សិល្បៈជាតិ៖ ជាថ្មីៗម្ដងទៀត ព្រឹត្តិការណ៍អង្គរសង្រ្កាន្ត ២០២៣ នឹងមានការប្រកួតរាំម៉ាឌីហ្សុនបំបែកឯតទគ្គកម្មពិភពលោក និង Beyond The Games ឬ បត់បេះដូងក្រដាស បំបែកឯតទគ្គកម្មពិភពលោក ១ លានបេះដូង (បេះដូងលោតក្នុងចង្វាក់តែមួយ) ក្រោមប្រធានបទ ក្ដីស្រមៃ និងក្ដីសង្ឃឹម ដើម្បីអបអរបុណ្យចូលឆ្នាំថ្មី ជាមួយមហាគ្រួសារខ្មែរតែមួយ និង ជាលើកស្ទួយកិត្យានុភាពជាតិលើឆាកអន្តរជាតិ។
យុទ្ធនាការបត់បេះដូងក្រដាស បំបែកឯតទគ្គកម្មពិភពលោក ១ លានបេះដូងនេះ គឺដើម្បីបំបែកកំណត់ត្រាចាស់របស់ប្រទេសអង់គ្លេសកាលពីឆ្នាំ ២០១៨។ យ៉ាងណាមិញ នៅថ្ងៃទី ១៤ ខែកុម្ភៈ ឆ្នាំ ២០១៨ ចំថ្ងៃនៃទិវាក្ដីស្រឡាញ់ អង្គការមូលនិធិបេះដូងនៃចក្រភពអង់គ្លេស ឬហៅថា BHF បានបំបែកឯតទគ្គកម្មពិភពលោក Guinness World Record សម្រាប់ខ្សែសង្វាក់បេះដូងក្រដាសវែងបំផុតដែលមានអ្នកស្ម័គ្រចិត្ត ប្រមាណ18,000 នាក់បានចូលរួម។ ក្នុងនោះដែរ អង្គការមូលនិធិមួយនេះសម្រេចបានការបង្កើតខ្សែសង្វាក់បេះដូងចំនួន 17,939 ដែលអាចបំបែកកំណត់ត្រាចាស់របស់ Moët Hennessy UK មានខ្សែសង្វាក់បេះដូងចំនួន 11,288 ដែលមានប្រវែង 1.5 ម៉ាយ។
ដោយឡែក សម្រាប់កម្ពុជា បានដាក់ក្ដីរំពឹងខ្ពស់ក្នុងការ បត់បេះដូងក្រដាស ដើម្បី បំបែកឯតទគ្គកម្មពិភពលោកនៅក្នុងឆ្នាំ ២០២៣នេះ។ ក្នុងនោះដែរ សហភាពសហព័ន្ធយុវជនកម្ពុជា បាននិងកំពុងបញ្ជ្រាបការផ្សព្វផ្សាយពីព្រឹត្តិការណ៍អង្គរសង្ក្រាន្តឆ្នាំ២០២៣ ក្នុងយុទ្ធនាការប្រកួតរាំម៉ាឌីហ្សុន បំបែកឯកគ្គទកម្មពិភពលោក និងយុទ្ធនាការ Beyond The Games (លើសពីការប្រកួត) បត់បេះដូងក្រដាស បំបែកឯកគ្គទកម្មពិភពលោក ១ លានបេះដូង «បេះដូងលោតក្នុងចង្វាក់តែមួយ» ទៅដល់មន្ទីរ-អង្គភាព ស្ថាប័ន កងកម្លាំងប្រដាប់អាវុធ៣ប្រភេទ ដើម្បីបន្តធ្វើការផ្សព្វផ្សាយឱ្យកាន់តែទូលំទូលាយ និងផុសផុល ដល់បងប្អូនប្រជាពលរដ្ឋ សិស្សានុសិស្សនៅតាមគ្រឹះស្ថានឧត្តមសិក្សារដ្ឋ និងវិស័យឯកជន ព្រមទាំងសាធារណជននានា ក្នុងការចូលរួមយុទ្ធនាការមួយនេះផងដែរ។
ដើម្បីទទួលបានបន្ថែមពីព្រឹត្តិការណ៍នៃយុទ្ធនាការទាំងពីរខាងលើនេះ ប្រិយមិត្តសូមចូលទៅកាន់ហ្វេសប៊ុកផេក សហភាពសហព័ន្ធយុវជនកម្ពុជា និង Beyond the Games៕