មិនថាទីកន្លែងណា រមែងមានរឿងតំណាលនិងប្រវត្តិសាស្ត្រដ៏ខ្មៅងងឹតទាំងអស់ មិនលើកលែងសូម្បីតែប្រទេសម៉ាឡេស៊ី ប្រទេសសមាជិកអាស៊ាន ប្រទេសដែលជាទីតាំងទេសចរណ៍មួយសម្រាប់ទេសចរណ៍ខ្មែរនិយមទៅលេងកម្សាន្តផ្គួបគ្នាជាមួយនឹងប្រទេសសិង្ហបុរី។ ជាទូទៅប្រទេសម៉ាឡេសមិនសូវជាមានរឿងខ្មោចលងសាហាវៗគួរឱ្យខ្លាចលេចឮមកខាងក្រៅនោះទេ ប៉ុន្តែការពិតមានកន្លែងដែលគួរឱ្យខ្លាចមិនចាញ់ប្រទេសដែលមានតំណាលរឿងខ្មោចលងសាហាវៗប៉ុន្មានទេ។
១.Genting Highlands Resort
ទីនេះគឺជាសណ្ឋាគារដ៏មានឈ្មោះល្បីល្បាញបំផុតមួយរបស់ប្រទេសម៉ាឡេស៊ី ដែលអ្នកទេសចរណ៍ត្រូវជិះកន្ត្រកយោងឡើងទៅលើ។ នៅខាងលើនោះមានសណ្ឋាគារសរុបរួមគ្នាច្រើនជាង៧កន្លែង ផ្សារទំនើប សួនកម្សាន្ត និងកាស៊ីណូជាដើម។ ស្ដាប់រឿងភ្លាមលោកអ្នកប្រាកដជាគិតថាទីនេះគឺជាទឹកដីផ្ដល់ក្ដីសុខជាទីសម្រាក់សម្រាប់អ្នកចង់លម្ហែកាយ។ មានកន្លែងសប្បាយចាំបាច់ត្រូវតែមានពិបាក មានតំណាលថាទីនេះជាកន្លែងមានខ្មោចលងព្រោះធ្លាប់មានអ្នកសម្លាប់ខ្លួនដោយសារលេងល្បែងចាញ់អស់ពីខ្លួន។ នៅក្នុងសណ្ឋាគារនេះមានកន្លែងមួយចំនួនធំដែលនៅសុខៗក្មេងៗស្រាប់យំហើយមិនព្រមដើរឆ្លងកាត់ដោយមិនដឹងមូលហេតុ។ មិនតែប៉ុណ្ណោះមានភ្ញៀវជាច្រើននាក់ធំក្លិនធូបទាំងមិនមានការអុជធូបទាល់តែសោះ។ អ្វីដែលគួរឱ្យកត់សម្គាល់បន្ទប់គេងមួយចំនួនរបស់សណ្ឋាគារមិនបានបើកឱ្យភ្ញៀវបានកក់ដើម្បីមកសម្រាកនោះឡើយ ទោះជានៅក្នុងរដូវកាល High Season ក៏ដោយជាពិសេសនៅជាន់ទី២១ដែលឮតៗគ្នាមកថាជាជាប់បណ្ដាសាសូម្បីតែជណ្ដើរយន្តក៏ដាក់មិនឱ្យឈប់នៅជាន់ទី២១នេះដែរ ពោលគឺឡើងពីជាន់ទី២០ ទៅជាន់ទី២២តែម្ដង។
២.Ghost Hill, Penang
ទីនេះគឺជាទីតាំងប៉មទាហានដែលកសាងឡើងក្នុងសម័យសង្គ្រាមលោកលើកទី២ ដែលទីនេះទាហានជប៉ុនប្រើប្រាស់សម្រាប់ជាកន្លែងប្រហារជីវិតអ្នកទោសដោយកាត់ក្បាល។ បច្ចុប្បន្នតំបន់ជុំវិញកន្លែងនេះត្រូវបានរៀបចំឱ្យកន្លែងជាសារៈមន្ទីរ Penang War Museum ឬ សារៈមន្ទីរសង្គ្រាម Penang ដែលនៅប្រើប្រាស់សម្រាប់រក្សាទុកអាវុធកាំភ្លើង កាំភ្លើងធំ។ល។ ដោយរក្សាតុកនៅសភាពដើម។ គេនិយាយថាទីនេះមិនបានគួរឱ្យខ្លាចដោយសារតែរឿងខ្មោចនោះទេ តែគួរឱ្យខ្លាចព្រោះប្រវត្តិរបស់វាទៅវិញនោះទេ។
៣.Highland Towers
អគារនេះបាក់ធ្លាក់សង្កត់សម្លាប់ជីវិតមនុស្សជាច្រើននាក់កាលពីឆ្នាំ១១៩៣ ចំណែកឯបំណែកអគារដែលនៅសល់ត្រូវទុកចោល។ រឿងខ្មោចដែលធ្លាប់និយាយតៗគ្នាមកពាក់ព័ន្ធនឹងកន្លែងនេះគឺមានអ្នកបើកតាក់ស៊ីម្នាក់បានដឹកភ្ញៀវស្រីម្នាក់ពាក់កណ្ដាលយប់។ ភ្ញៀវជាស្ត្រីនោះអង្វរឱ្យអ្នកបើកតាក់ស៊ីដឹកនាងមកកន្លែងនេះ នៅពេលដែលតាក់ស៊ីសួរថាតើនាងទៅទីនោះធ្វើអី ទីនោះមានតែអគារដែលបោះបង់ចោល នាងឆ្លើយតបយ៉ាងខ្លីវិញថា បំណែកដៃជើងរបស់នាងនៅសល់នៅទីនោះនៅឡើយ។
៤.Kuala Lumpur International Airport
អ្នកណាទៅគិតថាពួកយើងអាចនឹងជួបខ្មោចតាំងតែចុះយន្តហោះមកដល់ប្រទេសម៉ាឡេស៊ី? អាកាសយានដ្ឋានអន្តរជាតិ កូឡាំពួរសាងសង់នៅលើផ្ទៃដីដែលជាចំការដាំដើមរកាំពីមុនមក។ នៅពាក់កណ្ដាលយប់បុគ្គលិកព្រលានយន្តហោះរមែងមើលឃើញនិងបានឮអ្វីចម្លែកៗជាញឹកញាប់ ថែមទាំងធ្លាប់មានអាកាសយាននិកនិងភ្នាក់ងារសន្ដិសុខធ្លាប់ត្រូវខ្មោចចូលសណ្ឋិតថែមទៀតផង។
៥.Pudu Jail
គុកដាក់អ្នកទោសដែលកសាងឡើងតាំងតែសម័យអង់គ្លេសដាក់អាណានិគម រហូតដល់សង្គ្រាមលោកលើកទីពីរ ក៏ប្រើប្រាស់ជាកន្លែងឃុំឃាំងអ្នកទោសនិងឈ្លើយសឹកប្រមាណជាង២០០០នាក់។ សព្វថ្ងៃនេះនៅមានមនុស្សបានឮសំឡេងស្រែកយំស្រណោះស្រណោកដោយក្ដីឈឺចាប់ពីក្នុងកន្លងប្រហារជីវិត ទាំងដែលមិនមានមនុស្សរស់នៅ។ បរិយាកាសនៅកន្លែងនោះស្ងាត់ជ្រងំគួរឱ្យខ្លាច ថែមទាំងនៅក្នុងបន្ទប់មានអាកាសធាតុត្រជាក់ខុសប្រក្រតីផងដែរ។ បច្ចុប្បន្នគុកឃុំឃាំងអ្នកទោសនេះត្រូវបានបិទទ្វារលែងដំណើរការ ហើយស្ទើតែត្រូវបានវាយកម្ទេចចោលកាលពីឆ្នាំ២០០៩ ដើម្បីសាងសង់ជាផ្សារទំនើប ដោយមនុស្សគ្រប់គ្នាបានត្រឹមតែសង្ឃឹមថាអគារថ្មីនេះមិនមានវិញ្ញាណនៅស្ថិតផងចុះ
៦. Kellie’s Castle, Perak
ប្រាសាទចាស់បុរាណរចនាបទអឺរ៉ុបដែលជាអតីតកន្លែងស្នាក់នៅរបស់ជនជាតិអេកូស ចាប់ផ្ដើមកសាងឡើងនៅឆ្នាំ១៩១៥ តែនៅមិនទាន់សាងសង់រួចរាល់ ស្រាប់តែម្ចាស់បានបាត់បង់ជីវិតនៅឆ្នាំ១៩២៦ ដូច្នេះហើយការសាងសង់ត្រូវបានចាប់គាំង។ ផ្ទៃខាងក្នុងប្រាសាទត្រូវបានកសាងឡើងយ៉ាងស្មុគស្មាញ មានបន្ទប់និងផ្លូវដើរអាថ៌កំបាំងជាច្រើន ប្រៀបដូចផ្ទះខ្មោចសណ្ឋិត វីនឆេសស្ទឺរ នៅសហរដ្ឋអាមេរិក។ នៅរាល់ពេលយប់មនុស្សជាច្រើនរមែងបានឮសំឡេងស្រែកនិងសំឡេងទ្វារបង្អួចបិទឮខ្លាំងៗទាំងដែលទីនោះមិនមានមនុស្សរស់នៅទាល់តែសោះ។
៧. Karak Highway
នេះគឺជាមហាវិថីដែលគួរឱ្យខ្លាចជាទីបំផុតមួយរបស់ពិភពលោក។ ផ្លូវកាត់លេខ E8 ឬមានឈ្មោះមានទៀតថា Karak Highway។ ផ្លូវនេះបើកឱ្យដំណើរការប្រើប្រាស់កាលពីឆ្នាំ១៩៧៧ តភ្ជាប់គ្នារវាងក្រុង Kualam Lumpur រហូតដល់ក្រុង Karak Pehang។ កាលពីឆ្នាំ១៩៩០ មានកើតហេតុការណ៍គ្រោះថ្នាក់ចរាចរណ៍ដ៏រន្ធត់មួយដោយមានរថយន្តជាង១០គ្រឿងបុកបន្តកន្ទុយគ្នា មានមនុស្សស្លាប់ជាង១៧នាក់។ចំណែករឿងខ្មោចលងសាហាវៗ នៅទីនេះផ្ដល់នូវអារម្មណ៍ប្លែកៗ ជាងគួរឱ្យភ័យខ្លាច នោះគឺប្រវត្តិរថយន្តវ៉ុលវ៉ាហ្គេនរាងអណ្តើកពណ៌លឿង ដែលសុខៗស្រាប់តែបង្ហាញខ្លួននៅពីមុខអ្នកបើកបរលើដងវិថីនេះ ហើយនៅពេលដែលអ្នកបើកបរវ៉ារថយន្តនោះបាន ស្រាប់តែឃើញវាបើកមកពីមុខរថយន្តរបស់អ្នកបើកបរវិញម្ដងទៀត ហើយនៅពេលដែលបើកបរវ៉ាវាក្រឡេកទៅមើលក្នុងឡានបែរជាមិនមានអ្នកបើកបរនៅក្នុងនោះ។
