធ្វើឡើងនៅចាប់ពីថ្ងៃទី២០ ខែឧសភា ដល់ថ្ងៃទី១១ ខែមិថុនា ឆ្នាំ២០២៣ខាងមុខ។
លោក Yunus Nusi អគ្គលេខាធិការ PSSI បាននិយាយថា៖ «ដោយសារស៊ីហ្គេមនៅកម្ពុជាកាន់តែកៀកហើយ PSSI ត្រូវតែងតាំងគ្រូបង្វឹកលោក Indra Sjafri ដែលនឹងទទួលខុសត្រូវលើព្រឹត្តិការណ៍នេះឱ្យបានត្រឹមត្រូវតាមកម្មវិធីនឹងការរៀបចំដើម្បីមានភាពងាយស្រួលក្នុងការអនុវត្តភ្លាមៗ»។
លោក Indra Sjafri កើតនៅថ្ងៃទី២ ខែកុម្ភ: ឆ្នាំ១៩៩៦៣ បច្ចប្បន្នមានវ័យ៥៩ឆ្នាំ។ លោកធ្លាប់បានដឹងនាំក្រុមឈុតយុវជនឥណ្ឌូណេស៊ី U16 នៅឆ្នាំ២០១១, U19 ឆ្នាំ២០១២-២០១៤ និងផ្លាស់ទៅដឹកនាំក្រុម Bali United នៅឆ្នាំ២០១៥-២០១៦ ផ្លាស់ក្រុមយុវជន U19 ឆ្នាំ២០១៧-២០១៨ និងឈុតធំចាប់ពីឆ្នាំ២០១៩។
ព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី៣២ (32nd SEA Games) នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕