សិល្បៈជាតិ៖ នៅល្ងាចថ្ងៃទី 21 ខែ កុម្ភៈ ឆ្នាំ ២០២៣នេះ ស្ថានីយទូរទស្សន៍កងយោធពលខេមរភូមិន្ទប៉ុស្ដិ៍លេខ ឬ TV5 បានរៀបចំកម្មវិធី STAFF PARTY ដែលជាកម្មវិធីជប់លៀងប្រចាំឆ្នាំ បង្កភាពសប្បាយរីករាយសម្រាប់ថ្នាក់ដឹកនាំ និងបុគ្គលិក ហើយក៏ដូចជាការរីតចំណងមេត្រីភាពជាមួយ តារាសិល្បៈ និងអ្នកសារព័ត៌មាននានា។
នាក្នុងឱកាសដ៏សោមនស្សរីករាយនេះ លោកជំទាវ រស់ ឡុងម៉ាឡែន ប្រធានផ្នែកទីផ្សារនិងលក់ប្រចាំស្ថានីយទូរទស្សន៍ប៉ុស្ដិ៍លេខ ៥ បានបង្ហើបថា នៅក្នុងកម្មវិធី STAFF PARTY គឺបានធ្វើឡើងជារៀងរាល់ឆ្នាំ។ ដោយឡែកនាឆ្នាំនេះ មានភ្ញៀវប្រមាណ ៣៥០នាក់ចូលរួម និងមានកម្មវិធីពិសេសៗជាច្រើន ដើម្បីញ៉ាំងកម្មវិធីឱ្យមានភាពសប្បាយរីករាយ។ ក្នុងនោះដែរ ក៏មានកម្មវិធីបង្ហាញម៉ូដពីក្រុម Mister Friendship Cambodia ដោយ Top5 ទាំង ៥ រូប ដែលមានការឧបត្ថម្ភម៉ូដសំលៀកបំពាក់ពីហាង ចៅឃុន លំដាប់អភិជនក្នុងប្រទេសថៃ និងរាជធានីភ្នំពេញ។
យ៉ាងណាមិញ លោកជំទាវ រស់ ឡុងម៉ាឡែន ក៏បានបញ្ជាក់ឱ្យដឹងថា ស្ថានីយទូរទស្សន៍ប៉ុស្ដិ៍លេខ ៥ តែងតែបម្រើអារម្មណ៍ទស្សនិកជនតាមរយៈកម្មវិធីភាពយន្ត រឿងភាគខ្មែរ-បរទេស និងកម្មវិធីកីឡាផ្សេងៗ។ ក៏ប៉ុន្តែ នាដើមឆ្នាំ ២០២៣នេះ ស្ថានីយបានបង្កើនការផលិតកម្មវិធីកម្សាន្តជាច្រើនកម្មវិធីទៀត សម្រាប់បំពេញតម្រូវការទីផ្សារផង និងបំពេញចិត្តមហាជនផង ដូចជាកម្មវិធី កម្សាន្ត កីឡា កំប្លែងចៅលោកតា Concert និងកម្មវិធីអាហារជាដើម។
លោកជំទាវលើកឡើងថា ការចាប់ដៃគូជាមួយក្រុមកំប្លែងលោក តាវ៉ិចទ័រ និង Nine Colors Production គឺបានបង្កើតកម្មវិធីថ្មីៗជាច្រើនសម្រាប់ប៉ុស្តិ៍លេខ ៥ ផ្ទាល់។ ជាក់ស្ដែងថ្មីៗនោះ នឹងមានការផលិតកម្មវិធីបែបដំណើរផ្សងព្រេង ឬ Adventure ដែលរំលេចពីតំបន់សំខាន់ៗក្នុងព្រះរាជាណាចក្រកម្ពុជា។
សូមជម្រាបថា លោកជំទាវ រស់ ឡុងម៉ាឡែន បានបម្រើការងារនៅក្នុងស្ថានីយទូរទស្សន៍កងយោធពលខេមរភូមិន្ទប៉ុស្ដិ៍លេខ៥ អស់រយៈពេលជាង ២០ ឆ្នាំមកហើយ ដោយលោកជំទាវចាប់ផ្ដើមការជាដំបូងជា ជំនួយការរបស់ MD បន្ទាប់មកក៏ចូលមកកាន់ការងារផ្នែកហិរញ្ញវត្ថុ និងរដ្ឋបាល ហើយក្រោយមកទៀតក៏ក្លាយជាប្រធានផ្នែកគ្រប់គ្រងទីផ្សារ និងលក់ប្រចាំស្ថានីយប៉ុស្តិ៍លេខ ៥។ ប្រវត្តិតស៊ូ និងការខិតខំប្រឹងប្រែងបំពេញកិច្ចការងារប្រចាំថ្ងៃរបស់លោកជំទាវ៣ បានរំលេចឡើងនូវគំរូល្អមួយសម្រាប់អ្នកជំនាន់ក្រោយគួរតែសិក្សារៀនសូត្របន្ត៕