សិល្បៈអន្តរជាតិ៖ Miss World បានព្យួរការប្រកួតនៅឆ្នាំ២០២១ ដោយសារបញ្ហាជំងឺកូវីដ-១៩។ ក្រោយទុកឱ្យអ្នកគាំទ្ររង់ចាំយ៉ាងអន្ទះសារ ទីបំផុតកម្មវិធីប្រកួតបវរកញ្ញាដ៏ធំមួយនេះបានប្រកាសកាលបរិច្ឆេទប្រកួតផ្លូវការលើកទី៧១របស់ខ្លួនហើយ ដោយការប្រកួតនឹងប្រារព្ធឡើងនៅពាក់កណ្ដាលឆ្នាំ២០២៣នេះ។
បន្ទាប់ពីព្យួរកម្មវិធីចោលយ៉ាងយូរ ស្រាប់តែមានលេចចេញដំណឹងចចាមអារ៉ាមថាបេក្ខភាពដែលឈ្នះមកុដនៅក្នុងឆ្នាំនេះនឹងទទួលបានសាច់ប្រាក់រង្វាន់រហូតដល់១លានដុល្លារដែលនេះគឺខុសពីគោលការណ៍កន្លងមកដែលអ្នកឈ្នះនឹងទទួលបានប្រាក់ឧបត្ថម្ភប្រចាំខែប្រៀបដូចប្រាក់ខែរហូតដល់ចប់ឬរដូវកាល មិនថាយូរឬឆាប់នោះឡើយ។
ក្រៅពីប្រាក់រង្វាន់ដ៏ច្រើនសន្ធឹកសន្ធាប់ហើយនោះ មានចចាមអារ៉ាមទៀតថាអ្នកឈ្នះនឹងបានចុះកុងត្រាជាមួយនឹងផលិតកម្មហូលីវូដផងដែរ។ ក្នុងនោះអ្នកឈ្នះនឹងចូលរួមកម្មវិធីមនុស្សធម៌និងសកម្មភាពសង្គមទូទាំងពិភពលោក ក៏ដូចជាទូតសុច្ឆន្ទៈឱ្យផលិតផលល្បីៗផងដែរ។ បន្ថែមពីលើនោះទៀត នឹងទទួលបានផ្ទះមួយល្វែងនៅក្នុងក្រុងឡុងដ៍ផងដែរ។
ខណៈដែលថ្មីៗនេះ អង្គភាព Miss Universe មានម្ចាស់ថ្មី កម្មវិធី Miss World ដែលជាស្ថាប័នធំមួយដែរនោះក៏មានលេចចេញនូវពាក្យចចាមអារ៉ាមថានឹងមានម្ចាស់ថ្មីមួយរូបទៀតជាសហម្ចាស់កម្មសិទ្ធិ ដោយអ្នកដែលគេយល់ថានឹងក្លាយជាម្ចាស់រួមនៃកម្មវិធីនេះគឺពាណិជ្ជករអង់គ្លេស Dipendra Gunlung ដែលជាម្ចាស់ក្រុមហ៊ុនអាកាសចរណ៍ Himalayan និងក្រុមហ៊ុនរោងភាពយន្តដ៏ប្រណិតៗជុំវិញពិភពលោក ព្រោះលោកបានអញ្ជើញ Miss World Karolina Bielawska និងអង្គភាព Miss World Organization ទៅទទួលទានអាហារជុំគ្នា។ បើសិនជាដំណឹងនេះគឺជាការពិតប្រាកដណាស់ថាអង្គភាពមួយនឹងប្រកាសជាផ្លូវការនៅក្នុងពេលឆាប់ៗនេះជាក់ជាមិនខាន។
នៅពេលដែលម្ចាស់មកុដឆ្នាំចាស់នាង Karolina Bielawska ប្រគល់មកុដជូនអ្នកឈ្នះក្នុងការប្រកួតលើកទី៧១នោះបានសេចក្ដីថា ម្ចាស់មកុដថ្មីនឹងបំណែកកំណត់ត្រារបស់ម្ចាស់មកុដឆ្នាំចាស់ ដោយនាងនឹងបានទៅកាន់ប្រទេសជាច្រើន បានចំណូលកាន់តែច្រើន និងបានចូលរួមក្នុងកិច្ចការមនុស្សធម៌កាន់តែទូលំទូលាយជាងមុន។
តាមដឹងសម្រាប់ការប្រកួតរបស់ Miss World នឹងមានប្រទេសចូលរួមច្រើនជាង ៨០ប្រទេសដើម្បីចូលរួមប្រកួតប្រជែងដណ្ដើមធ្វើជាម្ចាស់មកុដ៕
ប្រភព៖ philstar
